ދިހަ އަހަރުގެ މެދު ކެނޑުމަށްފަހު އޭޝިއަން ކެރަމް މުބާރާތް ބާއްވަނީ
މުބާރާތް ކުރިއަށް ގެންދިޔުމަށް ތާވަލުކޮށްފައި ވަނީ އޭޕްރީލް މަހުގެ 27 ވަނަ ދުވަހުން ފެށިގެން، މެއި މަހުގެ އެއް ވަނަ ދުވަހަށް، މާލޭގައި
މީގެ ކުރިން ކުޅެފައިވާ ކެރަމް މެޗެއްގެ ތެރެއިން
ދިހަ އަހަރު ދުވަހުގެ މެދު ކެނޑުމަކަށްފަހު، އޭޝިއަން ކެރަމް ޗެމްޕިއަންޝިޕް ބާއްވަން ނިންމައިފި އެވެ.
މިއަހަރުގެ މުބާރާތް ކުރިއަށް ގެންދާނީ ދިވެހި ރާއްޖޭގަ އެވެ. ރާއްޖޭގައި މުބާރާތް ކުރިއަށް ގެންދިޔުމަށް ތާވަލުކޮށްފައި ވަނީ އޭޕްރީލް މަހުގެ 27 ވަނަ ދުވަހުން ފެށިގެން، މެއި މަހުގެ އެއް ވަނަ ދުވަހަށް، މާލޭގަ އެވެ. ރާއްޖޭގައި ކުރިއަށްދާ މި މުބާރާތުގައި 12 ޤައުމަކުން ވާދަކުރާނެ އެވެ. އެއީ ރާއްޖޭގެ އިތުރުން، އިންޑިއާ، ސްރީ ލަންކާ، މެލޭޝިއާ، ކޮރެއާ، ޖަޕާން، ޔޫއޭއީ، ނޭޕާލް، ޕާކިސްތާން، ޤަތަރު، ސިންގަޕޫރު އަދި ބަންގްލަދޭޝް އެވެ.
ރާއްޖެ އިން އަންނަނީ ކެރަމްގެ ބައިނަލްއަޤުވާމީ އެކި އެކި މުބާރާތްތަކުގައި ވާދަކުރަމުންނެވެ. އެގޮތުން ކެރަމް ވޯލްޑް ޗެމްޕިއަންޝިޕް ފަދަ މުބާރާތްތަކުގައި ރާއްޖެ އިން ވާދަކޮށްފައިވާއިރު، ރާއްޖޭގެ ކުޅުންތެރިން ވަނީ ރަނގަޅު ކާމިޔާބީތައް ވެސް ހޯދައިފަ އެވެ. އޭގެ އިތުރުން ދާދި ފަހުން އިންޑިއާގައި ކުރިއަށް ދިޔަ ކެރަމް މުބާރާތެއްގައި ވެސް ރާއްޖޭގެ އަށް ކުޅުންތެރިން ވަނީ ވާދަކޮށްފަ އެވެ.
