ފްލެޓު މައްސަލައިގައި މިނިސްްޓްރީ: ހަފްތާ 14 ގެ މަގުޗާޓުގައި ހިމެނޭ ކަމަކަށްނުވާތީ ޖަވާބު އަރުވާކަށް ނެތިން!
9 މާރިޗު 2024 | ހޮނިހިރު 09:22ފްލެޓުތަކުގެ މައްސަލައިގެ ހައްސާސްކަމާއި، ރައްޔިތުން އެކަމަށް ފެންބޮވައިގެންފައިވާ މިންވަރު ސަރުކާރަށް ވަޒަން ނުކުރެވޭ
މިދިޔަ ސަރުކާރުން ފެށި ގެދޮރުވެރިޔާ ފްލެޓްތައް
ގޯތި އަދި ފްލެޓް ލިބޭނެކަމަށް ފައިނަލް ލިސްޓުގައި ހިމެނި ގެޒެޓްކޮށްފައިވާ ފަރާތްތަކަށް ރަޖިސްޓްރީ ހަދައިދީ ގޯއްޗާއި ފްލެޓް، ވެވަޑައިގެންނެވި ވައުދުފުޅާ އެއްގޮތަށް ކުރިއަށްދާނެކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވަނީ ވިދާޅުވެފައެވެ.
އެއީ ރައީސް ޑރ މުޙައްމަދު މުއިއްޒު ރައްޔިތުންނަށް ވެވަޑައިގެންނެވި ވައުދުފުޅެކެވެ. ފްލެޓު ލިބޭނެކަމާމެދު މާޔޫސްވެ ސުވާލު އުފެދިފައިވާ އެތައް ރައްޔިތުންނަކަށް އަނެއްކާވެސް އުއްމީދު އައުވެގެން ދިޔަ ބަސްފުޅެކެވެ.
އެހެންނަމަވެސް، އޭގެ ފަހުން މިހާ ދުވަސްވެ، މި ވެރިކަމަށް 3 މަސް ފުރިގެންދިޔައިރު، ރައީސް އެ ވިދާޅުވި ބަސްފުޅެކޭ ކަނޑުގައި އަޅާފައިވާ ރޮނގެކޭ ތަފާތެއް ނެތެވެ. އެ ބަސްފުޅުން ނުކުތް ނަތީޖާއެއް ނެތެވެ.
އޭރުވެސް އެތައް ބަޔަކު ބުނަމުންދިޔައީ ފްލެޓުތައް ދޫކުރާނީ މަޖިލިސް އިންތިޚާބާ ކައިރިކޮށްފައި ކަމަށެވެ. ރައީސްގެ އެ ބަސްފުޅަކީ ސިލްސިލާކޮށް ހައުސިންގ މިނިސްޓްރީއާއި އޭސީސީ ދޮށަށް އެއްވެ، ޙައްޤު ހޯދުމަށް އާދޭސް ކުރަމުންދިޔަ ރައްޔިތުންނަށް ދިން ވަގުތީ ތަސައްލީއެއް ކަމަށެވެ. އާޚިރުގައި ކަން ވެގެންވެސް މިދަނީ އެހެނެއް ނޫންތޯއެވެ؟
އެކި ބަހަނާތައް ދައްކައި ފްލެޓު ދޫކުރުން ލަސްކުރަމުންގޮސް، މަޖިލިސް އިންތިޚާބު ބޯމަތިވަނީއެވެ. އެންމެ ފަހުން ރައްޔިތުން އުއްމީދުކޮށްގެން ތިބީ ހަފްތާ 14 ގެ އަދާހަމަ މައުލޫމާތުތައް ދިނުމަށް ސަރުކާރުން ބާއްވަމުން ދިޔަ ނޫސްވެރިންގެ ބައްދަލުވުމުން، ފްލެޓުތަކުގެ މައްސަލައިގެ ކޮންމެވެސް މިންވަރެއްގެ މައުލޫމާތެއް ނަމަވެސް ލިބޭނެ ކަމަށެވެ.
އެ އުއްމީދުގައި އެތައް ބަޔަކު ހައުސިންގ މިނިސްޓްރީން ބޭއްވި ނޫސްވެރިންގެ ބައްދަލުވުން ބަލަން ޓީވީ ދޮށުގައިވެސް ތިއްބެވެ.
އެހެންނަމަވެސް، ހަފްތާ 14 ގެ ނޫސްވެރިންގެ ބައްދަލުވުމުން ސާފުވެގެން ދިޔަ ކަމަކީ، ފްލެޓުތަކުގެ މައްސަލައިގެ ހައްސާސްކަމާއި، ރައްޔިތުން އެކަމަށް ފެންބޮވައިގެންފައިވާ މިންވަރު ސަރުކާރަށް ވަޒަން ނުކުރެވޭ ކަމަށެވެ.
ނޫސްވެރިންގެ ބައްދަލުވުމުގައި އަލިއަޅުވާލަން ހުރި ކަންކަން ނިމިގެން ދިޔައިރުވެސް، ފްލެޓުތަކުގެ މައްސަލައިގެ މާ ބޮޑު ތަފްސީލެއް ރައްޔިތުންނަކަށް ސާފެއް ނުވިއެވެ. އެންމެ ފަހުން ނޫސްވެރިން އެ ސުވާލު ކުރުމުން ލިބުނީ އިތުރަށް މާޔޫސް ކުރުވަނިވި ޖަވާބެކެވެ.
ކޮންމެއަކަސް، ހަފްތާ 14 ގެ މަގުޗާޓުގައި ހިމެނޭ ކަމަކަށްނުވާތީ، ފްލެޓުތަކުގެ މައްސަލައިގެ ޖަވާބެއް ދެއްވާކަށް ނެތްކަމަށް ވަޒީރު މިވަނީ ވިދާޅުވެފައެވެ. ސުވާލަކީ، ފްލެޓުތަކުގެ މައްސަލައިގައި މާޔޫސްވެ، ވާނުވާ ނޭނގިފައި ތިބި ރައްޔިތުންނާމެދު މި ސަރުކާރުގެ ކުޑަވެސް ހަމްދަރުދީއެއް ނެތީތޯއެވެ؟
