ޑެޕިއުޓީ ކޮމިޝަނާ އޮފް ޕޮލިސް (ޑީސީޕީ)ގެ މަގާމަށް އެސިސްޓެންޓް ކޮމިޝަނާ އޮފް ޕޮލިސްގެ މަގާމުގައި ތިއްބެވި އިސްމާއިލް ނަވީންއާއި ފަރުހާދު ފިކުރީ އައްޔަނުކުރައްވައިފިއެވެ.
މި ދެބޭފުޅުން މަގާމަށް އައްޔަނުކޮށް، މަގާމުގެ ލިޔުން ހަވާލުކޮށްފައިވަނީ ހުކުރު ދުވަހު އިސްކަންދަރު ބިލްޑިންގައި ބޭއްވި ޚާއްސަ ރަސްމިއްޔާތެއްގައެވެ. އެ ދެބޭފުޅުން މަގާމަށް އައްޔަނުކުރެއްވި ކަމުގެ ލިޔުން ދެއްވީ ހޯމްލޭންޑް އެންޑް ސެކިޔުރިޓީ މިނިސްޓަރު އަލީ އިހުސާންއެވެ.
ޑީސީޕީގެ މަގާމަކީ ނައިބު ވަޒީރުންގެ ފެންވަރުގެ މަގާމަކަށް ވާއިރު، މި މަގާމަށް އައްޔަނުކުރެއްވުމުގެ ކުރިން، ފަރުހާދު ހުންނެވީ ހެޑް އޮފް އޮޕަރޭޝަނަލް ސަޕޯޓް ކޮމާންޑް އަދި ޕީޕަލްސް ޑައިރެކްޓްރޭޓްގެ އެކްޑިން ހެޑްގެ މަގާމުގައެވެ. އަދި ފަރުހާދު ވަނީ ނިމުނު ސަރުކާރުގެ ޕޮލިސް ކޮމިޝަނަރަކަށް ހުންނެވި މުހައްމަދު ހަމީދު ފުލުހުންގެ ޚިދުމަތުން ރިޓަޔާ ކުރެއްވުމާ ގުޅިގެން، ވަގުތީ ގޮތުން ޕޮލިސް ކޮމިޝަނަރުކަން ވެސް އަދާކުރައްވާފައެވެ.
މީގެ އިތުރުން، ސީޕީގެ މަގާމު ހުސްވުމާ ގުޅިގެން އޭގެ ފަހުން ޕޮލިސް ކޮމިޝަރުކަމަށް އައްޔަނުކުރުމަށް ހުޅުވުނު ފުރުސަތުގައި، އޭސީޕީއަކަށް އައްޔަނުކުރެވުނު ނަވީން ވަނީ އެ މަގާމަށް ކުރިމަތިލައްވައިފައެވެ. އެހެން ނަމަވެސް ޕޮލިސް ކޮމިޝަނަރުކަމަށް އައްޔަނުކުރެއްވުނީ މިހާރުގެ ސީޕީ، އަލީ ޝުޖާއުއެވެ.
