ސަޕްލަމެންޓްރީ ބަޖެޓުން ކަނޑައެޅި 100 މިލިއަން ރުފިޔާގެ އިތުރަށް، ނޮވެމްބަރު 17 ވަނަ ދުވަހުގެ ފަހުން އިތުރު އެއްވެސް ފައިސާއެއް ދައުލަތުގެ ބަޖެޓުން މިހާތަނަށް ދީފައި ނުވޭ
ކުރީގެ ރައީސް އިބްރާހީމް މުހައްމަދު ސާލިހު
ކުރީ ސަރުކާރު ނިމެނިކޮށް ރައްޔިތުންގެ މަޖިލީހަށް ފޮނުވި ސަޕްލިމަންޓްރީ ބަޖެޓުން މަސްވެރިންނަށް ކަނޑައެޅި 100 މިލިއަން ރުފިޔާއިން ރައީސް ޑރ. މުހައްމަދު މުއިއްޒު ކުރެއްވީ ހަނީމޫން ދަތުރުފުޅުތަކެއް ކަމަށް ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރައީސް ސާލިހުގެ ވާހަކަފުޅުގައި މަސްވެރިންނަށް ދޭންޖެހޭ ފައިސާ ނުދެވި 3 މަސް ދުވަސްވެއްޖެކަން ފާހަގަކުރެއްވިއެވެ. އަދި ސަޕްލަމެންޓްރީ ބަޖެޓުން ކަނޑައެޅި 100 މިލިއަން ރުފިޔާގެ އިތުރަށް، ނޮވެމްބަރު 17 ވަނަ ދުވަހުގެ ފަހުން އިތުރު އެއްވެސް ފައިސާއެއް ދައުލަތުގެ ބަޖެޓުން މިހާތަނަށް ދީފައި ނުވާ ކަމަށް ވިދާޅުވިއެވެ.
ރައީސް ސާލިހު ވަނީ މަސްވެރިންގެ އަތުން ގަތް މަސް ވިއްކައިގެން ލިބުނު ފައިސާއަށްވީ ގޮތާއި މެދު ސުވާލު އުފައްދަވާފައެވެ. އެމަނިކުފާނު ވިދާޅުވީ ވެގެން އުޅޭގޮތަކީ ސަރުކާރެއް ހިންގަން ނޭނގުން ކަމަށާއި ފައިސާ ގެންގުޅެން ނޭނގުން ކަމަށެވެ. ދައުލަތެއް ހިންގާއިރު އިސްކަން ދޭންޖެހޭ ތަރުތީބުތަކެއް އޮންނާނެކަމަށް ރައީސް ސާލިހު ވިދާޅުވިއެވެ.
ރައީސް ސާލިހު ވިދާޅުވީ ކޮވިޑްގެ ބޮޑު ވަބާގެ ތެރޭގައި ބޯޑަރު ބަންދުކޮށްފައި އޮތް އިރު ދައުލަތަށް ފައިސާ ނުވަންނަ ކަމަށެވެ. އަދި ރިޒަރވްގައި އެއްވެސް ފައިސާއެއް ނެތް ކަމަށެވެ. ނަމަވެސް އެކަން އެ ދުވަހު ރަނގަޅަށް މެނޭޖް ކުރެއްވި ކަމަށް ރައީސް ސާލިހު ވިދާޅުވިއެވެ.
އަދި ރައީސް ސާލިހު ވިދާޅުވީ ހާރިޖީ ސިޔާސަތަކީ ވެސް މުހިންމު އެއްޗެއް ކަމަށާއި ދޭދޭ ގައުމުތަކާއި އޮންނަ ގުޅުމަކީ ވެސް މުހިންމު ކަމެއް ކަމަށެވެ. ދައުލަތުން ބޭނުންވާ ފައިސާ ހޯދުމަށް ބޭރުގެ ފަރާތްތަކާއި ވާހަކަ ދައްކަން ޖެހޭ ކަމަށާއި، މިއަދު އިތުރަށް ފައިސާ ބޭނުންވާ ކަމަށެވެ. މީގެއިތުރުން އިގްތިސާދު ކުރިއަރަމުން ދިޔަ ނަމަވެސް ކުރިއަށް އޮތް 2 އަހަރު ތެރޭގައި ހަމައަކަށް ނޭޅޭނެ ކަމަށެވެ.
ރައީސް ސާލިހު ވިދާޅުވީ މިއަދު ފެންނަމުން މިދަނީ ސިޔާސީ ނުފޫޒު އިލެކްޝަންސް ކޮމިޝަންގެ މައްޗަށް ފޯރުވާތަން ކަމަށެވެ. އަދި ހުރިހާ ސިޔާސީ ޕާޓިތަކުން އެދެނީ ރޯދައިގެ ފަހަށް އިންތިހާބު ފަސްކުރުމަށް ނަމަވެސް އިލެކްޝަންސް ކޮމިޝަނުން ބުނަމުން ދަނީ މަޖުބޫރުވެގެން ތިބި ކަމަށް ކަމަށެވެ. ރައީސް ސާލިހު ވިދާޅުވީ އިލެކްޝަންސް ކޮމިޝަންގެ މައްޗަށް މަޖުބޫރުކަމެއް ނޯންނާނެ ކަމަށާއި މިއަދު އިންތިހާބު ބާއްވާނަމޭ ބުނެފިނަމަ ސަރުކާރުން ޖެހޭނީ އެކަން ކޮށްދޭން ކަމަށެވެ.
