އެއްވެސް ޙާލަތެއްގައި ރެކޯޑަށް ނުވިސްނާ ކަމަށާއި، އެހެން ނަމަވެސް އެކަން ޙާސިލުވުމުން އުފާވެއްޖެ ކަމުގައި ބަޔާ ލެވަކޫސަންގެ ކޯޗު ޒަބީ އަލޮންސޯ ބުނެފި އެވެ.

އޭނާ މިހެން ބުނީ ޖަރުމަނު ލީގުގައި ލެވަކޫސަނުން މައިންޒާ ދެކޮޅަށް ކުޅެ، މޮޅުވި މެޗަށްފަހު ނޫސްވެރިންނާ ވާހަކަ ދައްކަމުންނެވެ. ލެވަކޫސަނުން ވަނީ މިހާތަނަށް ބަލި ނުވެ 33 މެޗު ހަމަ ކޮށްފަ އެވެ. މިއީ އެ ކުލަބަށް ރެކޯޑު އަދަދެކެވެ. މި ސީޒަންގެ މިހާތަނަށް ލެވަކޫސަނުން 33 މެޗު ކުޅެފައިވާއިރު، އެ ޓީމުން ވަނީ 97 ލަނޑު ޖަހައިފަ އެވެ.

އެކަމާ ގުޅޭ ގޮތުން މައިންޒް މެޗަށްފަހު އަލޮންސޯ ބުނީ، އެކަން ހާސިލުވުމާ ހަމައަށް، ރެކޯޑާމެދު އޭނާ ނުވިސްނާ ކަމަށެވެ. އެހެން ނަމަވެސް އެ ރެކޯޑު ލިބުމުން އުފާވެފައި ހުރި ކަމަށް ވެސް އޭނާ ބުންޏެވެ. އިތުރަށް އަލޮންސޯ ބުނީ، އެކަމާމެދު ލެވަކޫސަންގެ ކުޅުންތެރިންނާމެދު އޭނާ ވަރަށް ފަޚުރުވެރިވާ ކަމަށާއި، ކުޅުންތެރިންނަށް ފުރިހަމަ އަށް ޝުކުރު އަދާކޮށް، މަރުޙަބާ ވެސް ކިޔަން ބޭނުންވާ ކަމަށެވެ.

މީގެ އިތުރުން އަލޮންސޯ ބުނީ، ލެވަކޫސަންގެ ކުޅުންތެރިން ކުރަމުން އަންނަ މަސައްކަތާއި، ކަންކަމުގަައި އެ ކުޅުންތެރިން ލަމުން އަންނަ ހިތްވަރުގެ ސަބަބުން، އެ ކުޅުންތެރިންނާއެކު މަސައްކަތް ކުރަން ވަރަށް ފަސޭހަވާ ކަމަށެވެ. އަނެއްކޮޅުން ލެވަކޫސަންގެ ކުޅުންތެރިންގެ ފަރާތުން ގިނަ ކަންކަން އެނގެމުން އަންނަކަން ފާހަގަކޮށް އަލޮންސޯ ބުނީ، އެކަމުން މެޑަލެއް ނުލިބުނު ނަމަވެސް ހިތްވަރެއް ލިބޭ ކަމަށެވެ. އެހެންކަމުން ލެވަކޫސަނުން ހުއްޓަލަން ބޭނުންނުވާ ކަމަށާއި، ބޭނުންވަނީ އެ ހިތްވަރާއެކު ކުރިއަށް ދާން ކަމަށް ވެސް އަލޮންސޯ ބުންޏެވެ.

ރެއާލް މެޑްރިޑުގެ ޒުވާން އުމުރުފުރާގެ ޓީމުން 2018 ވަނަ އަހަރު ކޯޗިން ކެރިއަރު ފެށި އަލޮންސޯ، ލެވަކޫސަންގެ ކޯޗުކަމާ ހަވާލުވީ 2022 ވަނަ އަހަރު އެވެ. އެ ކުލަބާ ހަވާލުވެ އޭނާ އަންނަނީ ކާމިޔާބު މަސައްކަތްތަކެއް ކުރަމުންނެވެ. މި ސީޒަންގެ ޖަރުމަނު ލީގުގައި އެ ޓީމުން ރަނގަޅު ނަތީޖާތަކެއް ނެރެމުން އަންނައިރު، މިވަގުތު އެއް ވަނައިގައި އޮތީ ވެސް އެ ޓީމެވެ. އަނެއްކޮޅުން، މި ސީޒަންގެ ޖަރުމަނު ލީގުގައި ވެސް ހަމައެކަނި ބަލި ނުވެ އޮތް ޓީމަކީ ލެވަކޫސަން އެވެ.