ރޯދަ މަހާއި ދިމާކޮށް ގޭބިސީތަކަށް ހަދިޔާކުރާ ކާޑުގެ ބާވަތްތައް މާދަމާ ދޫކުރަން ފަށަނީ
މާލޭގެ 7 ސަރަހައްދަކުން ކާޑު ދޫކުރުމަށް ހަމަޖެހިފައިވޭ
އެސްޓީއޯ ކާޑު ގުދަނުން ކާޑުގެ ބާވަތްތައް ޑެލިވަރީ ކުރުމުގައި
ރޯދަ މަހާއި ދިމާކޮށް ސަރުކާރުން ކޮންމެ ގޭބިސީއަކަށް ހަދިޔާކުރާ ކާޑުގެ ބާވަތްތައް ހޮނިހިރު ދުވަހު ދޫކުރަން ފަށާނެ ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް ވިދާޅުވެއްޖެ އެވެ.
ބައެއް މީޑިއާތަކަށް މިނިސްޓަރު ވިދާޅުވީ ކާޑުގެ ބާވަތްތައް ހިފައިގެން މާލޭގެ ވިޔަފާރި ބަނދަރަށް މިމަހުގެ 5 ވަނަ ދުވަހު ބޯޓު ވަދެފައިވާ ކަމަށް އެސްޓީއޯއިން މައުލޫމާތު ދީފައިވާ ކަމަށެވެ. އެ ތަކެތި ހިފައިގެން ސަޕްލައި ދޯނިތައް ރަށްރަށަށް ފުރަން ފަށާފައިވާ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ ކާޑުގެ ބާވަތްތައް ބަލާ ދިއުމަށް، ކަމާގުޅޭ ފަރާތްތަކުން ގުޅާނެ ކަމަށާއި ހޮނިހިރު ދުވަހުގެ ކާޑުގެ ބާވަތްތައް ދޫކުރަން ފަށާނެ ކަމަށެވެ.
ގޭބީސިތަކަށް ކާޑުގެ ބާވަތްތައް ހަދިޔާކުރުމުގެ މަސައްކަތް ހަވާލުކޮށްފައިވަނީ އެސްޓީއޯއެވެ.
އެސްޓީއޯއިން މައުލޫމާތުދޭ ގޮތުގައި މާލެ ސަރަހައްދުގައި ހޮނިހިރު ދުވަހުން ފެށިގެން ކާޑުގެ ބާވަތްތައް ދޫކުރާއިރު، އަތޮޅުތަކުގެ ރަށްރަށުގެ ކައުންސިލްތަކުން އެ މަސައްކަތް ކުރަމުންދާނެ ކަމަށެވެ.
އެގޮތުން މާލެ ސަރަހައްދުގައި މުދާ ދޫކުރުމަށް ހަމަޖެހިފައިވަނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 10:00ން ހަވީރު 4:00 ޖެހުމާއި ހަމައަށެވެ. އަދި ރޭގަނޑު 8:30ން 11:00އަށެވެ. ރޯދަ މަހު ކާޑު ދޫކުރާނީ ހެނދުނު 9:30ން މެންދުރު 1:00ށް އަދި ރޭގަނޑު 9:00ން 11:30 އަށްކަމަށް ވެސް އެސްޓީއޯއިން ބުނެއެވެ.
މާލޭގެ 7 ސަރަހައްދަކުން ކާޑު ދޫކުރުމަށް ވަނީ ހަމަޖެހިފައެވެ. އެއީ މާލެ ސިޓީ ކައުންސިލްގެ އާއްމު ޚިދުމަތްތަކާއި ބެހޭ ބައިން، ސޯޝަލް ސެންޓަރު، ވިލިމާލޭ ބިއްރި މިސްކިތުގެ ހޯލް، ހުޅުމާލޭ ފުރަތަމަ ފިޔަވަހީގެ އުމަރު ޒާހިރު ބިލްޑިންގ އަދި ދެވަނަ ފިޔަވަހީގެ 10 ވަނަ ހިޔާ ފްލެޓުގެ ޔޫތު ސެންޓަރުންނެވެ.
ކާޑުގެ ބާވަތްތައް ދޫކުރާނީ ކަރަންޓު މީޓަރުގެ ނަންބަރަށް ބެލުމަށްފަހު ކާޑު ބަލާ އަންނަ ފަރާތުގެ ދިވެހި ރައްޔިތެއްކަން އަންގައިދޭ ކާޑު ނަންބަރު ނޯޓު ކުރުމަށްފަހު ކަމަށް އެސްޓީއޯއިން ބުނެއެވެ.
ސަރުކާރުން ބަހާ ކާޑު ދޫކުރުމަށް ހަމަޖެހިފައިވަނީ ހަމައެކަނި ދިވެހީންނަށެވެ.
މި ރޯދަ މަހު ކޮންމެ ގެއަކަށް ސަރުކާރުގެ ފަރާތުން 10 ކިލޯ ހަނޑޫ އަދި 10 ކިލޯ ފުށް ބަސްތާއެއް ހަދިޔާކުރާނެ ކަމަށް ރައީސް ޑރ.މުހައްމަދު މުއިއްޒު ވިދާޅުވީ ޗައިނާއަށް ކުރެއްވި ރަސްމީ ދަތުރުފުޅަށް ފަހު ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.
