ގައުމުގެ މިސްރާބު ހަމަމަގަށް އަޅުވާނެ ބުއްދިއެއް ވެސް މިސަރުކާރުގެ ނެތް: އަމީރު

ގައުމުގެ މިސްރާބު ހަމަމަގަށް އަޅުވާނެ ބުއްދި ވެސް މިސަރުކާރުގެ ނެތް ކަމަށް ކުރީ ސަރުކާރުގެ ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.

އަމީރު މިހެން ވިދާޅުވީ ރައީސް މުއިއްޒު ޅ. ކުރެންދޫގައި ދެއްކެވި ވާހަކަފުޅުތަކާއި ގުޅިގެންނެވެ. ރައީސް މުއިއްޒު ވިދާޅުވީ އެމަނިކުފާނާއި ސަރުކާރުގެ ވެރިން "ތެދު ބަހުން" ވާހަކަ ދެއްކެވި ނަމަވެސް އެހެން މީހުން އޭގެ ޖަވާބުގައި ހަދަނީ "ހުސް ދޮގު" ކަމަށެވެ. އަދި އެމަނިކުފާނު ބޭނުންފުޅުވަނީ ތެދު ބަހުން ދައްކާ ވާހަކަ ރައްޔިތުން ޚިޔާރު ކުރަން ކަމަށެވެ.

ރައީސް މުއިއްޒުގެ މި ވާހަކަފުޅުތަކަށް ރައްދުދެއްވައި އަމީރު ވިދާޅުވީ ވެރިކަމަށް ވަޑައިގެންނެވުމަށް ވެސް، މިހާރު ވެސް ތެދުނުހައްދަވާ ކަމަށާއި، މީހުންގެ ބޯކާލައިގެން މޮޔަ ހެއްދޭނެ ކަމަށް ބެއްލެވުމަކީ ގޯހެއް ކަމަށެވެ. އަދި ރައްޔިތުންނަށް ކަންކަން ވަރަށް ސާފު ކަމަށް އަމީރު ވިދާޅުވިއެވެ. މީގެ އިތުރުން އަމީރު ވިދާޅުވީ މިހާރު ދިމާވެފައިވާ ގޮންޖެހުންތަކުން އަރައިގަނެ ގައުމުގެ މިސްރާބު ހަމަމަގަށް އަޅުވާނެ ބުއްދިއެއް ވެސް ނެތް ކަމަށެވެ.

ބައެއް މީހުން ދޮގު ހަދާ ކަމަށް ރައީސް މުއިއްޒު ތުހުމަތު ކުރެއްވިއިރު، މިސަރުކާރުން ފާޅުކަން ބޮޑު ގޮތެއްގައި ރައްޔިތުންނަށް އޮޅުވާލާ ދޮގު ހަދަމުންދާ ކަމަށް އިދިކޮޅު ސިޔާސީ ގިނަ ބޭފުޅުން ދަނީ ވިދާޅުވަމުންނެވެ.

ރައީސް މުއިއްޒު ވެރިކަމަށް ވަޑައިގެންނެވުމުގެ ގޮތުން ވެވަޑައިގެންނެވި އެންމެ ބޮޑެތި ވައުދުފުޅު ނުފުއްދަވާ ކަމަށާއި، ކުރީ ސަރުކާރާ ގުޅޭގޮތުން ގިނަ ދޮގުތަކެއް ހައްދަވާފައިވާ ކަމަށް ވެސް އިދިކޮޅު ފަރާތްތަކުން ދަނީ ބުނަމުންނެވެ.

އެގޮތުން ކުރީގެ ރައީސް އަބްދުﷲ ޔާމީން މިނިވަން ކުރެއްވުމާއި އިންޑިއާ ސިފައިން ބޭލުމާއި ރާއްޖޭގެ ކަނޑު ސަރަހައްދުން ގެއްލުނު ކަމަށް ބުނާ ސަރަހައްދު ހޯދުމާއި ގުޅޭގޮތުންނާއި ޑޮލަރު ރޭޓް ދަށްކޮށް، ލިމިޓް އުވާލުމާއި، މަސްވެރިންނަށް ފައިސާ ދިނުމާއި ގުޅޭގޮތުން މިސަރުކާރުން ދޮގުހަދައި ރައްޔިތުންނަށް އޮޅުވާލުމަށް މަސައްކަތް ކުރަމުންދާ ކަމަށް އިދިކޮޅު ފަރާތްތަކުން ބުނެއެވެ.