ރަމަޟާން މަހާ ދިމާކޮށް ވިޔަފާރިވެރިން އެއް ފަހަރުން މުއްސަނދިވެލުން... ދުނިޔޭގެ ހުރިހާ ހިސާބެއްގެވެސް އާދަ؟

ކުރިއަށް އޮތީ ބަރަކާތްތެރި ރަމަޟާން މަހުގެ ދުވަސްތަކެވެ. ދިރިއުޅުމުގެ އާދަކާދައަށް ބަދަލުތަކެއް އަންނަ ދުވަސްވަރެކެވެ. ވަކިން ޚާއްޞަކޮށް، ކެއިންބުމުގެ އާދަތަކަށް އަންނަ މި ބޮޑު ބަދަލާ ދިމާކޮށް، ބާޒާރުތަކުގައި ކާބޯތަކެތީގެ އަގުތައް އިންތިހާއަށް އުފުލުމަކީ ދުނިޔޭގެ އެކި ހިސާބުތަކުގައި ކުރަމުން އަންނަ ކަމެކެވެ. މީލާދީ ކަލަންޑަރުން، އަހަރުގެ ކޮންމެ ފަދަ ދުވަސްވަރަކާ ރަމަޟާން މަސް ދިމާވި ކަމުގައި ވީ ނަމަވެސް، އެކަން އެކަން އޮންނަނީ އެހެންނެވެ. މިފަދަ މާތް މައްސަރަކާ ދިމާކޮށް، ވިޔަފާރިވެރިންގެ ތެރެއިން ބަޔަކު ހިންގާ ޖަރީމާގެ ހުރިހާ ތަކުލީފެއް އުފުލަން ޖެހިފައި އޮންނަނީ ނިކަމެތީންނަށެވެ.

އަހަރެމެން ދިވެހިންގެ ތެރޭގައި ދިރިއުޅެމުންދާ ބިދޭސީންގެ އެންމެ ބޮޑު އިންސައްތައެއް އެ ޤައުމަކަށް ނިސްބަތްވާ ބަންގްލަދޭޝްގެ ޙާލުވެސް ހުރީ ހަމަ އެ ކަހަލަ ގޮތަކަށެވެ. ރަމަޟާން މަހާ ގާތް ވަމުންދާ ވަރަކަށް، ޢާންމު ދިރިއުޅުމުގެ ޟަރޫރީ ބޭނުންތަކަށް ކޮންމެހެން ހޯދަން ޖެހޭ ސާމާނުގެ އަގުތައް އުފުލެމުން ދަނީ ފަތުއަޑުކިޔާފައެވެ. އަތް ނުފޯރާ ހިސާބަށެވެ. ބަންގްލަދޭޝްގެ ހުރިހާ ހިސާބަކަށްވެސް މި މައްސަލަ ވަނީ ކުރިމަތިވެފައެވެ. ޢާންމު، ރައްޔިތު މީހާގެ ދިރިއުޅުން އޮތީ ތަކުލީފަކަށް ވެފައެވެ.

ބަންގްލަދޭޝްގެ ވެރިކަން ކުރާ ޑާކާގެ އެންމެ ބޮޑެތި ބާޒާރުތަކުގެ ތެރޭގައި ގުނާލެވޭ ކަވްރާން ބާޒާރުގައި ވިޔަފާރި ހިންގާ މީހުންގެ ވާހަކަތަކަށް ބަލާއިރު، ޢާންމު ދިރިއުޅުމުގައި ކެއްކުމަށް ބޭނުން ކުރާ އެންމެ އަސާސީ ތަކެތީގެ އަގުތައް މިހާރުވެސް ވަނީ އުފުލިފައެވެ. އޭގެ ތެރޭގައި މުގުގެ ބާވަތްތަކާއި، ފިޔާ އަދި ކުކިންގް އޮއިލްވެސް ހިމެނެއެވެ. މި ބާވަތްބާވަތުގެ އުފެއްދުންތަކުގެ އަގު މިހާރު އުޅެނީ، މިދިޔަ ފެބުރުއަރީ މަހާ އަޅާ ބަލާއިރުވެސް 30 އާއި 40 ޕަސެންޓާ ދެމެދު މިންވަރެއް ބޮޑުކޮށެވެ. އަގުތައް އިންތިހާއަށް އުފުލިފައިވާ ބައެއް ބާވަތްތަކަށް ބަލާއިރު، ރަމަޟާން މަހާ ޚާއްޞަ ގޮތެއްގައި ގުޅިފައި އޮންނަ، މެދުއިރުމަތިން އިމްޕޯޓް ކުރާ ކަދުރުގެ އަގުތައްވެސް އިންތިހާއަށް ބޮޑުވެފައި ވާ ކަން ފާހަގަ ކުރަން ޖެހެއެވެ.

