ފުލުހުން ބަލަމުންދާ މައްސަލައެއްގެ ތަހުގީގަށް ދެ މީހަކު ހޯދަން އިޢުލާންކޮށްފިއެވެ.

ފުލުހުން ބުނީ މ. މުލީ ޕޮލިސް ސްޓޭޝަނުން ތަހުގީގުކުރަމުންދާ މަކާރާއި ހީލަތުން 400 ޑޮލަރު ހޯދާފައިވާކަމަށް ތުހުމަތުކުރެވޭ މައްސަލައެއްގެ ތަހުގީގަށް ދެ މީހަކު ހާޒިރުކުރުމަށް ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާކަމަށެވެ. އެހެންކަމުން އެ މީހުން ހޯދުމަށް ވަނީ އިޢުލާންކޮށްފައެވެ.

ފުލުހުން ހޯދަމުން ދަނީ ކ. މާލެ / މއ. ކެދިފަށުވިގެ އުމުރުން 61 އަހަރުގެ ޢަބްދުﷲ މުޙައްމަދު އަދި ކ. މާލެ / މއ. ޑޯރެންސީވިލާ އުމުރުން 42 އަހަރުގެ އިސްމާޢީލް ޝިމާމް އެވެ. އެ ދެ މީހުން ވެސް ހާޒިރުކުރަނީ މައްސަލައިގެ ތަހުގީގަށް، ސުވާލުކުރުމަށެވެ.

އެ މީހުން ހާޒިރުވާން އަންގާފައި ވަނީ މ. މުލީ ޕޮލިސް ސްޓޭޝަނަށެވެ. އަދި  2024 ފެބްރުއަރީ 24 ވަނަ ދުވަހުގެ 10:00އަށް ހާޒިރުވާން ވަނީ އަންގާފައެވެ.