ޑައިވްކުރަން އުޅެނިކޮށް އޮޔާދަނިކޮށް ފެނުނު 14 މީހުން ސަލާމަތްކޮށްފި
ފުލުހުން ސަލާމަތްކުރި މީހުންގެ ތެރޭގައި ރަޝިޔާގެ 10 ޑައިވަރުން ހިމެނޭ
މެރިން ފުލުހުން ސަލާމަތްކުރި ޑައިވަރުންނާއެކު
ކަނޑުމަތީގައި ޑައިވްކުރަން އުޅެނިކޮށް އޮޔާދިޔަ 14 ޑައިވަރަކު ފުލުހުންނަށް ފެނިގެން ސަލާމަތްކޮށްފިއެވެ.
ޕުލުހުން ބުނީ މެރިން ޕޮލިސް ލޯންޗެއް ހޮނިހިރު ދުވަހުގެ ހެނދުނު ފުވައްމުލަކުން ފުރައިގެން ގދ. އަތޮޅަށް ދަތުރު ކުރަމުން ދަނިކޮށް ގދ. ގަން ކައިރި، ކަނޑުމަތިން ޑައިވަރެއް ފެނިގެން ލޯންޗު އެ ސަރަހައްދަށް ދިޔައިރު އިތުރު ދެ ޑައިވަރުން ފެނުނު ކަމަށެވެ. ލޯންޗު އެ ސަރަހައްދަށް ކައިރި ކުރުމުން އިތުރު ޑައިވަރުންތަކެއް އޮޔާ ދާ ކަމުގެ މައުލޫމާތު ދިން ކަމަށް ފުލުހުން ބުންޏެވެ.
ފުލުހުން ސަލާމަތްކުރި މީހުންގެ ތެރޭގައި ރަޝިޔާގެ 10 ޑައިވަރުން ހިމެނެއެވެ. އަދި ދިވެހި ހަތަރު އިންސްޓްރަކްޓަރަކުވެސް ހިމެނެއެވެ.
ޕޮލިސް ލޯންޗުގައި އެ މީހުން ގދ ގައްދުއަށް ގެންގޮސްފައިވާއިރު އެއްވެސް މީހަކަށް އަނިޔާއެއްވެފައިނުވާކަމަށް ފުލުހުން ބުނެއެވެ. ފުލުހުން ވަނީ އޮޔާއި ވަޔަށް ސަމާލުކަންދީގެން ޑައިވްކުރާ ފަރާތްތަކުން ޑައިވްކުރުމަށް އިލްތިމާސްކޮށްފައެވެ.
