ފްރާންސްގެ ޕީއެސްޖީ އެންމެ ފަހުން ކުޅުނު ދެ މެޗުގައި ވެސް، ދުނިޔޭގެ އެންމެ މޮޅު އެއް ފޯވަޑް ކީލިއަން އެމްބާޕޭ ބަދަލުކުރީ ޒާތީ ކަމަކާ ހެދި ނޫން ކަމަށް ކޯޗު ލުއިސް އެންރީކޭ ބުނެފި އެވެ.

އޭނާ މިހެން ބުނީ މިކަމާ ހިތްހަމަނުޖެހިގެން އެމްބާޕޭ އޭނާއާ ބައްދަލުކުރުމާ ގުޅޭގޮތުން ނޫސްވެރިން ސުވާލު ކުރުމުންނެވެ.

ފްރާންސްގެ ކެޕްޓަންކަން ވެސް ކުރަމުން އަންނަ އެމްބާޕޭ ރޭ މޮނާކޯ އަތުން ޕީއެސްޖީން އެއްވަރުވި މެޗާއި މިދިޔަ ހަފުތާގައި ރޭނޭސްއާ ދެކޮޅަށް ޕީއެސްޖީން ކުޅުނު މެޗުގައި ވެސް ވަނީ ފުރަތަމަ ހާފަށް ފަހު ބަދަލުކޮށްފަ އެވެ.

ސްޕޭނުގެ ގައުމީ ޓީމާއި ބާސެލޯނާގެ ކުރީގެ ކޯޗު އެންރީކޭ މި ކަމާމެދު ބުނީ އެމްބާޕޭ ބަދަލު ކުރީ ދެ ސަބަބަކާ ހެދި ކަމަށެވެ.

ނަމަވެސް މީޑިއާތަކުން ބުނަނީ މިއީ އެމްބާޕޭ މި ސީޒަނަށް ފަހު ޕީއެސްޖީ ދޫކޮށް، ސްޕޭނުގެ ރެއާލް މެޑްރިޑަށް ބަދަލުވާތީވެ، ޕީއެސްޖީގެ ވެރިންގެ ލަފާގެ މަތިން އެންރީކޭ ކުރަމުން އަންނަ ކަމެއް ކަމަށެވެ. ނަމަވެސް ކޯޗު ބުނީ މިއީ ޒާތީ ކަމެއްނޫން ކަމަށާއި އޭނާ ވިސްނަނީ ޓީމާއި ކުޅުންތެރިންގެ ބޭނުން އެންމެ މޮޅަށް ކުރެވޭނެ ގޮތަކަށް ކަމަށެވެ.

މިދިޔަ ހަފުތާގައި ނޫސްވެރިން ސުވާލުކުރުމުން އެންރީކޭ ބުނީ އެމްބާޕޭ ނުލައި ކުޅެން ވެސް ޕީއެސްޖީ ދަސްކުރަންޖެހޭ ކަމަށާއި އަބަދު އެއް ބަޔަކު ޓީމުގައި ނުތިބޭނެ ކަމަށެވެ. އެމްބާޕޭ ރެއާލް އަށް ބަދަލުވާން އުޅުމުން މި ސީޒަން ފެށުނުއިރު ވެސް އޭނާ ޓީމުން އެކަހެރިކޮށްފައި ބެހެއްޓި އެވެ. ފަހުން ޓީމުގައި ހިމަނަން ފެށި މި ސީޒަނުގައި ޕީއެސްޖީ އަށް ކުޅެން އެއްބަސްވުމުންނެވެ.