މި އަހަރު މާރިޗު މަހުގެ 17 ގައި ބޭއްވުމަށް ހަމަޖެހިފައިވާ ރައްޔިތުންގެ މަޖިލިސް އިންތިހާބުގައި މާލެއާއި އަތޮޅުތެރޭގައި ކޮމާންޑަރުންގެ ގޮތުގައި މަސައްކަތްކުރާ އޮފިސަރުންނަށް ޚާއްސަ ތަމްރީނު ޕްރޮގްރާމެއް ފަށައިފިއެވެ.
އަންގާރަ ދުވަހު ފެށި މި ތަމްރީން ޕްރޮގްރާމަކީ ދިވެހި ފުލުހުންގެ ޚިދުމަތާއި އިލެކްޝަންސް ކޮމިޝަން ގުޅިގެން ބާއްވާ ޕްރޮގްރާމެކެވެ. ފުލުހުންގެ އިދާރާއިން ބުނީ މި ޕްރޮގްރާމުގައި މަޖިލިސް އިންތިހާބާ ބެހޭ ޤާނޫނާއި އިންތިހާބުތަކާ ބެހޭ އާއްމު ޤާނޫނު އަދި އިލެކްޝަންސްގެ ޤާނޫނަށް އަހުލުވެރިކުރުވުމަށް މައުލޫމާތު ހިއްސާކުރުމަށް ވަނީ ހަމަޖެހިފައެވެ.
މީގެ އިތުރުން މީގެ ކުރީގެ އިންތިހާބުތަކުގެ މައުލޫމާތާއި ވޯޓުލުމުގެ މަރުހަލާއާއި ވޯޓު ގުނުމުގެ މަރުހަލާތަކުގައި ވެސް އަމާންކަމާއެކު އޮފިސަރުން ހަރަކާތްތެރިވެފައިވާ ގޮތުގެ ތަޖުރިބާތަކާއި މައުލޫމާތުތައް މި ތަމްރީނު ޕްރުގްރާމުގައި ހިއްސާ ކުރުމަށް ހަމަޖެހިފައިވާކަމަށް ފުލުހުންގެ އިދާރާއިން މައުލޫމާތުދެއެވެ.
ހަމައެއާއެކު ކުރީގެ އިންތިހާބުތަކުގައި އެކިއެކި ސަބަބުތަކާހުރެ ދިމާވި މައްސަލަތައް ހައްލުކުރުމަށް ކުރެވިދާނެ ކަންކަމާ ގުޅޭގޮތުންނާއި ވޯޓުލުމުގެ ހައްގު އޮންނަ ކޮންމެ ރައްޔިތަކަށް އެ ހައްގުގެ ބޭނުން އެންމެ ފުރިހަމަށް ކަށަވަރުކޮށްދިނުމާ ގުޅޭ މައުލޫމާތުތައް ވެސް މި ތަމްރީނު ޕްރޮގްރާމުގައި ހިއްސާކުރާނެކަމަށް އެ އިދާރާއިން ބުނެއެވެ.
މި ޕްރޮގްރާމްގައި މައުލޫމާތުދިނުމަށް ހަމަޖެހިފައިވަނީ މި ޚިދުމަތުގެ މުދައްރިބުންނާއި އިލެކްޝަންސް ކޮމިޝަނުގެ ކަމާގުޅޭ މުދައްރިބުންނެވެ. ކޮމިޝަނަރ އޮފް ޕޮލިސް އަލީ ޝުޖާއު ވެސް މި މަހުގެ 28 ގައި އޮންނަ ތަމްރީނު ކުލާސްތަކުގައި މައުލޫމާތުދެއްވާނެކަމަށް ފުލުހުންގެ އިދާރާއިން ބުނެއެވެ.
މިއީ ދެ ދުވަހުގެ މުއްދަތަކަށް ކުރިއަށް ގެންދިއުމަށް ހަމަޖެހިފައިވާ ޕްރޮގްރާމެކެވެ.
