ފެންނަނީ އެއް މައިދާނުގައި ރައްޔިތުން އަދި އަނެއް މައިދާނުގައި ސަރުކާރު އޮވެގެން މަސައްކަތް ކުރާތަން - ފަތުހުﷲ
މިހާތަނަށް ރާއްޖެ އަށް ލިބުނު ކާމިޔާބެއް ވިއްޔާ ލިބިފައި އޮތީ ސަރުކާރާއި ރައްޔިތުން ގުޅިގެން ކުރި މަސައްކަތުން ކަމަށް އޭނާ ވިދާޅުވި
ތިމަރަފުށީ ދާއިރާއަށް އެމްޑީޕީގެ ޓިކެޓުގައި ވާދަކުރައްވާ ކެންޑިޑޭޓް ފަތުހުﷲ ޖަމީލް
ސަރުކާރާއި ރައްޔިތުންނާއި ގުޅުން ކުޑަ ކަމަށާއި، މިހާރު ފެންނަނީ އެއް މައިދާނުގައި ރައްޔިތުން ތިބޭއިރު އަނެއް މައިދާނުގައި ސަރުކާރު އޮވެގެން މަސައްކަތް ކުރާތަން ކަމަށް ރައްޔިތުންގެ މަޖިލީހުގެ އިންތިޚާބުގައި ތިމަރަފުށީ ދާއިރާއަށް އެމްޑީޕީގެ ޓިކެޓުގައި ވާދަކުރައްވާ ކެންޑިޑޭޓް އަދި ކުރީގެ ކޮމިޝަނަރ ޖެނެރަލް އޮފް ޓެކްސޭޝަން ފަތުހުﷲ ޖަމީލް ވިދާޅުވެއްޖެއެވެ.
ހޯމަ ދުވަހުގެރޭ އާޓިފިޝަލް ބީޗުގައި ބޭއްވި އެމްޑީޕީގެ 'މިސްރާބު ހަމަމަގަށް' ކެމްޕެއިން ޖަލްސާގައި ވާހަކަދައްކަވަމުން، ފަތުހުﷲ ވިދާޅުވީ މިހާތަނަށް ރާއްޖެ އަށް ލިބުނު ކާމިޔާބެއް ވިއްޔާ ލިބިފައި އޮތީ ސަރުކާރާއި ރައްޔިތުން ގުޅިގެން ކުރި މަސައްކަތުން ކަމަށެވެ. ނަމަވެސް ރާއްޖޭގައި މިހާރު ކަންކަން ހިނގަނީ އެހެން ނޫންކަމަށާއި ކުރިއަށް އޮތް ރައްޔިތުންގެ މަޖިލިސް އިންތިޚާބުގައި އެމްޑީޕީގެ ކެނޑިޑޭޓުންނަށް ވޯޓު ދޭން ޖެހެނީ އެކަން ބަދަލުކޮށް ރާއްޖޭގެ މިސްރާބު ބަދަލުކޮށްލުމަށް ކަަމަށް އޭނާ ވިދާޅުވިއެވެ. އަދި މިހާރު މީސްމީޑިއާ އާއި އެހެން ޒަރީއާތަކުން އާއްމުން ފާޅުކުރާ ޚިޔާލަށް ބަލާއިރު މިސްރާބު އެންމެ ބޮޑަށް ކައްސާލާފައިވަނީ ދައުލަތުގެ މާލިއްޔާގެ ކަންކަމުގައިކަން އެނގޭ ކަމަށް ފަތުހުﷲ ވިދާޅުވިއެވެ. އަދި މާލިއްޔާގެ ކަންކަން ދަނީ ރަނގަޅަށް ނޫންކަން އެއީ މިއަދު ދެބަސްވެވެން ނެތް ހަޤީޤަތަކެއް ކަމަށް ވެސް އޭނާ ވަނީ ވިދާޅުވެފައެވެ.
މީގެއިތުރުން ފާއިތުވި 5 އަހަރު އެމްޑީޕީގެ ވެރިކަމުގައި ކޮވިޑް-19 އާއި ރަޝިއާ އާއި ޔޫކްރެއިން ހަނގުރާމަ އާއި ތެލުގެ އަގު ބޮޑުވުން ފަދަ އިގްތިސާދީ އުނދަނގޫތައް ދިމާވި ކަމަށާއި އެއިން އެއްވެސް ހާލަތެއްގައި ދައުލަތުގެ މުވައްޒަފުން ވަޒީފާއިން ވަކިކޮށްފައި ނުވާ ކަމަށް ފަތުހުﷲ ވިދާޅުވިއެވެ. ނަމަވެސް މިއަދު ރާއްޖެ އަށް ރިކޯޑް އަދަދަކަށް އާމްދަނީ ލިބެމުންދާއިރު، ދައުލަތުން ރައްޔިތުންނަށް ދޭން ޖެހޭ ފައިސާ ނުދެވޭ ސަބަބާމެދު އޭނާ ވަނީ ސުވާލު އުފައްދަވާފައެވެ. އަދި ދިވެހި ދައުލަތުގެ މާލިއްޔާގެ މިސްރާބު ކައްސާލާފައިވާ ކަމަށާއި މާލިއްޔާ ހަމަ މަގަށް އަޅުވަން ޖެހޭ ކަަމަށް އޭނާ ވިދާޅުވިއެވެ. އަދި މިކަންކަން ކުރެވޭނީ މަޖިލީހުގައި އެމްޑީޕީގެ ސާފު މެޖޯރިޓީ އެއް އޮވެގެން ކަމަށް ފަތުހުﷲ ވިދާޅުވިއެވެ.
އޭނާ އިތުރަށް ވިދާޅުވީ ދައުލަތުގެ ޚަރަދު ކުޑަ ކުރަންވާނީ އިންވެސްޓަރުންގެ އިތުބާރު ނުގެއްލޭނެ ގޮތަކަށް، އާއްމުންނަށް ބޭނުންވާ ޒަރޫރީ ކަންކަމަށް ބުރޫ ނާރާނެ ގޮތަކަށް އިންތިޒާމްކޮށްގެން ކަމަށެވެ. މީގެ އިތުރުން ޚަރަދު ކުޑަކުރުމުގެ ނަމުގައި މިހާރު ވަޒީފާގައި ތިބި މީހުންނަށް ވަޒީފާގެ ބިރު ދެއްކުމަކީ ބަލައިގަނެވޭނެ ކަމެއް ނޫން ކަމަށް ވެސް މި ޖަލްސާގައި ވާހަކަދައްކަވަމުން ފަތުހުﷲ ވިދާޅުވިއެވެ.
