ނެޓްވޯކްތަކަށް ގެއްލުން ނުވާނޭހެން ހުޅުމާލޭގައި ކެމްޕެއިން ބެނާ ދަމަން އެދިއްޖެ
ކެމްޕެއިން މެޓީރިއަލް ހަރުކުރުމުގެ ކުރިން ކޯޕަރޭޝަންގެ ހުއްދަ ހޯދާ އެޗްޑީސީގެ ލަފައާ އިރުޝާދުގެ މަތިން އެކަން ކުރުމަށް ވަނީ އެދިފައި
ހައުސިންގ ޑިވެލޮޕްމަންޓް ކޯޕަރޭޝަން
ހުޅުމާލޭގައި ކެމްޕެއިން ބެނާ ދަމާއިރު، އާންމު ޚިދުމަތްތައް ފޯރުކޮށްދިނުމަށް ސާވިސް ޕްރޮވައިޑަރުން އަޅާފައިވާ ނެޓްވޯކްތަކަށް ގެއްލުން ނުވާނޭހެން އެކަން ކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން އެދެފިއެވެ.
އެކަމާއި ގުޅޭގޮތުން އެޗްޑީސީން ކުރި އިއުލާނެއްގައި ބުނެފައިބަނީ ޕޯސްޓަރުތަކާއި ބެނާތައް ހަރުކުރެވޭ ސަރަހައްދުގެ ގޮތުން ކަރަންޓު ކޭބަލާއި ފެނާއި ނަރުދަމާގެ ނިޒާމަށް ގެއްލުމެއް ލިބި ޚިދުމަތް މެދު ކެންޑިއްޖެ ހާލަތެއްގައި ރައްޔިތުންނަށް ގިނަގުނަ އުނދަގޫތަކާ ކުރިމަތިލާން ޖެހޭނެ ކަމަށެވެ.
އެހެންކަމުން ކުރިއަށް އޮތްތަނުގައި މިފަދަ ކެންވަސްތަކާ ބެނާތައް ހަރުކުރާ ފަރާތްތަކުން މިކަމަށް ސަމާލުވެ، ކެމްޕެއިން މެޓީރިއަލް ހަރުކުރުމުގެ ކުރިން ކޯޕަރޭޝަންގެ ހުއްދަ ހޯދާ އެޗްޑީސީގެ ލަފައާ އިރުޝާދުގެ މަތިން އެކަން ކުރުމަށް އެޗްޑީސީން ވަނީ އިލްތިމާސްކޮށްފައެވެ.
އެޗްޑީސީން ބުނީ ރާއްޖޭގައި ބާއްވާ އިންތިޚާބުތަކާ ގުޅިގެން ކެމްޕެއިން ބެނާއާ ކެންވަސް މެޓީރިއަލް ހަރުކުރުމުގެ ފުރުސަތު ހަމަހަމަކަމާއެކު ހުރިހާ ފަރާތަކަށް ހޯދައިދިނުމަށް ކޯޕަރޭޝަނުން އަބަދު ވެސް މަސައްކަތް ކުރާކަމަށެވެ.
ހުޅުމާލޭގެ އެކި ސަރަހައްދުތަކުގައި މިހާރު ވެސް އެކި ސައިޒުގެ ބޮޑެތި ބެނާތަކާއި ކެންވަސްތައް ހަރުކޮށްފައި ވެއެވެ.
