ސްޕެއިންގެ ރެއާލް މެޑްރިޑަށް ކުޅެމުން އަންނަ އިންގްލެންޑުގެ ޒުވާން ކުޅުންތެރިޔާ، ދެ މެޗަށް ސަސްޕެންޑު ކުރުމަށް ސްޕެނިޝް ލީގުން ނިންމައިފި އެވެ.

ރެއާލްގައި މޮޅު ކުޅުމެއް ދައްކަމުން އަންނަ ބެލިންހަމް ސަސްޕެންޑު ކުރުމަށް ސްޕެނިޝް ލީގުން ނިންމީ، ލީގުގައި އެންމެ ފަހުން ވެލެންސިއާއާ ދެކޮޅަށް ރެއާލުން ކުޅުނު މެޗުގައި އޭނާ އަށް ދެއްކި ރަތް ކާޑުގެ މައްސަލައިގަ އެވެ.

ވެލެންސިއާއާ ދެކޮޅަށް ރެއާލުން ކުޅުނު މެޗުގެ އެންމެ ފަހު ވަގުތު ރެފްރީ ވަނީ ބެލިންހަމަށް ރަތް ކާޑު ދައްކައިފަ އެވެ. މެޗުގެ ފަހު ވަގުތު ބެލިންހަމް ލަނޑު ޖެހުމުގެ ކުރިން ރެފްރީ ވަނީ ފަހު ކަށިގަނޑު ފުމެލައިފަ އެވެ. އެކަމާ ބެލިންހަމް އަދި ރެއާލްގެ ކުޅުންތެރިން ވަނީ ހިތްހަމަ ނުޖެހުން ފާޅުކޮށް، ދެކޮޅު ހަދައިފަ އެވެ. އެކަމުގެ ތެރެއިން ރެފްރީ ވަނީ ބެލިންހަމަށް ރަތް ކާޑު ދައްކައިފަ އެވެ. އެއީ އޭނާ ރެފްރީ އަށް ނިސްބަތްވާ ގޮތަށް ހަޑި ހުތުރު ބަސްތައް ބޭނުން ކުރި ކަމަށް ބުނެ އެވެ.

އެ މައްސަލަ ބެލުމަށްފަހު ސްޕެނިޝް ލީގުން ބެލިންހަމް ސަސްޕެންޑު ކޮށްފައިވާއިރު، އޭނާ އަކީ މި ސީޒަންގެ ސްޕެނިޝް ލީގުގައި މިހާތަނަށް އެންމެ ގިނަ ލަނޑު ޖަހާފައިވާ ކުޅުންތެރިޔާ އެވެ. ސަސްޕެންޝަނާއެކު ބެލިންހަމަށް ގެއްލޭނީ މި މަހުގެ 10 ވަނަ ދުވަހު އަމިއްލަ ދަނޑުގައި ރެއާލުން ސެލްޓަ ވީގޯއާ ދެކޮޅަށް ކުޅޭ މެޗު އަދި، މި މަހުގެ 16 ވަނަ ދުވަހު އޮސަސޫނާއާ ދެކޮޅަށް ކުޅޭ މެޗެވެ.

ސްޕެނިޝް ލީގު ތާވަލްގެ އެއް ވަނައިގައި އޮތް ނަމަވެސް، ބެލިންހަމް ސަސްޕެންޑު ކުރުމަކީ އެ ޓީމަށް މިވަގުތު ކުރިމަތިވާނެ އުނދަގުލަކަށް ވާނެ އެވެ. މި ސީޒަންގައި އޭނާ ވަނީ ރެއާލަށް 30 މެޗު ކުޅެދީ 20 ލަނޑު ޖަހައިފަ އެވެ. އޭގެ ތެރެއިން 16 ލަނޑަކީ ސްޕެނިޝް ލީގުގައި އޭނާ ޖަހާފައިވާ ލަނޑުތަކެވެ.