އިސްރާއީލުން ޣައްޒާގައި ހިންގަމުންދާ ގަތުލުއާންމުގައި މިހާތަނަށް ޝަހީދުވި މީހުންއަދަދު 31،341 އަށް އަރައިފިއެވެ.
ޣައްޒާއާ ދެކޮޅަށް އިސްރާއީލުން ކުރަމުންދާ ހަނގުރާމައިގައި ޝަހީދުވި މީހުންގެ އަދަދު އިތުރުވަމުންދާއިރު، ފަލަސްތީނުގެ ސިއްހަތާ ބެހޭ ވުޒާރާއިން އާންމުކުރި އެންމެ ފަހުގެ ތަފާސް ހިސާބުތަކުން ފެންނަނީ ޣައްޒާގެ ހާލަތުގެ ނުރައްކާތެރި މަންޒަރެކެވެ.
އިސްރާއީލުން މިދިޔަ އޮކްޓޯބަރު މަހުގެ ހަތްވަނަ ދުވަހުން ފެށިގެން ފަލަސްތީނާ ދެކޮޅަށް ކުރަމުންދާ އަނިޔާވެރި ހަނގުރާމައިގައި ޣައްޒާގެ 31،341 މީހުން ޝަހީދުވެފައިވާއިރު، 73،134 މީހުން ޒަޚަމްވެފައިވާ ކަމަށް އެ މިނިސްޓްރީން ބުނެއެވެ. ފާއިތުވި 24 ގަޑިއިރުގެ ތެރޭގައި އެކަނިވެސް 69 މީހުން މަރުވެ 110 މީހުން ޒަޚަމްވެފައިވާއިރު، އެންކްލޭވްގައި ހިނގަމުންދާ ހަމަނުޖެހުންތައް ދަނީ އިތުރުވަމުން ކަމުގައި އެ މިނިސްޓްރީން ބުނެއެވެ.
ޣައްޒާގައި ހިނގަމުންދާ ނުރައްކާތެރި އިންސާނީ ކާރިސާއާ ގުޅިގެން ހަނގުރާމަ ހުއްޓާލުމަށް ތަކުރާރުކޮށް ގޮވާލަމުން އަންނައިރު، އެމެރިކާގެ ޑިމޮކްރެޓިކް ސެނެޓުގެ މެޖޯރިޓީ ލީޑަރު ޗަކް ޝޫމަރަކީ ސުލްހައަށް އަޅަންޖެހޭ ފިޔަވަޅުތައް އެޅުމަށް އެމެރިކާގެ އިސްބޭފުޅަކު ގޮވާލެއްވި އެންމެ ފަހުގެ ގޮވާލެއްވުމެވެ.
ބުރާސްފަތި ދުވަހު ޝޫމަރ އިޝާރާތް ކުރެއްވި ގޮތުގައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއަކީ ސުލްހައަށް އޮތް ހުރަހެކެވެ. އަދި އިޒްރޭލުގައި އިންތިޚާބެއް ބާއްވަން ޖެހޭކަން އޭނާ ފާހަގަކުރެއްވިއެވެ.
އެމެރިކާގައި އެންމެ މަތީ ދަރަޖައިގެ ޔަހޫދީ އިންތިޚާބީ އޮފިޝަލެއްގެ ގޮތުގައި ހުންނެވި ޝޫމަރގެ މިފާޑު ކިޔުމަކީ އޭނާ ކުރިން ގެންގުޅުއްވި ސިޔަސަތުތަކާ ވަރަށް އިދިކޮޅު ވާހަކަފުޅުތަކެކެވެ.
ހަމަނުޖެހުންތައް ހިނގަމުންދާއިރު، ޣައްޒާގައި ހިނގަމުންދާ އިންސާނީ ކާރިސާ ދަނީ ނުރައްކާތެރި ސްޕީޑެއްގައި ގޯސްވަމުންނެވެ. ކާބޯތަކެތީގެ ނުރައްކާތެރިކަން ވަރަށް ބޮޑަށް ތަހައްމަލު ކުރަމުންދާ އާބާދީގެ 90 އިންސައްތައަށްވުރެ ގިނަ މީހުންނަށް މިހާރު ވަނީ ކާރިސާގެ އަސަރު ފޯރާފައެވެ.
ރިޕޯޓްތައް ބުނާގޮތުގައި ޣައްޒާގެ އުތުރުން ފެންނަ މަންޒަރުތަކުން ހާމަވަނީ އިންތިހާއަށް ނުރައްކާބޮޑުވެފައި ވާކަމެވެ. މައިންބަފައިންނަށް އެމީހުންގެ ދަރިންނަށް ޖަނަވާރުގެ ކާނާ އާއި ގަސްގަހާގެހިގެ ފަތްފަދަ ތަކެތި ކާން ދޭން މަޖުބޫރުވެ، ނުކުޅެދުންތެރިކަމާއި ނިއުޓްރިޝަނަލް އުނިކަންތަކާ މެދު ބޮޑެތި ކަންބޮޑުވުންތަކެއް ވަނީ އެސަރަޙައްދުގައި އުފެދިފައެވެ.
އަދ.ގެ ރެފިއުޖީންނާ ބެހޭ އިދާރާ އަންރާގެ ރިޕޯޓުތަކުން އެ ސަރަހައްދުގެ ހާލަތު ގޯސްވުމުގެ ނުރައްކާތެރި ނަތީޖާ ތަކަށް އަލިއަޅުވާލާފައިވާއިރު، ޑިހައިޑްރޭޝަން އާއި ނިއުޓްރިޝަންގެ ސަބަބުން ފާއިތުވި ދުވަސްތަކުގައި މަދުވެގެން 10 ކުއްޖެއްގެ ފުރާނަ ހިތާމަވެރި ގޮތަކަށް ގެއްލިފައިވާކަން އެނގެއެވެ.
