ކިލޯއަކަށްވުރެ ގިނަ މަސްތުވާތަކެއްޗާއެކު ހައްޔަރުކުރި މީހަކު ޝަރީއަތް ނިމެންދެން ބަންދުކޮށްފި
8 މާރިޗު 2024 | ހުކުރު 07:53ގިނަ އަދަދެއްގެ މަސްތުވާތަކެއްޗާއެކު ހައްޔަރުކޮށްފައިވަނީ 35 އަހަރުގެ ދިވެއްސެއް
ފުލުހުން އަތުލައިގަނެފައިވާ މަސްތުވާތަކެތި - ފައިލް ފޮޓޯ:
ކިލޯއަކަށްވުރެ ގިނަ މަސްތުވާތަކެއްޗާއެކު ހައްޔަރުކުރި މީހަކު ޝަރީއަތް ނިމެންދެން ބަންދުކޮށްފިއެވެ.
ގިނަ އަދަދެއްގެ މަސްތުވާތަކެއްޗާއެކު ހައްޔަރުކޮށްފައިވަނީ 35 އަހަރުގެ ދިވެއްސެކެވެ. މި މީހާއަކީ ހައްޔަރު އަދި ބަންދު ރެކޯޑް އޮންނަ ފަރާތެކެވެ. މި މައްސަލައާއި ގުޅިގެން ތަހުގީގުގައި ވަކީލަކު އައްޔަންކޮށްފައިވީނަމަވެސް، ޝަރީއަތަށް އެ ވަކީލު ހާޒިރު ނުވާނެ ކަމަށާއި ޝަރީއަތުގެ މަޖިލީހުގައި ވާހަކަ ދައްކާނީ އަމިއްލައަށް ކަމަށް ބުނެފައިވެއެވެ.
މި މައްސަލައިގައި ފެނުނު މަސްތުވާތަކެތީގެ ޖުމުލަ ބަރުދަން 1 ކިލޯއަށްވުރެ ގިނަކަން ރިޕޯޓްތަކަށް ބެލުމުން އެނގެއެވެ. މީގެ އިތުރުން އޭނާއަކި އެއް ކިޑްނީ ނަގާފައިވާ މީހެއްކަމަށް ފާހަގަކޮށްފައިވާތީ، އޭނާގެ ހާލަތަށް ބަލައި ފަރުވާ ދޭންޖެހޭނަމަ އިންތިޒާމް ހަމަޖެއްސުމަށް މައްސަލަ ބައްލަވާ ގާޒީ ވަނީ އަންގަވާފައެވެ.
ހެކީގެ ނިސްބަތަށް ބަލާއިރު، ތުހުމަތުކުރެވޭ ކުށް، އޭނާ ކުރިކަމަށް އެކަށީގެންވާ ހެކި ހުށަހަޅާފައިވެއެވެ. އެގޮތުން އޭނާގެ މައްޗަށް މަސްތުވާތަކެތި ޓްރެފިކް ކުރުމުގައި ބައިވެރިވުމުގެ ދައުވާ ހުށަހަޅާފައިވީނަމަވެސް، މައްސަލަ އަދި އޮތީ ރަޖިސްޓްރޭޝަން މަރުހަލާގައެވެ.
އެނާ ބަންދުގައި ބަހައްޓަންޖެހޭ ހާލަތެއް އޮތްކަމަށް ބުނެފައިވަނީ ގާނޫނު އަސާސީގެ 49 ވަނަ މާއްދާއާއި، ޖިނާއީ އިޖުރާއަތުގެ ގާނޫނުގެ 59 ވަނަ މާއްދާ އަދި 60 ވަނަ މާއްދާއަށް ރިއާޔަތްކޮށް މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެކަމަށް ފެންނަކަމަށް ބުނެފަައިވެއެވެ.
އަދި ބަންދުގައި ބަހައްޓަންޖެހޭ ހާލަތެއް އޮތްކަމަށް ދެކޭ ސަބަބެއްގެ ގޮތުގައި ބުނެފައިވަނީ ޝަރީއަތްކުރުމާއި ބެހޭ ޖިނާއީ އިޖުރާއަތު ގަވާއިދުގެ 13 ވަނަ މާއްދާގެ (ނ) ގެ 1، 3 އަދި 4 ގައިވާ ކަންކަން ފުރިހަމަވާ ކަމަށް ބެލެވޭތީ ކަމަށް ކްރިމިނަލް ކޯޓުގެ އަމުރުގައިވެއެވެ.
