ޕާޓީއަށް ކުރިމަތިވާ ކޮންމެ ދަތި ދަނޑިވަޅެއްގައި ކުރިއަށް ނުކުމެ، ތަރުތީބުކޮށްލުމަށް ކުރެވެން ހުރި ހުރިހާ ކަމެއް ކުރާނަން - ރައީސް ޞާލިޙު

ޕާޓީއަށް ކުރިމަތިވާ ކޮންމެ ދަތި ދަނޑިވަޅެއްގައި ކުރިއަށް ނުކުމެވަޑައިގެން، ތަރުތީބުކޮށްލުމަށް ކުރެވެން ހުރި ހުރިހާކަމެއް ކުރައްވާނެ ކަމަށް، އެމްޑީޕީގެ އެޑްވައިޒަރު އަދި ކުރީގެ ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.

އެމްޑީޕީގެ ފަރާތުން 20 ވަނަ ރައްޔިތުންގެ މަޖިލީހަށް ވާދަކުރާ އެމްޑީޕީގެ ކެންޑިޑޭޓުންގެ ކެމްޕޭން ފެށުމަށް އާޓިފިޝަލް ބީޗުގައި ބޭއްވި ޖަލްސާފައި ވާހަކަފުޅުދައްކަވަމުން ރައީސް ޞާލިޙު ވިދާޅުވީ، އެމްޑީޕީ މީގެ 18 އަހަރު ކުރިން ފެށި ދަތުރުގައި އައިސް ތިބެވޭ ހިސާބު އަނެއްކާވެސް ވިސްނާލަންޖެހޭ ކަމަށެވެ. ވެރިކަން ކުރެވިއްޖެ ކަމަށާއި، އިދިކޮޅުގައި ތިބިކަމަށް ރައީސް ވިދާޅުވިއެވެ. އަދި އޭގެފަހުން އަނެއްކާ ވެސް ވެރިކަން ކުރެވިއްޖެ ކަމަށާއި، މިހާރު އަނެއްކާވެސް އައިސް ތިބީ އިދިކޮޅު ޕާޓީއެއްގެ ގޮތުގައި ކަމަށް ރައީސް ވިދާޅުވިއެވެ. އަދި ވޭތުވެދިޔަ އަހަރުތަކުގެ ތެރޭގައި ގިނަގުނަ ތަޖުރިބާތަކެއް ކުރެވިއްޖެ ކަމަށް ވިދާޅުވިއެވެ.

ރައީސް ޞާލިޙު ވިދާޅުވީ މިދިޔަ ރިޔާސީ އިންތިޚާބު ނިމުމަށްފަހު މި ވޭތުވެދިޔަ ދުވަސްތަކުގެ ތެރޭގައި ޕާޓީން ވަރަށް އެހެން ކަހަލަ ތަޖުރިބާތަކެއް ކޮށްފައިވާކަމަށެވެ. ވަކިން ޚާއްސަކޮށް ޕާޓީގެ މެންބަރުން ވަރަށް ބުރަ މަސައްކަތުން ރައްޔިތުންގެ މަޖިލީހުގެ ބޮޑު އަޣުލަބިއްޔަތެއް ހޯދައިދިން ނަމަވެސް، ރިޔާސީ އިންތިޚާބާއި އޭގެ ކުރިންވެސް އެމްޑީޕީ ދޫކޮށް މެންބަރުންތަކެއް ހިނގައްޖެ ކަމަށެވެ. އަދި އެއާ ގުޅިގެން އެމްޑީޕީއަށް މާޔޫސްކަން ކުރިމަތިވެ، މަޑުޖެހުމެއް އައިކަމަށެވެ. ނަމަވެސް އެ ވޭތުވެދިޔަ ދުވަސްތަކުގައި ޕާޓީއައިގެން ކުރިއަށް ވަޑައިގަތުމުގައި ޕާޓީގެ ޗެއަރޕަރސަން ފައްޔާޒް އިސްމާޢީލް އިސްވެ ހުންނަވައިގެން ބުރަ މަސައްކަތް ކުރެއްވިކަމަށެވެ.

ރައީސް ވިދާޅުވީ އެ ދަތި ދަނޑިވަޅުގައި ޕާޓީގެ ސެކްރެޓޭރިއެޓްގައި މަސައްކަތް ކުރި މަދު ހީވާގި ބޭފުޅުންނަށް ޝުކުރު އަދާކުރައްވާ ކަމަށެވެ. ރައީސް ވިދާޅުވީ އެ ތަޖުރިބާގެ އަލީގައި އަނެއްކާވެސް ތިބީ ނުކުމެ ކަމަށާއި، އެމަނިކުފާނާއި އެންމެންގެ އަމާޒަކީ ޕާޓީގެ ލީޑަރޝިޕްގައި ގިނަބަޔަކު ހިމެނިގެން، ގިނަ މަސައްކަތް ކުރެވޭނެ ގޮތެއް ހޯއްދެވުން ކަމަށެވެ.

ރައީސް ޞާލިޙު ވިދާޅުވީ ކުރިއަށް އޮތް މަޖިލިސް އިންތިޚާބަކީ ވަރަށް މުހިންމު އިންތިޚާބެއް ކަމަށެވެ. ޕާޓީގެ ލީޑަރޝިޕް އޮތީ އެއް ވިސްނުމެއްގައި އަދި އެއް ޢަޒުމެއްގައި ކަމަށާއި، އިންތިޚާބު ކާމިޔާބު ކުރުމަށްޓަކައި ކުރެވެން ހުރި ހުރިހާ ކަމެއް ކުރުމަށް ކަމަށް ރައީސް ޞާލިޙު ވިދާޅުވިއެވެ.

ރައީސް ޞާލިޙު ވިދާޅުވީ، އެމަނިކުފާނު އެދިވަޑައިގަންނަވަނީ އިންތިޚާބަށް ތައްޔާރުވުމުގެ ގޮތުން ބޭއްވި ޕްރައިމަރީގައި ނާކާމިޔާބުވި މެެންބަރުން ކާމިޔާބުވި މެންބަރުންނާއެކު ނުކުމެ އިންތިޚާބު ކާމިޔާބުކުރުމުގައި މަސައްކަތް ކޮށްދިނުމަށް ކަމަށެވެ.

ރައީސް ޞާލިޙު ވިދާޅުވީ ސަރުކާރު ހަމަމަގަށް ނާޅުވައިފިނަމަ މާދަމާވެސް ހަދާނީ ދޮގުކަމަށާއި، މާދަމާވެސް އޮޅުވާލާނެ ކަމަށެވެ. އެހެންކަމުން މަޖިލިސް އިންތިޚާބު މުހިންމު ކަމަށް ރައީސް ވިދާޅުވިއެވެ.