އަންޗެލޮޓީ ބުނަނީ ރެއާލަށް ޖެހިލުމެއް ނެތް ކަމަށް!

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގައި އެންމެ ފަހުގެ ޗެމްޕިއަން މެންޗެސްޓަރ ސިޓީއާ ދެކޮޅަށް ނިކުންނައިރު، ރެއާލް މެޑްރިޑުން ޖެހިލުން ވާން ޖެހޭ އެއްވެސް ކަމެއް ނެތް ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.

އޭނާ މިހެން ބުނީ ޗެމްޕިއަންސް ލީގުގެ ގުރު ނެގުމުގެ ރަސްމިއްޔާތަށްފަހު ނޫސްވެރިންނާ ވާހަކަ ދައްކަމުންނެވެ. މުބާރާތުގެ ތާރީޚުގައި ވެސް އެންމެ ކާމިޔާބު ޓީމު، ރެއާލަށް އިރުޝާދު ދެމުން އަންނަ އަންޗެލޮޓީ ބުނީ، ސިޓީއާ ދެކޮޅަށް ނިކުންނަން ޖެހުމުން އެއްވެސް ކަންބޮޑުވުމެއް ނެތް ކަމަށެވެ.

އޭނާ ބުނީ ރެއާލް އޮތީ ވަރަށް ބޮޑު އުންމީދެއްގައި ކަމަށާއި، އެ ޓީމަށް ފުރިހަމަ ޔަގީން ކަމާއި، އިތުބާރު އޮތް ކަމަށެވެ. މިދިޔަ ދެ ސީޒަނުގައި ވެސް ރެއާލުން ވަނީ ސިޓީއާ ދެކޮޅަށް ކުޅެފަ އެވެ. އެކަމަށް އިޝާރާތްކޮށް އަންޗެލޮޓީ ބުނީ، އޭގެ ތެރެއިން އެއް އަހަރު މޮޅުވީ ރެއާލް ކަމަށެވެ. އަދި އަނެއް އަހަރު މޮޅުވީ ސިޓީ ކަމަށާއި، މިއަހަރު ކަންތައް ވާނެ ގޮތެއް ބަަލަން ތިބެން ޖެހޭނެ ކަމަށް ވެސް އޭނާ ވަނީ ބުނެފަ އެވެ.

މީގެ އިތުރުން އަންޗެލޮޓީ ބުނީ، މީގެ ކުރިއާ އަޅާ ބަލާއިރު ހުރިހާ ގޮތަކުން ވެސް ރެއާލް ވަރުގަދަ ކަމަށެވެ. އެކަން ފާހަގަކޮށް އޭނާ ބުނީ އަނިޔާގެ ސަބަބުން ކުޅުމާ ދުރުގައި ހުރި ތިބައޫ ކޯޓުއާ އަދި އެޑާ މިލިޓާއޯ ވެސް ދާފި އަވަހަށް ޓީމާ ގުޅޭނެ ކަމަށެވެ. ނަމަވެސް ސިޓީއާ ދެކޮޅަށް އެ ދެ ކުޅުންތެރިންނަށް ކުޅެވޭނެ ކަމުގެ ޔަގީންކަން ދެވެން ނެތް ކަމަށް ގާޑިއޯލާ ބުންޏެވެ. އެކަމަށް ރިސްކު ނުނަގާނެކަން ފާހަގަކޮށް ގާޑިއޯލާ ބުނީ، އެ ކުޅުންތެރިން ޓެސްޓު ކުރާނެ ކަމަށެވެ.

ރެއާލުން ވަނީ 14 ފަހަރެއްގެ މަތިން ޗެމްޕިއަންސް ލީގު ކާމިޔާބު ކޮށްފަ އެވެ. އެއީ ރެކޯޑު އަދަދެކެވެ.