ޖީހާން ވިދާޅުވެދެއްވީ މަޖިލީހުގެ މެޖޯރިޓީ އެމްޑީޕީގައި އޮތުމާއި އެހެން ޕާޓީއެއްގައި އޮތުމުގެ ތަފާތު
އެމްޑީޕީން ފާސްކުރީ ރައްޔިތުންނަށް ލާބަ އާއި މަންފާ ލިބޭނެ ކަންކަމަށް ވާއިރު، އިދިކޮޅުގެ މެޖޯރިޓީގައި ފާސްކުރީ ރައްޔިތުންގެ ހައްގުތައް ހަނިކުރި ގާނޫނުތައް ކަމަށް ވިދާޅުވި
ހިންނަވަރު ދާއިރާގެ މެންބަރު ޖީހާން މަޙްމޫދު ޖަލްސާގައި ވާހަކަ ދައްކަވަނީ
ރައްޔިތުންގެ މަޖިލީހުގެ މެޖޯރިޓީ އެމްޑީޕީގައި އޮތުމާއި އެހެން ޕާޓީއެއްގައި އޮތުމުގެ ތަފާތަކީ ބާރުވެރިކަމާއި ބިރުވެރިކަމުގެ ތަފާތު ކަމަށް ހިންނަވަރު ދާއިރާގެ ރައްޔިތުންގެ މަޖިލީހުގެ މެންބަރު ޖީހާން މަޙްމޫދު ވިދާޅުވެއްޖެއެވެ.
މަޖިލީހުގެ އެމްޑީޕީގެ ކެމްޕެއިން ރަސްމީކޮށް ފެށުމަށް ހޯމަ ދުވަހުގެރޭ އާޓިފިޝަލް ބީޗުގައި ބޭއްވި "މިސްރާބު ހަމަމަގަށް" ޖަލްސާގައި ވާހަކަ ދައްކަވަމުން ޖީހާން ވިދާޅުވީ، 18 ވަނަ ރައްޔިތުންގެ މަޖިލީހުން ފާސްކުރި ގާނޫނުތައް މުޅިން ވެސް ފަރުމާކޮށްފައި ހުރީ، އޭރުގެ ސަރުކާރުން ބޭނުންވާ ގޮތަށް ގާނޫނުތައް ބަދަލުކޮށްގެން، ރައްޔިތުންނަށް އޮޅުވާލައިގެން ގާނޫނުތަކުން ރައްޔިތުންގެ ހައްގުތައް ހަނިކޮށް، ދެރަ ދިނުމަށް ކަމަށެވެ.
އޭގެ ބައެއް ގާނޫނުތަކުގެ ތެރޭގައި ޓެރަރިޒަމްގެ ގާނޫނު އަދި އަބުރުގެ ގާނޫނު ހިމެނޭކަމަށް ޖީހާން ވިދާޅުވިއެވެ.
ޖީހާން ވިދާޅުވީ 18 ވަނަ ރައްޔިތުންގެ މަޖިލީހުން ފެނުނު މަންޒަރާއި އެމްޑީޕީއަށް މަޖިލީހުގެ މެޖޯރިޓީ އަލަށް ލިބުނު 19 ވަނަ ރައްޔިތުންގެ މަޖިލިސް ތަފާތު ކަމަށެވެ. އެގޮތުން އެމްޑީޕީން ފާސްކުރީ ރައްޔިތުންނަށް ލާބަ އާއި މަންފާ ލިބޭނެ ކަންކަން ކަމަށެވެ.
ޖީހާން މިހެން ވިދާޅުވިއިރު، ކުރީގެ ރައީސް ޔާމީންގެ ވެރިކަމުގައި އަބުރުގެ ގާނޫނުގެ ނަމުގައި ގާނުނެއް ފާސްކޮށް، ސަރުކާރަށް ދެކޮޅަށް ވާހަކަ ދައްކާ ނުވަތަ ޚިޔާލު ފާޅުކުރާ މީހުންނާއި ނޫސްތަކާއި އަދި ޓީވީ ސްޓޭޝަންތައް ބޮޑެތި އަދަދުތަކުން ޖޫރިމަނާ ކުރިއެވެ. އޭރު އޮތް ޓެރަރިޒަމްގެ ގާނޫނުގެ ދަށުން ބައެއް ފަރާތްތަކަށް ދައުވާކޮށް ޖަލަށް ވެސް ލިއެވެ.
