ރައްޔިތުންގެ ހައްގުގައި މަސައްކަތް ކުރައްވާނެކަމަށް ވިދާޅުވި
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ކުރީގެ ނައިބު ރައީސް ފައިސަލް ނަސީމް ވާހަކަފުޅުދައްކަވަނީ
ގައުމުގެ ހައްގުގައި 20 ވަނަ ރައްޔިތުން މަޖިލީހުގެ އިންތިޚާބުގެ އަޣުލަބިއްޔަތު އެމްޑީޕީން ހޯދަންޖެހޭކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ބުރާސްފަތި ދުވަހު އެމްޑީޕީއަށް ސޮއިކުރައްވައި ވާހަކަފުޅު ދައްކަވަމުން ފައިސަލް ވިދާޅުވީ، އެމްޑީޕީއިން އަބަދުވެސް ކުރާނީ ރައްޔިތުންނަށްޓަކައި ކުރަންޖެހޭ މަސައްކަތްތައް ކަމަށާއި، ވަގުތުތައް ހޭދަކުރަނީ ރައްޔިތުންނަށް ޚިދުމަތް ކުރުމުގައި ކަމަށެވެ. އަދި ވިދާޅުވީ ރައްޔިތުންނާއި ގާތުން ރައްޔިތުން ބޭނުންވާ ގޮތަށް އެންމެ ރަނގަޅަށް މަސައްކަތް ކުރެވޭ ޕާޓީއަކީ އެމްޑީޕީ ކަމަށެވެ.
ކުރީ ސަރުކާރުގައި ހިންގާފައިވާ މަޝްރޫއުތަކަށް އިޝާރާތް ކުރައްވައި ފައިސަލް ވިދާޅުވީ، ކުދި ރަށްތަކުގައި ކުރިއަށް ގެންދިޔަ މަޝްރޫއުތަކާއި، ބޯހިޔާވަހިކަން ހޯދައިދިނުމަށް ކުރި މަސައްކަތް ކުރިއަށް އޮތްތަނުގައި ކުރިއަށް ވެސް ކުރިއަށްގެންދާނެ ކަމަށާއި، ރައްޔިތުންގެ ހައްގުގައި މަސައްކަތް ކުރާނެ ކަމަށެވެ. އަދި އެމްޑީޕީއަށް ދޭންޖެހޭ ހުރިހާ ސަޕޯޓެއް ދޭނެކަމުގެ ޔަގީންކަން ފައިސަލް ދެއްވިއެވެ.
ފައިސަލް ވިދާޅުވީ އެންމެން އެކުގައި މިއަދު މަސައްކަތްތަކެއް ކުރަންޖެހޭ ކަމަށާއި، ރައްޔިތުން މަޖިލީހުގެ އިންތިޚާބު އަޣުލަބިއްޔަތު އެމްޑީޕީން ހޯދަންޖެހޭ ކަމަށެވެ. އެއީ ގައުމުގެ ހައްގުގައި ކުރަންޖެހޭ ކަމެއް ކަމަށް ފައިސަލް ވިދާޅުވިއެވެ.
މީގެ އިތުރުން ފައިސަލް ވިދާޅުވީ އެމްޑީޕީ އުފެދުމާއެކު އެމްޑީޕީން އެންމެ ފުރަތަމަ އެކުލަވާލި ގައުމީ މަޖިލީހުގެ މެންބަރެއްގެ ގޮތުގައި މަސައްކަތް ކުރިކަމަށާއި، ރައްޔިތުންނާއި ގާތުން މަސައްކަތްކޮށް، ސިޔާސަތުތަކާއި، ފިކުރުތައް ދަސްކޮށްދިން ޕާޓީއަކީ އެމްޑީޕީ ކަމަށެވެ.
ފައިސަލް އެމްޑީޕީއަށް ސޮއިކުރެއްވީ 22 ފެބްރުއަރީ 2024 ވީ ބުރާސްފަތި ދުވަހު، އެކަމަށްޓަކައި ބޭއްވި ޚާއްސަ ރަސްމިއްޔާތެއްގައެވެ. މި ރަސްމިއްޔާތުގައި އެމްޑީޕީގެ ކުރީގެ ރައީސް އިބްރާހީމް މުހައްމަދު ސާލިހާއި އެމްޑީޕީގެ ޗެއަރޕަރސަން ފައްޔާޒް އިސްމާއީލް ބައިވެރިވެވަޑައިގަތެވެ.
ރައީސް ސާލިހުގެ ވެރިކަމުގެ 5 އަހަރުގެ ދައުރުގައި ނައިބު ރައީސްކަން ކުރެއްވި ފައިސަލް އޭރު ހުންނެވީ ޖުމްހޫރީ ޕާޓީގައެވެ. ފައިސަލް ވަނީ އެ ދައުރުގައި ރައީސް ސާލިހާއެކު ވަރަށް އިޚުލާސްތެރިކަމާއެކު މަސައްކަތް ކުރައްވާފައެވެ. އަދި ފައިސަލްއަށް ރައީސް ސާލިހު ވަނީ ވަރަށް ބޮޑަށް ތައުރީފު ވެސް ކުރައްވާފައެވެ.
ފައިސަލް ވަނީ ވަފާތެރި ނައިބު ރައީސެއްގެ ގޮތުގައި ދައުރު ހަމަކުރައްވައި، ނަމޫނާ ދައްކަވާފައެވެ.
ފައިސަލް ޖޭޕީން ވަކިވެވަޑައިގެންފައިވަނީ 21 ޖެނުއަރީ 2024ގައެވެ.
