ފޮނި ހުވަފެންތަކެއްގައި ކުލަ ޖައްސަމުން ދިޔަ އަތުން މިއަދު ކޮންނަން ޖެހެނީ ކަށްވަޅު...

ނިރުބަވެރި އިޒްރޭލުން ފަލަސްޠީނުގެ ޣައްޒާގައި ހިންގަމުން ގެންދާ ނަސްލު ދޮވެލުމުގެ ޤަތުލުޢާންމުގައި ފާއިތުވެ ދާ ކޮންމެ ދުވަހަކީވެސް ލާއިންސާނީ އެތައް މަރެއް، ދިރިތިބީން ދެކެމުން ދާ ދުވަހެކެވެ. އެޔެއް މިޔެއް ބެލުމެއް ނެތި، އެއްގަމާއި ކަނޑާއި ވައިގެ މަގުން އިޒްރޭލުން ދެމުންދާ ޙަމަލާތަކުގައި ކޮންމެ ދުވަހަކުވެސް އެތައް ބަޔަކު މި ދުނިޔެއާ ވަކިވެގެން ދާ ކަމީ، އިބްރާހީމް އަޙްމަދުގެ ސިކުނޑީގައި، ބަރު ކޮންޓްރީޓްގަނޑެއްހެން ބިންވަޅު ނެގިފައި އޮންނަ ހަނދާނަކަށް ވަނީ ވެފައެވެ. މީގެ ކުރިން، ޢިމާރާތް ކުރުމުގެ މަސައްކަތުގައި އުޅުނު އިބްރާހީމް އަޙްމަދުގެ މިހާރުގެ މަސައްކަތަކީ، ޤަތުލުޢާންމުގެ ތެރޭގައި މި ދުނިޔެއާ ވަކިވެދާ މީހުން ވަޅުލުމަށްޓަކައި، ކަށްވަޅު ކޮނެދިނުމެވެ.

2.3 މިލިއަން މީހުންގެ ޢާބާދީއެއް އޮތް ޣައްޒާގެ ގިނަ މީހުން ފަދައިން، އިބްރާހީމްއަކީވެސް މިއަދު އުފަން ވަޒަނުގައި ރެފިއުޖީއެވެ. ވަގުތީ ހިޔާވަހިކަން ހޯދަނީ، މުޅި ޣައްޒާގެ ޢާބާދީހެން އެތަނަކަށް ޖަމާވެފައި އޮތް ދެކުނުގެ ރަފަޙުގައެވެ. ދުވަސްތައް ގުނަމުން ދަނީ ރަފަޙު ސަރަޙައްދުގައި ހުންނަ ތާލް އަލް-ސުލްޠާން ޤަބުރުސްތާނުގައެވެ. ވެލި ބޯވެފައިވާ އެ ޤަބުރުސްތާނުގެ ވާދީގައި ސަފުސަފަށް ކޮންނަ ވަޅުތައް ފާހަގަ ކުރަން މިއަދު ބޭނުން ކުރަނީ ސިމެންތި ގަލެވެ. މަހާނަ ގައު ލިބުން ދަތި ވީމައެވެ.

ފޮނި ހުވަފެންތަކާ ގުޅިފައިވި ޢިމާރާތްތައް އެޅުމުގެ މަސައްކަތުން، ކަށްވަޅު ކޮނުމުގެ މަސައްކަތަށް ބަދަލުވުމަކީ މީހެއްގެ ޟަމީރަށް ކިހާ ފުން އަސަރުތަކެއް ކުރުވާނެ ކަމެއްކަން ވަޒަންކޮށްލެވޭނީ އެފަދަ ކަމެއް ތަޖުރިބާ ކުރި މީހަކަށެވެ. ދުނިޔެ މައްޗަށް އަލިވިލޭ ކޮންމެ ދުވަހަކީ އެތައް ބައެއްގެ ފުރާނަ ނެތް މަސްގަނޑު، އިބްރާހީމްއަށް ފެންނަ ދުވަހެކެވެ. ޖަނާޒާތަކުގައި ގިސްލާ، ރޮއި ހިތާމަ ކުރަމުންދާ އެތައް ބަޔަކާ ބައްދަލު ވާން މަޖުބޫރު ކުރުވާ ދުވަހެކެވެ.

