ލިވަޕޫލް އަދި ބަޔާންގެ ލިސްޓުގައި ވެސް އަލޮންސޯ

ބަޔާން މިއުނިކާއި ލިވަޕޫލުން ގެންނަން ބޭނުންވާ ކޯޗުންގެ ލިސްޓުގައި، ސްޕެއިންގެ ޒަބީ އަލޮންސޯ ހިމެނޭ ކަމަށް މީޑިއާ ތަކުން ރިޕޯޓުކޮށްފި އެވެ.

ޖަރުމަނުގެ ބަޔާންގެ ކޯޗުކަމުގައި މިވަގުތު ހުރީ، ޖަރުމަނަށް ނިސްބަތްވާ ތޯމަސް ޓުޗެލް އެވެ. ނަމަވެސް، މިހާރު ކުރިއަށްދާ ސީޒަނަށްފަހު ބަޔާންގެ ކޯޗުކަމުން ވަކިވާން ޓުޗެލް ވަނީ ނިންމައިފަ އެވެ. އެއީ ޓުޗެލް އާއި، ބަޔާންގެ އިސްވެރިންނާ ދެމެދު ކުރިއަށް ގެންދެވުނު މަޝްވަރާތަކަށްފަހު އެވެ. ބަޔާނުން ވަނީ އަންނަ ސީޒަނަށް އައު ކޯޗެއް ހޯދުމުގެ މަސައްކަތް ފަށާނެކަން ވެސް ހާމަކޮށްފަ އެވެ.

ލިވަޕޫލްގެ ކޯޗުކަމުގައި ހުރި ޖަރުމަނަށް ނިސްބަތްވާ ޔާގަން ކްލޮޕް ވެސް ވަނީ މި ސީޒަނަށްފަހު ލިވަޕޫލް ދޫކޮށްލަން ނިންމައިފަ އެވެ. ލިވަޕޫލްގައި ހަތް އަހަރު ހޭދަކުރުމަށްފަހު، ކުލަބު ދޫކޮށްލަން އޭނާ ނިންމި ނިންމުން ވެގެން ދިޔައީ ގިނަ ބަޔަކަށް ހައިރާންކަން ލިބުނު ނިންމުމެކެވެ. ލިވަޕޫލުން އަންނަނީ އަންނަ ސީޒަނަށް އައު ކޯޗެއް ހޯދުމުގެ މަސައްކަތް ކުރަމުންނެވެ.

ބަޔާން އަދި ލިވަޕޫލުން ވެސް، އަންނަ ސީޒަނަށް އައު ކޯޗެެއް ހޯދަން މަސައްކަތް ކުރާއިރު، ދެ ކުލަބުން ބޭނުންވާ ކެންޑިޑޭޓުންގެ ލިސްޓުގައި އުމުރުން 42 އަހަރުގެ އަލޮންސޯ ހިމެނޭ ކަމަށް ވަނީ ރިޕޯޓުކޮށްފަ އެވެ. އަލޮންސޯ މިވަގުތު އިރުޝާދު ދެމުން އަންނަނީ ޖަރުމަނުގެ ބަޔާ ލެވަކޫސަނަށެވެ. 2022 ވަނަ އަހަރު އެ ކުލަބާ ހަވާލުވެ އަލޮންސޯ އަންނަނީ ކާމިޔާބު މަސައްކަތްތަކެއް ކުރަމުންނެވެ. މި ސީޒަންގެ ޖަރުމަނު ލީގުގެ ތާވަލްގެ އެއް ވަނައިގައި ލެވަކޫސަން އޮތްއިރު، ޖަރުމަނު ލީގުގައި ބަލި ނުވެ އޮތް ހަމައެކަނި ޓީމަކީ ވެސް ލެވަކޫސަން އެވެ.

ލެވަކޫސަނާއެކު އަލޮންސޯ ހަދާފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް، އޭނާ ބޭނުން ވެއްޖެ ނަމަ، މި ސީޒަން ނިމުމާއެކު ކުލަބު ދޫކޮށްލުމުގެ ފުރުސަތު އެއްބަސްވުމުގެ ދަށުން އޮވެ އެވެ. ލެވަކޫސަނުން އަންނަނީ އަލޮންސޯގެ އެއްބަސްވުން އިތުރު މުއްދަތަކަށް އައު ކުރުމުގެ މަޝްވަރާތައް ކުރަމުންނެވެ. ނަމަވެސް، މުސްތަޤުބަލާމެދު އަލޮންސޯ ވަކި ގޮތެއް ނިންމައިފައެއް ނުވެ އެވެ.