ޓެކްސް ނުދައްކާ މައްސަލައެއްގައ އަންޗެލޮޓީ ޖަލަށް ލުމަށް އެދިއްޖެ

ރެއާލް މެޑްރިޑުގެ ކޯޗު ކާލޯ އަންޗެލޮޓީ، ޓެކްސް ނުދައްކާ އޮތް މައްސަލައެއްގައި އޭނާގެ މައްޗަށް ޖަލު ޙުކުމެއް އިއްވައި ދިނުމަށް ސްޕެއިންގެ ޕްރޮސެކިއުޓަރަކު އެދިއްޖެ އެވެ.

އަންޗެލޮޓީގެ މައްޗަށް ކޮށްފައިވާ ތުހުމަތަކީ އެންމެ ފުރަތަމަ ރެއާލްގެ ކޯޗުކަމުގަައި އޭނާ ހުރި ދުވަސްވަރު، އިމޭޖް ރައިޓްސް އާމްދަނީން ޓެކްސް ނުދައްކާ އޮތް ކަމުގެ ތުހަމަތެކެވެ. އެގޮތުން 2014 ވަނަ އަހަރުން ފެށިގެން، 2015 ވަނަ އަހަރާ ހަމައަށް، އަންޗެލޮޓީ އެއް މިލިއަން ޔޫރޯ ނުވަތަ 1.1 މިލިއަން ޑޮލަރު ނުދައްކާ އޮތް ކަމަށް ވަނީ ބުނެފަ އެވެ. އެހެންކަމުން އޭނާގެ މައްޗަށް ހަތަރު އަހަރާއި، ނުވަ މަސް ދުވަހުގެ ޖަލު ޙުކުމެއް އިއްވައި ދިނުމަށް ވެސް ޕްރޮސެކިއުޓަރު ވަނީ އެދިފަ އެވެ.

ޕްރޮސެކިއުޓަރުގެ ފަރާތުން ބުދަ ދުވަހު ނެރުނު ބަޔާނެއްގައި ބުނެފައި ވަނީ، އިޓަލީ އަށް ނިސްބްތާ އަންޗެލޮޓީ ސްޕެއިންގައި ދިރިއުޅެމުން އައި ދުވަސްވަރު ޓެކްސް ބަޔާން ހުށަހެޅި ނަމަވެސް، އޭނާގެ އިމޭޖް ރައިޓްސް މެދުވެރިކޮށް ލިބުނު އާމްދަނީ އުނިކޮށްފައިވާ ކަމަށެވެ. ނަމަވެސް އެކަމާ ގުޅޭ ގޮތުން އަންޗެލޮޓީ ވަކި އެއްޗެއް ބުނެފައި ނުވާއިރު، އޭނާގެ ބަހެއް ލިބިފައި ނެތް ކަމަށް ވެސް މީޑިއާ ތަކުން ވަނީ ބުނެފަ އެވެ.

މީގެ ކުރިން އަންޗެލޮޓީ ފިޔަވައި، ސްޕެއިންގައި ދިރިއުޅުނު ބައެއް އެހެން ފުޓުބޯޅަ ޝަޚުސިއްޔަތުތަކުން ވެސް ޓެކްސް އަށް މަކަރު ހެދި ކަމަށް ބުނާ މައްސަލަ ސްޕެއިންގެ އިދާާރާތަކުން ވަނީ ބަލައި ތަހުގީގު ކޮށްފަ އެވެ. އޭގެ ތެރެއިން ބައެއް ފަރާތްތައް އެ މައްސަލަތަކުން ސަލާމަތްވެފައި ވަނީ ބޮޑު ޖޫރިމަނާއަކުންނެވެ.