މަޖިލީހަށް އަންހެނުން އިންތިޚާބުކުރާ މިންވަރު އިތުރުކޮށް، ނިންމުންތައް ނިންމާ މަގާމުތަކުގައި އަންހެނުންގެ ދައުރުފުޅާ ކުރަންޖެހޭ: މެންބަރު އީވާ
17 ފެބުރުއަރީ 2024 | ހޮނިހިރު 08:42ރައްޔިތުންގެ މަޖިލީހަށް ގިނަ އަންހެނުން އިންތިޚާބު ކުރުމަކީ ވަރަށް މުހިންމު ކަމެއް
ރައްޔިތުން މަޖިލީހުގެ ގަލޮޅު އުތުރު ދާއިރާގެ މެންބަރު އަދި މަޖިލީހުގެ ކުރީގެ ނައިބު ރައީސް އީވާ އަބްދުﷲ ވާހަކަދައްކަވަނީ
ރައްޔިތުންގެ މަޖިލީހަށް އަންހެނުން އިންތިޚާބުކުރާ މިންވަރު އިތުރުކުރަންޖެހޭ ކަމަށާއި، ނިންމުންތައް ނިންމާ މަގާމުތަކުގައި އަންހެނުންގެ ދައުރުފުޅާ ކުރަންޖެހޭ ކަމަށް މަޖިލީހުގެ ގަލޮޅު އުތުރު ދާއިރާގެ މެންބަރު އަދި މަޖިލީހުގެ ކުރީގެ ނައިބު ރައީސް އީވާ އަބްދުﷲ ވިދާޅުވެއްޖެއެވެ.
ފަލަސުރުހީ ޕްރޮގްރާމްގައި މެންބަރު އީވާ ވިދާޅުވީ ރައްޔިތުންގެ މަޖިލީހަށް ގިނަ އަންހެނުން އިންތިޚާބު ކުރުމަކީ ވަރަށް މުހިންމު ކަމެއް ކަމަށާއި، ކުރިއަށް އޮތްތަނުގައި ގިނަ އަންހެނުން އިންތިޚާބުވާ މަންޒަރު ބަލަން ބޭނުންވާ ކަމަށެވެ.
މެންބަރު އީވާ ވިދާޅުވީ ގައުމެއްގެ ތަރައްގީއާއި ކުރިއެރުމުގައި އަންހެނުން ޝާމިލުވާންޖެހޭ ކަމަށާއި، ބާރުގަދަ މަގާމުތަކާއި، ނިންމުންތައް ނިންމާ ލެވަލްގައި އަންހެނުން ތިބެންޖެހޭ ކަމަށެވެ. މިގޮތަށް ކަންކަން ކުރެވި އަންހެނުންނަށް ފުރުސަތުތައް ލިބޭނަމަ އެ މުޖުތަމައުތަކަށް ކުރިއެރުންތައް ލިބޭ ކަމަށް ދިރާސާތަކުން ވެސް ދައްކާފައިވާ ކަމަށް މެންބަރު އީވާ ވިދާޅުވިއެވެ.
މީގެ އިތުރުން މެންބަރު އީވާ ވިދާޅުވީ އަންހެނުންގެ ހައްގުތައް ކަށަވަރުކޮށް، ބާރުވެރިކުރުވުމަށް ކުރާ މަސައްކަތުގެ ދަށުން މިދިޔަ ފަސްއަހަރުގެ ތެރޭގައި ކޮންމެ އަހަރަކު ވެސް މަދުވެގެން އެއްފަހަރު އަންހެނުންގެ ހައްގުގައި މަޖިލީހުގައި ވަކާލާތުކޮށްފައިވާ ކަމަށެވެ.
ކުރިއަށް އޮތް ރައްޔިތުން މަޖިލީހުގެ އިންތިޚާބަށް އިޝާރާތް ކުރައްވައި މެންބަރު އީވާ ވިދާޅުވީ މިފަހަރުގެ އިންތިޚާބުގައި އެންމެ ގިނަ އަންހެނުން ނުކުންނަ ސިޔާސީ ޕާޓީއަކީ ދަ ޑިމޮކްރެޓްސް ކަމަށެވެ. އެއީ ފަހުރުވެރިވާ މަސައްކަތެއްގެ ގޮތުގައި މެންބަރު އީވާ ފާހަގަކުރެއްވިއެވެ.
