ހަނގުރާމައިގެ އެކި ސަރަހައްދުތަކުގައި ތިބި ދިވެހިންގެ އަދަދު އަދިވެސް ކަށަވަރެއް ނުވޭ، މަސައްކަތް ދަނީ ކުރަމުން: މިނިސްޓަރު އިހުސާން
17 ފެބުރުއަރީ 2024 | ހޮނިހިރު 07:16އާއިލާތަކުންނާއި، އިންޓެލިޖެންސް އަދި ބޭރުގެ އެކި އިދާރާތަކާއި ގުޅިގެން މައުލޫމާތު ހޯދާ
ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހުސާން ވާހަކަދައްކަވަނީ
ހަނގުރާމައިގެ އެކި ސަރަހައްދުތަކުގައި ތިބި ދިވެހިންގެ އަދަދު އަދިވެސް ކަށަވަރު ކުރެވިފައިނުވާ ކަމަށާއި، އައިޑެންޓިފައި ކުރުމުގެ މަސައްކަތްތައް ކުރަމުންދާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ހޯމް މިނިސްޓްރީއާއި އެ މިނިސްޓްރީގެ ދަށުން ހިންގާ އިދާރާތަކުންގެ މަސައްކަތްތަކާއި ގުޅޭގޮތުން މައުލޫމާތު ދިނުމަށް ދާދިފަހުން ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު އިހުސާން ވިދާޅުވީ ހަނގުރާމަ ހިނގާ އެކި ސަރަހައްދުތަކުގައި ތިބި ދިވެހިންގެ މައުލޫމާތު ލިބެމުންދާ ކަމަށާއި، އެ މައުލޫމާތުގެ ސައްހަކަން ކަށަވަރުކުރުމުގެ މަސައްކަތް ކުރަމުންދާ ކަމަށެވެ. އެގޮތުން އެ އާއިލާތަކުންނާއި، އިންޓެލިޖެންސް އަދި ބޭރުގެ އެކި އިދާރާތަކާއި ގުޅިގެން މައުލޫމާތު ހޯދަމުންދާ ކަމަށް އިހުސާން ވިދާޅުވިއެވެ.
އިހުސާން ވިދާޅުވީ ބައެއް ސަރަހައްދުތަކަށް ގޮސް އެމީހުންގެ ޑީއެންއޭ ޓެސްޓު ކުރަންޖެހޭ ކަމަށާއި، ދިވެހިންތޯ ކަށަވަރުކުރަން ޖެހޭ ކަމަށެވެ. ނަމަވެސް އެ ސަރަހައްދުތަކަށް އެކްސެސްވުމުގެ ހުއްދަ ނުލިބޭކަން މިނިސްޓަރު ފާހަގަކުރެއްވިއެވެ. އަދި ވިދާޅުވީ ހަނގުރާމައިގެ އެކި ސަރަހައްދުތަކުގައި 100ށް ވުރެ ގިނަ ދިވެހިން އެބަތިބި ކަމަށް ކަށަވަރުކުރެވިފައިވާ ކަމަށާއި، ސީދާ އަދަދު ހާމަކުރަން ދަތިކަމަށެވެ.
ސީރިއާ ހަނގުރާމައިގައި ބައިވެރިވާން ދިޔަ ދިވެހިން، ގެންދިޔަ އާއިލާތަކުގެ ތެރެއިން ފަސް އާއިލާއެއްގެ 21 މީހުން ވަނީ 16 ޖެނުއަރީ 2024 ގައި ސަރުކާރުގެ އެހީތެރިކަމާއެކު މާލެ ގެނެސްފައެވެ. އެމީހުން ރާއްޖެ ގެނައީ ތުރުކީ މަގުންނެވެ. އެ މީހުންގެ ތެރޭގައި 15 ކުޑަކުދިންނާއި ފަސް އަންހެނުންނާއި ފިރިހެނަކު ހިމެނެ އެވެ.
ސީރިއާގެ ކޭމްޕުތަކުގައި ތިބި ދިވެހިން ގެނައުމުގެ މަސައްކަތް ފުރަތަމަ ކުރަން ފެށީ ނިމިދިޔަ ސަރުކާރުންނެވެ.
