ޑޮލަރުގެ ތާށިކަމަށް ޙައްލު ގެނެވޭނީ އިޤްތިސާދީ ގޮތުން ގެންނަންޖެހޭ އިސްލާޙުތައް ގެނެވުމުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.

އާންމުންގެ ސުވާލަކަށް މީސްމީޑިއާ މެދުވެރިކޮށް ފޮނުއްވެވި ޖަވާބުގައި ރައީސް ވިދާޅުވީ، ޑޮލަރުގެ ތާށިކަން ގެނެވޭނީ އިޤްތިސާދީ ގޮތުން ގެންނަންޖެހޭ އިސްލާޙުތައް ގެނެވުމުންކަމަށެވެ.

ރައީސް ވިދާޅުވީ، ބިޔަ، ބޮޑެތި މަޝްރޫއުތައް ހިނގަން ފެށުމުންނާއި، އިންވެސްޓްމަންޓުުތައް ގިނަވާން ފެށުމުން ޑޮލަރު ތިޔާޤިވާނެ ކަމަށާއި ޑޮލަރު ލިބުން އަވަސްވާނެ ކަމަށެވެ.

ރައީސް އެހެން ވިދާޅުވެފައިވާއިރު، ބޭންކް އޮފް މޯލްޑިވްސް (ބީއެމްއެލް) އިން ދޫކޮށްފައިވާ ކްރެޑިޓް ކާޑުތަކާއި ޑެބިޓް ކާޑުތަކުން ޑޮލަރު ނެގޭ މިންވަރު ކުޑަ ކުރަން ނިންމާފައިވާކަމުގެ ވާހަކަތަކެއް ދަނީ ދެކެވެމުންނެވެ، ނަމަވެސް އެކަން ސަރުކާރުން ވަނީ ދޮގުކޮށްފައެވެ.

ފިނޭންސް މިނިސްޓްރީން ބުނެފައިވަނީ ކްރެޑިޓް ކާޑުތަކާއި ޑެބިޓް ކާޑުތަކުން ބޭރު ފައިސާ ނަގަން ކަނޑައަޅާފައިވާ މިންވަރު ކުޑަކުރުމަށް އެއްވެސް ނިންމުމެއް ބީއެމްއެލުން އަދި ނިންމާފައިނުވާ ކަމުގެ ޔަގީންކަން އެބޭންކުން މިނިސްޓްރީއަށް ދީފައިވާކަމަށެވެ.

އެކަމާ ގުޅޭގޮތުން ބީއެމްއެލް އިން ބުނީ ބޭރު ފައިސާ ލިބުމުގައި ބޭންކަށް ދިމާވި ދަތިތަކާއި ގުޅިގެން ރުފިޔާ އެކައުންޓްތަކުން ބޭރު ފައިސާގެ މުއާމަލާތްތައް ކުރުމަށް މިހާރު ކަނޑައަޅާފައިވާ ކާޑު ލިމިޓްތައް މުރާޖައާކުރަމުންދާ ކަމަށެވެ. ނަމަވެސް އަދި ލިމިޓެއް ކަނޑައަޅާފައިނުވާ ކަމަށާއި އައު ލިމިޓަކަށް އަމަލުކުރަން ފަށާނެ ތާރީޚެއް ވެސް ކަނޑަނާޅާ ކަމަށް ވަނީ ބުނެފައެވެ.