އިޒްރޭލުން ޣައްޒާގައި ޤަތުލުޢާންމު ހިންގަން ފެށީ، ޣައްޒާ ކޮންޓްރޯލް ކުރާ ޙަމާސް ޖަމާޢަތުން، އޮކްޓޯބަރ 7 ވަނަ ދުވަހު ދިން ކުއްލި ޙަމަލާގެ ރައްދުގައި ކަމަށް ބުނެއެވެ. ޙަމާސްގެ ޙަމަލާގައި އިޒްރޭލުން 1200 މީހެއްގެ ފުރާނަ ގެއްލުނު އިރު، 253 މީހަކު ރަހީނުންގެ ގޮތުގައި ގެންދިޔައެވެ. ރަހީނުންގެ ގޮތުގައި ގެންދިޔަ މީހުންގެ ތެރެއިން ބަޔަކު މިހާރުވެސް ވަނީ ދޫކޮށްލާފައެވެ. މި ދުނިޔެއިން ޙަމާސްގެ ވަސްވެސް ފޮހެލާނެ ކަމަށް ވަޢުދުވަމުން އިޒްރޭލުން ޤަތުލުޢާންމު ހިންގަން ފެށީ، ކުޑަ ހިނދުކޮޅެއްގެ ތެރޭގައެވެ. އޭގެ ފަހުން މިހާތަނަށް ޙަމަލާތައް މަޑުޖައްސާލީ މިދިޔަ ނޮވެމްބަރު މަހުގެ ތެރޭގައި، ހަފުތާއެއްހާ ދުވަހުގެ މުއްދަތަށެވެ. ޤަތުލުޢާންމަށް 5 މަސް ވާން ކައިރިވެފައި ވާއިރު، ޣައްޒާއިން މަރުވި މީހުންގެ ޢަދަދު މިހާރު ވަނީ 30000 އަށް ވުރެ މައްޗަށް އަރާފައެވެ. އެއީ ޣައްޒާގެ ޢާބާދީގެ 1.3 ޕަސެންޓް ހާ މީހުންނެވެ. ގިނައީ އަންހެނުންނާއި ކުޑަކުދިންނެވެ.

ކޮންމެ ދުވަހަކީވެސް އިތުރު އެތައް ބައެއްގެ ޤަބުރުތައް ގެންނާނެ ދުވަހެއް ކަން މިއަދު އިބްރާހީމް ޤަބޫލު ކުރެއެވެ. ދަރުމައަށް މަސައްކަތް ކުރާ ވަޅު ކޮންނަ މީހުންވެސް އެކަން ޤަބޫލު ކުރެއެވެ. އެ ފިކުރުގައި، ދުރާލާ ވަޅުތައްވެސް ހުންނަނީ ކޮނެފައެވެ. މިއީ ބަލައިލަން ހަމަ ގައިމުވެސް ހިތަށް މާ ފަސޭހަ ވާނެ މަންޒަރެއް ނޫނެވެ.

އިންސާނަކަށް ވީތީ ލިބިދޭ ދިރިހުރުމުގެ ޙައްޤާއި، ދިރިއުޅުމުގެ އެންމެ އަސާސީ ޙައްޤުތަކުން ޣައްޒާގެ ރަށްވެހިން މަހްރޫމުކޮށް، ސަލާމަތާއި ރައްކާތެރިކަން ލިބޭނެ އެންމެ ތަންފުކެއް ނުބާއްވާ، ނިރުބަވެރި އިޒްރޭލުން ޣައްޒާ ހަފުސް ކުރަމުން ދާއިރު، މިއިން ދުވަހަކު އެ ޖަރީމާ ހުއްޓާލަފާނެ ކަމުގެ އިޝާރާތެއް އަދި ނުލިބެއެވެ. ދިރިއުޅުމަށް ބޭނުންވާ އެންމެ އަސާސީ ތަކެތިވެސް އަތުގައި ނެތް ބަޔަކާ ދެކޮޅަށް، އަސްކަރީ ބަރު ހަތިޔާރުގެ ބާރުގެ ބޭނުން ކޮށްގެން އިޒްރޭލުން ހިންގަމުން ގެންދާ ޖަރީމާގައި، މި ފަހަކަށް އައިސް ޢާންމު މަދަނީ ރަށްވެހިން މަރުވާ ނިސްބަތް އިތުރު ވެފައި ވާ ކަން، ދުނިޔޭގެ ޞިއްޙަތު ޖަމިއްޔާ (ޑަބްލިއުއެޗްއޯ) އިންވެސް ވަނީ ފާހަގަ ކޮށްފައެވެ.