ސެކިއުރިޓީ ވަރުގަދަކޮށް، ލިވަޕޫލަށްދާން ސިޓީ ދަތުރުކުރާ މަގު ބަދަލުކުރަނީ

ލިވަޕޫލާއި މެންޗެސްޓާ ސިޓީ އަންނަ އާދީއްތަ ދުވަހުގެ ރޭ ކުޅޭ މެޗުގެ ސެކިއުރިޓީ ވަރުގަދަކޮށްފި އެވެ.

އިނގިރޭސި ފުލުހުން މި ގޮތަށް ހެދީ މި މެޗުގެ ކުރިން ހިނގާފާނެ ކަމަށް ބެލެވޭ ނޭދެވޭ ކަންތައްތަކާހުރެ އެވެ. މި ގޮތުން މެޗު ކުޅޭ ދުވަހު ލިވަޕޫލްގެ މަގުތަކަށް ނެރޭ ޕޮލިހުން އިތުރުކުރާނެ އެވެ. އަދި ސިޓީގެ ކުޅުންތެރިންނާއި އޮފިޝަލުން ލިވަޕޫލްގެ ދަނޑަށް އަންނަ ބަސް ދަތުރުކުރާ ރޫޓީން އަށް ބަދަލުގެންނާނެ އެވެ. މި ގޮތަށް ހަދަނީ އާއްމުކޮށް ދަތުރުކުރާ މަގުތަކުގައި ސަޕޯޓަރުން ޖަމާވެ ކުރިމަތިކޮށްފާނެ އުނދަގޫތަކަކުން ސަލާމްތަވުމަށެވެ. މީގެ ކުރިން ވެސް ލިވަޕޫލް ސަޕޯޓަރުން ވަނީ ސިޓީގެ ބަހަށް ފުޅި އުކައި ހަދައިފަ އެވެ.

ސިޓީ އާއި ލިވަޕޫލަކީ ޕްރެމިއާ ލީގުގެ ތައްޓަށް އެންމެ ބޮޑަށް ވާދަކުރަމުންދާ ދެ ޓީމެވެ. ޓޭބަލުގެ ކުރީގައި ލިވަޕޫލް އޮތީ ސިޓީއަށްވުރެ އެންމެ ޕޮއިންޓެއް އިތުރަށް ލިބިގެންނެވެ.

މިހެންވެ ލިވަޕޫލްގެ ދަނޑުގައި މި ދެ ޓީމު ކުޅޭ މެޗަކީ ޕްރެމިއާ ލީގުގެ ތަށި ލިބުން ގާތް ޓީމެއް ކަނޑައަޅަން ފަސޭހަވެގެންދާނެ މެޗެކެވެ.

ދެ ޓީމުގެ ވާދަވެރިކަމުގެ ސަބަބުން މީގެ ކުރިން ވެސް ވަނީ ހަމަނުޖެހުންތަކެއް ހިނގައިފަ އެވެ. މީގެ ތެރޭގައި ސިޓީގެ ދަނޑުގައި ލިވަޕޫލްގެ ކުޑަކުއްޖެއްގެ ބޮލުގައި ފައިސާފޮތިއަޅައި ފުރާފައިވާ ފުޅި އަކުން ޖެހުން ހިމެނެ އެވެ. މިއާއެކު ސިޓީގެ ދަނޑަށް ވަދެވޭ ލިވަޕޫލްގެ ސަޕޯޓަރުންގެ އަދަދު މަދުކުރި އެވެ. އަދި މި މެޗަށް ލިވަޕޫލްގެ ދަނޑަށް ވަދެވޭ ސިޓީގެ ސަޕޯޓަރުންގެ އަދަދު ވެސް ވަނީ ކުރިއަށްވުރެ މަދުކޮށްފަ އެވެ. އެކަމަކު ލިވަޕޫލްގެ ދަނޑުގައި އަލަށް ހެދި ގޮނޑިބަރިއާއެކު އެ ކުލަބުގެ ސަޕޯޓަރުން ކުރިއަށްވުރެ އިތުރުވާނެ އެވެ.