މަސްތުވާތަކެތި ގެންގުޅެ އެތަކެތީގެ ވިޔަފާރި ކުރި ދެމީހަކު ބަންދުކޮށްފިއެވެ.
މަސްތުވާތަކެތި ގެންގުޅެ އެތަކެތީގެ ވިޔަފާރި ކުރި މައްސަލައިގައި ބަންދުކޮށްފައިވަނީ 26 އަހަރުގެ އަންހެނަކާއި 30 އަހަރުގެ ފިރިހެނެވެ. މި ދެމީހުންނަކީ ވެސް ދެ ދިވެހިންނެވެ.
މި މައްސަލައަކީ މަސްތުވާތަކެތި ގެންގުޅެ އެތަކެތީގެ ވިޔާފާރިކުރާކަމުގެ ތުހުމަތުކުރެވޭ މައްސަލައެކެވެ. މި މައްސަލައިގައި ބުނެފައިވަނީ ތުހުމަތުކުރެވޭ ކުށް މި ދެމީހުް ކުރިކަމަށް ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށެވެ. އެގޮތުން ސީނަށް ދިޔަ ފުލުހުންގެ ބަޔާނާއި އިތުރު ހެކި ހުށަހަޅާފައިވާ ކަމަށެވެ.
ބަންދުގައި ބަހައްޓަންޖެހޭ ހާލަތެއްގެ ގޮތުގައި ބުނެފައިވަނީ ގާނޫނު އަސާސީގެ 49 ވަނަ މާއްދާއާއި، ޖިނާއީ އިޖުރާއަތުގެ ގާނޫނުގެ 59 އަދި 60 ވަނަ މާއްދާއަށް ރިއާޔަތްކޮށް މުޖުތަމައުގެ ސަލާމަށް ނުރައްކަލެއް ކުރިމަތިވެދާނެ ކަމަށް ފެންނާތީއެވެ. އަދި ޝަރިއަތްކުރުމާއި ބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ (ނ) ގެ 1 އަދި 3 ގައިވާ ކަންކަން ފުރިހަމަވާ ކަމަށް ބަންދުގައި ބަހައްޓަންޖެހޭ ހާލަތް އޮތްކަމަށް ދެކޭ ސަބަބުގެ ގޮތުގައި ވަނީ ފާހަގަކޮށްފައެވެ.
މީގެ އިތުރުން ފާހާނާ ތައްޓަށް އަޅައި މަސްތުވާތަކެތި ނައްތާލަން މަސައްކަތްކޮށްފައިވާކަމަށް ފޮޓޯތަކުން ފެންނަ ކަމަށް އައިއޯ ފާހަގުރިނަމަވެސް އެކަމަށް ބާރުދޭ ހެއްކެ (ފޮޓޯއެއް ނުވަތަ ސީނަށް ދިޔަ ފުލުހުންގެ ބަޔާނުގައި އެފަދަ ވާހަކައެއް ނެތް) ޝަރީއަތްކުރާ މަޖިލީހަށް ހުށަހެޅިފައި ނެތެވެ.
މި ދެމީހުންނަންވެސް ދީފައިވަނީ 15 ދުވަހުގެ ބަންދުގެ މުއްދަތެކެވެ. އަދި ބަންދުކުރަން ކްރިމިނަލް ކޯޓުން އަމުރުކޮށްފައިވަނީ ކަސްޓޯޑިއަލް ޖަލެއްގައެވެ.
