މަޖިލިސް އިންތިޚާބު ލަސްކުރުމުން ބޭނުންވާ ބަޖެޓަށް އެދި މި މަހު ފަހުކޮޅު ފޮނުވާނެ - އީސީ
14 މާރިޗު 2024 | ބުރާސްފަތި 07:30މިހާރު އީސީން ނިންމާފައި ވަނީ އެޕްރިލް މަހުގެ 21 ވަނަ ދުވަހު އިންތިޚާބު ބޭއްވުމަށް
އީސީގެ ރައީސް ފުއާދު ތައުފީގު
މަޖިލިސް އިންތިޚާބު ލަސްކުރުމުން ބޭނުންވާ ބަޖެޓަށް އެދި މި މަހު ފަހު ކޮޅު ފޮނުވާނެކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އިލެކްޝަންސް ކޮމިޝަންގެ ރައީސް ފުޢާދު ތައުފީގް މިހެން ވިދާޅުވީ ރާއްޖެއެމްވީން ދެންނެވި ސުވާލަކަށް ޖަވާބުދެއްވަމުންނެވެ. އޭނާ ވިދާޅުވީ ކޮމިޝަނުން މިހާރު ކުރަމުން ދަނީ ބަޖެޓަށް ގެންނަން ޖެހޭ ބަދަލުތަކުގެ ތަފްސީލް ދެނެގަނެ، އިތުރަށް ބޭނުންވާ ބަޖެޓްގެ ތަފްސީލްތައް ފިނޭންސް މިނިސްޓްރީ އަށް ފޮނުވުމުގެ ކުރިން ބަލަން ޖެހޭ ކަންކަން ބެލުމުގެ މަސައްކަތް ކަމަށެވެ.
އިންތިޚާބު ފަސްކުރުމާއެކު 15 މިލިއަނާއި 20 މިލިއަން ރުފިޔާއި ދެމެދުގެ އަދަދަކަށް ބަޖެޓު ބޮޑު ވެގެންދާނެ ކަމަށާއި ސީދާ ޚަރަދު އެނގޭނެ ގޮތަށް ބަޖެޓު އެކުލަވާލަމުންދާ ކަމަށާއި ޚަރަދު އިތުރު ނުވާނެ ގޮތަށް އިގްތިޞާދުކުރަން އިސްކަން ދޭ ކަމަށް އެ ކޮމިޝަނުން ކުރިން ބުނެފައިވެއެވެ.
އެގޮތުން އިންތިޚާބުގެ ބަޖެޓަށް ބޮޑު ބައެއް އިތުރުވެގެން ދަނީ ކޮންޓްރެކްޓް މުވައްޒަފުން އިތުރު ދޮޅުމަހެއްހާ ދުވަހު އިތުރަށް ވަޒީފާގައި ބޭތިއްބުމާއި، ރޯދަ މަހު މަސައްކަތް ކުރުމުން ދޭ އިނާޔަތްތަކާއި ރޯދަ އިނާޔަތްތައް އޭގެ ތެރޭގައި ހިމެނޭތީއެވެ. މަޖިލިސް އިންތިޚާބުގެ މަސައްކަތްތަކުގެ ތެރެއިން މިހާރު ކުރިއަށް ދަނީ އިދާރީ މަސައްކަތްތައް ކަމަށް އީސީއިން ވަނީ ބުނެފައެވެ. ތާރީހަށް ބަދަލު އައުމާއި ގުޅިގެން ކެނޑިޑޭޓުންގެ އޮބްޒަރވަރުން ބަދަލުކުރުމަށް ކޮމިޝަނުން ފުރުސަތުދިނެވެ. އަދި އަލަށް ވޯޓު ލެވޭ މީހުންނަށް ރީރަޖިސްޓްރީވުމަށް ފުރުސަތު ހުޅުވާލައި، އެއަށް ފަހު ޝަކުވާ އަށް ދެ ދުވަސް ދިނެވެ.
މަޖިލިސް އިންތިޚާބު އެންމެ ފުރަތަމަ ބާއްވަން ހަމަޖެއްސީ 17 މާރޗް 2024 ވަނަ ދުވަހުއެވެ. އެއީ ރޯދަ މަހުގެ 7 ވަނަ ދުވަހެވެ. އެހެންނަމަވެސް ރޯދަ މަހު އިންތިޚާބުތައް ނުބާއްވާ ގޮތަށް މަޖިލީހުން އިންތިޚާބުތަކާއި ބެހޭ ޤާނޫނަށް ބަދަލުގެނައުމާއި ގުޅިގެން އިންތިޚާބު ވަނީ ފަސްކޮށްފައެވެ. މިހާރު އީސީން ނިންމާފައި ވަނީ އެޕްރީލް މަހުގެ 21 ވަނަ ދުވަހު އިންތިޚާބު ބޭއްވުމަށެވެ.