އުފުލެމުންދާ އަގުތަކުގެ ސަބަބުން މިހާރުވެސް ހަނާވަމުން ދާ އެކަކީ ދުވަހު އުޖޫރައަށް ލޭބަރެއްގެ ގޮތުގައި މަސައްކަތް ކުރާ މުޙައްމަދު އަބޫއެވެ.

ބަންގްލަދޭޝްގެ ތަފާސް ހިސާބުތަކާ ބެހޭ ބިއުރޯގެ ރެކޯޑްތަކުން ދައްކާ ގޮތުގައި 2024 ވަނަ އަހަރުގެ ޖެނުއަރީ މަހުގެ އަހަރީ އިންފްލޭޝަން ރޭޓް އޭގެ ކުރީ އަހަރާ އަޅާބަލާއިރު 9.86 ޕަސެންޓަށް ވަނީ އިތުރުވެފައެވެ. ޑިސެމްބަރ 2023 އަށް ވުރެ މަތިވެފައި ވަނީ 9.41 ޕަސެންޓްއެވެ.

ކަވްރާން ބާޒާރުގައި ވިޔަފާރި ހިންގާ ފަރާތްތަކުން ބުނާ ގޮތުގައި، ކުއްލިއަކަށް އަގުތައް އުފުލެމުން ދަނީ ހޯލްސޭލް ސަޕްލަޔަރުންގެ ސަބަބުންނެވެ. ނަޢަމްސޫފީގެ ވިޔަފާރި ކުރާ މިންތު ބިޕާރީ އުންމީދު ކޮށްގެން ހުރީ، ރަމަޟާން މަސް ފެށެން ވާ އިރަށް، އަގުތައް ތިރި ވާނެ ކަމަށެވެ. ނަޢަމްސޫފީގެ އަގުތައް އުފުލެން ފެށިތާ މިހާރުވެސް 2 ހަފުތާވެއްޖެއެވެ.

މި ކަންކަމަކީ ބަންގްލަދޭޝްގެ ޢާންމު ރައްޔިތުންނަށް ބަރުދާސްތު ކުރަން ދަތި، ޙަޖަމްވެސް ކުރަން ދަތި ޙަޤީޤަތަކަށް އޮތީ ވެފައެވެ.

170 މިލިއަން މީހުންގެ ޢާބާދީއެއް އޮތް ބަންގްލަދޭޝްގައި ހަކަތައާއި ކާބޯތަކެތީގެ އަގުތައް އިންތިހާއަށް އުފުލި، އިންފްލޭޝަން ރޭޓް އުފުލުމުގެ ތަކުލީފުތަކާ ކުރިމަތިލާން ޖެހިފައި ވާ އިރު، ބަންގްލަދޭޝް ފައިސާގެ އަގުވެސް ދަނީ ވެއްޓެމުންނެވެ. މި ކަންކަމަކީ، ބަންގްލަދޭޝްގެ ބޮޑުވަޒީރު، ޝައިޚް ހަސީނާގެ ސަރުކާރަށް މިއަދު ކުރިމަތިލާން ޖެހިފައި އޮތް ބޮޑު ބޮލުގެ ރިހުމެކެވެ.