ވަޒީފާގެ ހައްގުތަކަށް އަރައިގަންނައިރު، ސިވިލް ސަރވިސް ކޮމިޝަނާއި ވަޒީފާއާބެހޭ ޓްރައިބިއުނަލުން ފާރަވެރިވާންޖެހޭ - ޝާހިދު
10 މާރިޗު 2024 | އާދީއްތަ 14:48އެމްޑީޕީގެ ކެމްޕޭނުގައި އުޅޭތީ ވަޒީފާއިން ޑިމޯޓްކޮށްފައިވާ ފަރާތްތަކާއި، ކެމްޕޭނުގައި އުޅޭނަމަ ކަނޑައިލާނެކަމުގެ އިންޒާރު ދީފައިވާ ބައެއް ފަރާތްތަކާ ދިމާވި
އެމްޑީޕީގެ ރައީސް އަބްދުﷲ ޝާހިދު
ސަރުކާރުން ވަޒީފާގެ ހައްގުތަކަށް އަރައިގަންނައިރު ސިވިލް ސަރވިސް ކޮމިޝަނާއި ވަޒީފާއާބެހޭ ޓްރައިބިއުނަލުން ފާރަވެރިވާންޖެހޭ ކަމަށް، އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ ހުވަދު އަތޮޅު ދެކުނު ބުރީގެ ރަށްތަކުގައި ކުރިއަށްގެންދާ، އެމްޑީޕީގެ ރައްޔިތުންގެ މަޖިލިސް އިންތިޚާބުގެ ކެމްޕޭން "މިސްރާބު ހަމަމަގަށް" ކެމްޕޭނުގައި ވާހަކަފުޅުދައްކަވަމުންނެވެ. ޝާހިދު ވަނީ ގާނޫނީ ވެރިކަން ނަގަހައްޓައި، ސިޔާސީ ޚިޔާލު ތަފާތުވާ ފަރާތްތައް ސަރުކާރުންނާއި ސަރުކާރު ހިއްސާވާ ކުންފުނިތަކުން ވަޒީފާއިން ވަކިކުރުން ހުއްޓާލުމަށް ގޮވާލައްވާކަމަށެވެ. ޝާހިދު ވިދާޅުވީ ވަޒީފާގެ ބިރުދެއްކުން ހުއްޓުވައި، ސަރުކާރު ޖަވާބުދާރީ ކުރެވޭނީ އެމްޑީޕީ މަޖިލީހުގެ މެޖޯރިޓީއާއެކު އިދިކޮޅުގައި މިވަގުތު އޮވެގެން ކަމަށެވެ.
މީގެ އިތުރުން ޝާހިދު ވަނީ ވަޒީފާގެ ބިރު ދެއްކުން ހުއްޓައިލުމަށް ގޮވާލައްވާފައެވެ. އަދި އެކަންކަން ހުއްޓުވަން ކުރަންޖެހޭ ކަންކަން ކުރުމަށް އިދާރާތަކަށް ގޮވާލެއްވިއެވެ. ހުވަދު އަތޮޅުން ކެމްޕޭންތެރޭގައި ދިމާވި ބައެއް ފަރާތްތަކުން، އެފަރާތްތަކަށް ދައްކާފައިވާ ވަޒީފާގެ ބިރުގެ ވާހަކަ އެމަނިކުފާނާ ހިއްސާކުރިކަމަށް ޝާހިދު ވިދާޅުވިއެވެ. އެގޮތުން އެމްޑީޕީގެ ކެމްޕޭނުގައި އުޅޭތީ ވަޒީފާއިން ޑިމޯޓްކޮށްފައިވާ ފަރާތްތަކާއި، ކެމްޕޭނުގައި އުޅޭނަމަ ކަނޑާލާނެކަމުގެ އިންޒާރު ދީފައިވާ ބައެއް ފަރާތްތަކާ ދިމާވިކަމަށް ވިދާޅުވިއެވެ.
