ސަލާހު އެނބުރި އައި މެޗުގައި ލަނޑު ޖަހައި، ލިވަޕޫލްގެ މަގާމް ހިފަހައްޓައިދީފި

ސަލާހު އެނބުރި އައި މެޗުގައި ލަނޑު ޖަހައި، ލިވަޕޫލްގެ މަގާމް ހިފަހައްޓައިދީފިއެވެ.

އެފްރިކަން ކަޕް އޮފް ނޭޝަންސްގައި ގައުމީ ޓީމަށް ކުޅުނު ފުރަތަމަ މެޗުގައި ލިބުނު އަނިޔާގެ ސަބަބުން އެ މުބާރާތުގައިވެސް އިތުރަށް ނުކުޅެވުނު މިސްރު ފޯވާޑް, އަނިޔާއަށްފަހު އެނބުރި އައިސް ކުޅުނު ފުރަތަމަ މެޗަކީ ހޮނިހިރު ދުވަހު ބްރެންޓްފޯޑާ ދެކޮޅަށް ކުޅުނު މެޗެވެ. އިނގިރޭސި ޕްރިމިއަރ ލީގުގައި ކުޅުނު މެޗު ލިވަޕޫލުން ކާމިޔާބުކުރީ 4-1ންނެވެ. މެޗުގެ ފުރަތަމަ ހާފުގެ ފަހު މިނިޓްގައި ކުޅެން ނިކުމެ ސަލާހު ވަނީ އެެއް ގޯލް ޖަހައި, އެހެން ގޯލެއް ޖަހަން އެހީތެރިވެދީފައެވެ. ސަލާހު ކުޅެން ނިކުތްއިރު ލިވަޕޫލް ކުރީގައި އޮތީ 1-0ންނެވެ. އެއީ ޑާވިން ނޫނޭޒް ޖެހި ލަނޑުންނެވެ. ލިވަޕޫލްގެ ދެވަނަ ލަނޑު މެކް އަލިސްޓާ ޖެހީ ސަލާހު ތަނަވަސްކޮށްދިން ފުރުސަތަކުންނެވެ. އަދި ތިންވަނަ ގޯލް ޖެހީ ސަލާހުއެވެ. ބްރެންޓްފޯޑްގެ ޓޯނީ ލަނޑެއް ޖަހާފައި ވަނިކޮށް, ލިވަޕޫލަށް ހަތަރުވަނަ ލަނޑެއް ޖެހީ 86 ވަނަ މިނިޓްގައި ގަކްޕޯއެވެ.

މޮޅާއެކު ލިވަޕޫލް އެއްވަނާގައި އޮތީ 25 މެޗުން، 57 ޕޮއިންޓާއެކުއެވެ. މެންޗެސްޓަރ ސިޓީ އޮތީ 23 މެޗުން، 52 ޕޮއިންޓާއެކުއެވެ.