އެންޓި ޑިފެކްޝަން ބިލްގެ ބަހުސް ފަށައިފި - މެމްބަރުން ފާހަގަކުރީ އެފަދަ ޤާނޫނެއްގެ މުހިންމުކަން
13 މާރިޗު 2024 | ބުދަ 08:59އެ ބިލަށް ވާހަކަދެއްކި އެހެން މެމްބަރުން ވެސް މިފަދަ ބިލެއްގެ މުހިންމުކަން ފާހަގަކުރައްވާފައިވޭ
މަޖިލިސް
އެންޓި ޑިފެކްޝަން ބިލްގެ ބަހުސް ފަށައިފިއެވެ.
ބުދަ ދުވަހު، އެ ބިލް މަޖިލީހަށް ހުށަހެޅުއްވީ ބާރަށު ދާއިރާގެ މެމްބަރު އަހުމަދު އަބްދުﷲ އެވެ. ބިލް ހުށަހަޅުއްވަމުން އޭނާ ވިދާޅުވީ މެމްބަރުން އެއް ޕާޓީން އަނެއް ޕާޓީ އަށް ބަދަލުވާ ގޮތުން ދިވެހި ރައްޔިތުން މާޔޫސްވެފައިވާ ކަަމަށެވެ. އަދި ރައްޔިތުން އިންތިޚާބު ކުރާ ބަޔަކު އެ ބަޔަކު އިންތިޚާބުވި ފިކުރުގައި ތިބުން މުހިންމު ކަމަށް އޭނާ ވިދާޅުވިއެވެ. އެ ބިލުގެ ބޭނުމަކީ މަޤާމުތަކަށް އިންތިޚާބު ކުރާ މީހުންނަށް އޮންނަ އިތުބާރާއި ޔަޤީންކަން ދެމެހެއްޓުން ކަމަށްވެސް އޭނާ ވިދާޅުވިއެވެ.
އެ ބިލަށް ބަހުސް ކުރައްވަމުން މެމްބަރުން ވަނީ އެންޓި ޑިފެކްޝަން ޤާނޫނެއް އޮތުމުގެ މުހިންމުކަން ފާހަަގަކުރައްވާފައެވެ. އެގޮތުން މާފަންނު މެދު ދާއިރާގެ މެމްބަރު އިބްރާޙިމް ރަޝީދު ބޮންޑެ ވަނީ ސިޔާސީ ގޮތުން މީހުން ދައްކާ ވާހަކަ އާއި އަމަލާއި ދިމާނުވެ އެއް ޕާޓިން އަނެއް ޕާޓީއަށް ބަދަލުވުމަކީ އާއްމުން ކަންބޮޑުވާ ކަމެއް ކަމަށް ފާހަގަ ކުރައްވާފައެވެ. މީގެ އިތުރުން ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވަނީ ބަލަބަލާ ތިއްބާ މުޅި މަޖިލިސް ވިޔަފާރި އުސޫލުން ޓްރާންސެކްޝަނަލް މަޖިލީހަކަށް ހަދަމުންދާތަން ފެނުމުން ކަންބޮޑުވާ ކަމަށެވެ. އަދި ކުއްލިއަކަށް މެމްބަރުން ވެރިކަން ބަދަލުވުމާއި އެކު ފެން އޮތް ދިމާލަށް މަސްދާ ބީދައިން ޕާޓީ ބަދަލުކުރުމަކީ އާއްމުން ބަަލައިގަންނާނެ ކަމެއް ނޫން ކަމަށް އީވާ ވަނީ ވިދާޅުވެފައެވެ. އަދި ބައެއް މެމްބަރުން މަޖިލީހަށް ހޮވުނު ޕާޓީން ވަކި ނުވި ނަމަވެސް އަމިއްލަ ޕާޓީގެ ފިކުރާއި ދެކޮޅަށް މަޖިލީހުގައި ވޯޓުދެމުންދާ ކަމަށާއި އެކަން ކުރަނީ ފައިސާ ނަގައިގެން ކަމަށް ވެސް އީވާ ވަނީ ވިދާޅުވެފައެވެ.
ހެންވޭރު ދެކުނު ދާއިރާގެ މެމްބަރު ހުސައިން ޝަހީމް ވަނީ އާއްމުން ބައެއް މެމްބަރުން މަޖިލީހަށް ހޮވަނީ ޕާޓީ ރޫޙުގައި ޕާޓީ އިން ހޮވޭ މެމްބަރަކަށް އެހެން މެމްބަރުންނަށް ވުރެ ރަނގަޅަށް ޖަވާބުދާރީކުރުވޭނެތީ ކަމަށް ވިދާޅުވެފައެވެ. ނަމަވެސް އެ މެމްބަރެއްގެ ބޭނުން ނުހިފި ދާތަން ފެނުމަކީ އާއްމުން ވަރަށް ބޮޑަށް މާޔޫސްވާ ކަމެއް ކަަމަށް އޭނާ ވަނީ ވިދާޅުވެފައެވެ. އެ މައުޟޫޢު އަށް ވާހަކަދައްކަވަމުން ކެލާ ދާއިރާގެ މެމްބަރު އިބްރާހިމް ޝަރީފް ވަނީ މިފަދަ ޤާނޫނެއް ވުޖޫދު ކުރުމަކީ މެމްބަރުންނަށް އޮންނަ އިތުބާރު ބޮޑުތަނުން ބޮޑުވާނެ ޤާނޫނެއް ކަމަށެވެ. އެހެންކަމުން އެ ފަދަ ޤާނޫނެއް ވީހާވެސް އަވަހަށް ވުޖޫދު ކުރަން ޖެހޭ ކަމަށް އޭނާ ވިދާޅުވިއެވެ.
މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވަނީ މި ބިލަށް ކޮމިޓީ މަރުހަލާގައި ބަދަލުތަކެއް ގެންނަން ޖެހޭ ކަމަށް ވިދާޅުވެފައެވެ. އަދި ރާއްޖޭގެ ހުރިހާ މުއައްސާއެއްގައި ކޮރަޕްޝަން ވަދެފައިވާ ކަމަށާއި އެކަމާއި މެދު ޖަވާބުދާރީވާން އޮތް މަޖިލިސް ކޮރަޕްޓް ވެއްޖެ ނަމަ އެއީ ބިރުވެރިކަމެއް ކަމަށް އިމްތިޔާޒް ވަނީ ވިދާޅުވެފައެވެ. އަދި މުހިންމު ވޯޓުތަކާއި ދިމާކޮށް ފައިސާގެ ނުރަނގަޅު މުއާމަލާތްތައް ހިންގާ ރިޝްވަތު ނަގާކަމަށް އޭނާ ވަނީ ވިދާޅުވެފައެވެ. މީގެ އިތުރުން ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވަނީ މެމްބަރުން ޕާޓީ ބަދަލުކުރުމަކީ ނިޒާމަށް އޮންނަ އިތުބާރު ގެއްލޭ ކަމެއް ކަމަށް ފާހަގަކުރައްވާފައެެވެ. އެއީ ރޭވިގެން ވޯޓުލާ މިހުންގެ އަދަދު މަދު ކުރަން ކުރަމުންދާ ކަމެއް ކަމަށް އޭނާ ވަނީ ވިދާޅުވެފައެވެ.
މީގެ އިތުރުން އެ ބިލަށް ވާހަކަދެއްކި އެހެން މެމްބަރުން ވެސް މިފަދަ ބިލެއްގެ މުހިންމުކަން ވަނީ ފާހަގަކުރައްވާފައެވެ.
