ޓަކެހީރޯ ޓޮމިޔާސޫ، އާސެނަލްގެ އެއްބަސްވުން އައު ކޮށްފި

އާސެނަލަށް ކުޅެމުން އަންނަ ޖަޕާންގެ ޑިފެންޑަރު ޓަކެހީރޯ ޓޮމިޔާސޫ އެ ކުލަބާއެކު ސޮއި ކޮށްފައިވާ އެއްބަސްވުން އައު ކޮށްފި އެވެ.

އުމުރުން 25 އަހަރުގެ ކުޅުންތެރިޔާ އާސެނަލަށް ބަދަލުވީ 2021 ވަނަ އަހަރު އެވެ. ބޮލޮގްނާ ދޫކޮށް އޭނާ އާސެނަލަށް ބަދަލުވޯ ހަތަރު އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަަސްވުމުގެ މުއްދަތު ހަމަވާން އޮތީ އަންނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގެ މުއްދަތު ހަމަވާން ބާކީ އެއް އަހަރަށް އޮއްވާ، އާސެނަލުން ވަނީ އޭނާގެ އެއްބަސްވުން އައު ކޮށްފަ އެވެ. އާސެނަލްގެ އެއްބަސްވުން އޭނާ އައު ކުރީ އެއް އަހަރު ދުވަހަށެވެ. އެހެންކަމުން މިހާރުގެ އެއްބަަސްވުން ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ.

އައު އެއްބަަސްވުމުގައި ސޮއި ކުރުމަށްފަހު ވާހަކަ ދައްކަމުން ޓޮމިޔާސޫ ބުނީ، އާސެނަލަށް ކުޅުމަކީ އޭނާ ދެކެމުން އައި ވަރަށް ބޮޑު ހުވަފެނެއް ކަމަށެވެ. އެކަން ޙާސިލު ކުރެވުނު ދުވަހު ވަރަށް އުފާވި ކަމަށާއި، އާސެނަލްގެ ޖާޒީގައި މެޗު ކުޅެން ލިބޭ ކޮންމެ ފުރުސަތަކީ ވެސް ވަރަށް ބޭނުންތެރި ފުރުސަތެއް ކަމަށް އޭނާ ފާހަގަ ކުރި އެވެ. އެހެންކަމުން ކުރިއަށް އޮތް ތަނުގައި އާސެނަލާއެކު ގިނަ މަސައްކަތްތަކެއްކޮށް، ކާމިޔާބު ހޯދުމުގެ ޢަޒުމުގައި ހުރި ކަމަށް ވެސް އޭނާ ބުންޏެވެ.

އާސެނަލަށް ބަދަލުވެ ޓޮމިޔާސޫ ވަނީ މިހާތަނަށް އެ ކުލަބަށް 73 މެޗު ކުޅެދީ އެއް ލަނޑު ޖަހައިފަ އެވެ. އާސެނަލާއެކު އޭނާ ވަނީ މި ސީޒަންގެ އެފްއޭ ކޮމިއުނިޓީ ޝީލްޑު ކާމިޔާބު ކޮށްފަ އެވެ. މި ސީޒަންގައި އާސެނަލަށް އޭނާ 20 މެޗު ކުޅެދީފައިވާއިރު، އާޓެޓޭ އިސްކަން ދޭ ކުޅުންތެރިންގެ ތެރޭގައި ވެސް އޭނާ ހިމެނެ އެވެ.