ޗާގޯސް-ރާއްޖެ ކަނޑުގެ މައްސަލައަކީ އިސްތިއުނާފުނުކުރެވޭނެ މައްސަލައެއްކަން ސަރުކާރުން އިއުތިރާފުވެ ހެދީ ދޮގުކަން ހާމަވެއްޖެ - ޖީހާން

ޗާގޯސް-ރާއްޖެ ކަނޑުގެ މައްސަލައަކީ އިސްތިއުނާފު ނުކުރެވޭނެ މައްސަލައެއްކަން ސަރުކާރުން އިއުތިރާފުވެފައިވާ ކަމަށާއި، މެނިފެސްޓޯގައި ހިމެނީ ދޮގު ވާހަކައެއްކަން ހާމަވެގެން ގޮސްފައިވާ ކަމަށް ހިންނަވަރު ދާއިރާގެ މެންބަރު ޖީހާން މަހުމޫދު ވިދާޅުވެއްޖެއެވެ.

ރާއްޖެ ޓީވީގެ ފަލަ ސުރުހީ ޕްރޮގްރާމުގައި ވާހަކަ ދައްކަވަމުން ޖީހާން ވިދާޅުވީ ޗާގޯސް މައްސަލައިގައި، ޗާގޯސްއާއި ދިވެހިރާއްޖެއާ ދެމެދު އޮންނަ ކަނޑުގެ ސަރަހައްދުގައި، ފުށުއަރާ ސަރަހައްދާމެދު ގޮތެއް ކަނޑައަޅަންޖެހެނީ ބައިނަލްއަގުވާމީ މިންގަނޑުތަކުން ބައިނަލްއަގުވާމީ ކޯޓަކުން ކަމަށެވެ. ޖީހާން ވިދާޅުވީ މޮރިޝަސްއިން ޗާގޯސް ހޯދަން ދައުވާ ކުރީ ރާއްޖޭގެ އެކްސްކްލޫސިވް އިކޮނަމިކް ޒޯނުން ބޮޑު ބައެއް ލިބޭގޮތަށް ކަމަށެވެ.

Advertisement

އަދި އެމްޑީޕީގެ ސަރުކާރުން ކުރިކަމަކީ ދިވެހި ކަނޑުން ބައެއް ގެއްލިގެން ދިއުމުން ސަލާމަތް ކުރުން ކަމަށާއި ދިވެހިރައްޔިތުންނަށް ހައްގުވާ މިންވަރަށް ކަނޑުގެ ސަރަހައްދު ހިމާޔަތްކުރުން ކަމަށް ޖީހާން ވިދާޅުވިއެވެ.

ޗާގޯސް ރާއްޖެ ކަނޑުގެ މައްސަލައިގައި ދިވެހިރާއްޖެއިން 2000 ވަނަ އަހަރު އަންކްލޯސް މުއާހަދާގައި ބައިވެރިވެފައިވާ ކަމަށް ޖީހާން ވިދާޅުވިއެވެ. އެ މުއާހަދާއަކީ ކަނޑުގެ ސަރަހައްދު ފުށުއަރާ މައްސަލައިގައި ގައުމުތަކުގެ ސަރަހައްދު އެކަށެ އެޅުމަށް ބައިނަލްއަގުވާމީ މުއާހަދާއެއް ކަމަށް ޖީހާން ވިދާޅުވިއެވެ. އަދި އެކަމާއި ގުޅޭ ކޯޓްތައް ހުންނަ އިރު، ރާއްޖެ ޗާގޯސް ކަނޑުގެ ސަރަހައްދުގެ މައްސަލަ ދިޔައީ އިޓްލޮސްއަށް ކަމަށެވެ.

ޖީހާން ވިދާޅުވީ އެ މުއާހަދާގައި، އެފަދަ ކޯޓަކުން ނުވަތަ ޓްރަބިއުނަލްއަކުން ނިންމާ ނިންމުންތަކަކީ ނިހާއީ ނިންމުންތަކެއް ކަމަށެވެ. އަދި އެއީ އެޕީލް ކުރެވޭނެ ނުވަތަ އިސްތިއުނާފުކުރެވޭނެ ނިންމުންތަކެއް ނޫން ކަމަށާއި، އަންކްލޯސްގެ ދަށުން ނިންމާ ނިންމުމެއް އިސްތިއުނާފު ނުކުރެވޭނެ ކަމަށް މި މުއާހަދާގައި ބުނެފައިވާ ކަމަށެވެ.

ޖީހާން ވިދާޅުވީ މިކަމުން އެނގިގެންދާ ހަގީގަތަކީ ރައީސް އިބްރާހީމް މުހައްމަދު ޞާލިހުގެ ސަރުކާރުން ކޮށްދެއްވާފައިވަނީ، އޯގާތެރި، ތެދުވެރި އެންމެ އިހްލާސްތެރި ވެރިކަން ކަމަށާއި ކަންކަން ނިންމާފައިވަނީ ރައްޔިތުންނަށް ފައިދާވާ ގޮތަށް ކަމަށެވެ.