ހުޅުމާލޭގައި އެކްސިޑެންޓެއް ހިނގާ ދެ މީހަކަށް އަނިޔާވެއްޖެ
ފުލުހުން ދަނީ މި މައްސަލަ ތަހުގީގުކުރަމުން
ހުޅުމާލެ ހޮސްޕިޓަލް
ހުޅުމާލޭގައި އެކްސިޑެންޓެއް ހިނގާ ދެ މީހަކަށް އަނިޔާވެއްޖެއެވެ.
ފުލުހުން ބުނިގޮތުގައި އެ އެކްސިޑެންޓް ހިނގާފައި ވަނީ ހުޅުމާލެ ފޭސް 1 ނިރޮޅު މަގުގެ ދެ ވަނަ ރުއްގަނޑާއި ހިސާބުން ދުއްވާފައި ދިޔަ ކާރެއްގައި ފަހަތުން އައި ވޭނެއް ޖެހުނު ވަގުތު އެ ކާރު ގޮސް ޕާކުކޮށްފައި އޮތް ކާރެއްގައި ޖެހިގެންނެވެ.
މި އެކްސިޑެންޓް ހިނގާފައިވާކަން ފުލުހުންނަށް ރިޕޯޓްކުރީ މިއަދު ހެނދުނު 06:20 ހާއިރެވެ.
މި އެކްސިޑެންޓުގައި ކާރާއި ވޭން ދުއްވި މީހާ އަށް ވެސް އެކި ވަރުގެ އަނިޔާ ލިބިފައިވާ ކަމަށް ފުލުހުން ވަނީ ބުނެފައެވެ. އަނިޔާވެފައި ވަނީ 46 އަހަރުގެ މީހަކާއި 52 އަހަރުގެ މީހަކަށެވެ.
މި ދެ މީހުންނަކީ ވެސް ދިވެހި ފިރިހެނުންނެވެ. އަދި ދެ މީހުންނަކީ ވެސް ލައިސަންސް އޮންނަ ދެ މީހުން ކަމަށާއި އެކްސިޑެންޓުގައި ހިމެނޭ ތިން އުޅަނދަށް ވެސް އެކި ވަރުގެ ގެއްލުން ވެފައިވާ ކަމަށް ފުލުހުން ވަނީ ބުނެފައެވެ.
ފުލުހުން ދަނީ މި މައްސަލަ ތަހުގީގުކުރަމުންނެވެ.
