ބާސެލޯނާގެ ހަގީގީ ހާލަތު ތެދަށް ބުނެދޭން ޖެހިއްޖެ: ޕީކޭ

ބާސެލޯނާގެ ހަގީގާ ހާލަތު ކުލަބުގެ މެންބަރުންނަށް ކިޔައިދޭންވެއްޖެ ކަމަށް އެ ޓީމުގެ ކުރީގެ ޑިފެންޑަރު ޖެރާޑް ޕީކޭ ބުނެފި އެވެ.

އޭނާ މި ކަމަށް ގޮވާލީ ސްޕެނިޝް ލީގުން ބާސެލޯނާގެ މާލީ ހާލަތަށް ބަލައި އެކުލަބުގެ މާލީ ލިމިޓް ކުޑަކުރުމާ ގުޅިގެންނެވެ. ސްޕެނިޝް ލީގުން މިހާރު ދީފައިވަނީ 200 މިލިއަން ޔޫރޯގެ ހަރަދުކުރެވޭނެ ލިމިޓެކެވެ. މީގެ ސަބަބުން އަންނަ ސީޒަނަށް ބާސެލޯނާއަށް އަލަށް ކުޅުންތެރިއަކު ގެންނަން ދަތިވާނެ އެވެ. އަދި މިހާރު ތިބި ކުޅުންތެރިންގެ ތެރެއިން އެއްވެސް ކުޅުންތެރިއެއްގެ ކޮންޓްރެކްޓް އައު ކުރުމަށް ވެސް ދަތިވާނެ އެވެ.

ނަމަވެސް ކުލަބުގެ ރައީސް ހުއާން ލަޕޯޓާ ވިދާޅުވަނީ މާލީ ދަތިތައް ހުއްޓަސް ކުޅުންތެރިން ގެނެސް ޓީމު ވަރުގަދަ ކުރުމަށް ހުރަހެއް ނެތް ކަމަށެވެ.

2022 ވަނަ އަހަރު ކުޅުން ހުއްޓާލި ޑިފެންޑަރު ބުނީ ބާސެލޯނާއިން މިހާރު ފެންނަ ހަމައެކަނި ޕޮޒިޓިވް ކަމަކީ ޒުވާން ކުޅުންތެރިންތަކެއް މޮޅަށް ކުޅުން ކަމަށެވެ.

ކުރީގެ މެނޭޖްމަންޓުން އަމަލުކުރި ގޮތުން ލަޕޯޓާ ހަވާލުވިއިރު ބާސެލޯނާ އޮތީ މާލީ އަނދަވަޅެއްގަ އެވެ. މިހެންވެ ކުލަބުގެ ގިނަ ތަރިން ދޫކޮށްލަންޖެހުނުއިރު އަދިވެސް މާލީ ހާލަތު ރަނގަޅެއްނުވެ އެވެ.