އަބަދުވެސް އެމްޑީޕީއަށް ވަފާތެރިވާނަން: އާޒިމް
15 ފެބުރުއަރީ 2024 | ބުރާސްފަތި 04:00މާލެއަކީ ރައްޔިތުންނަށް ހިތްފަސޭހަ ތަނަކަށް ހެދުމަކީ އެންމެ ބޮޑު އެއް އަމާޒު
މާލެސިޓީ މޭޔަރު އާދަމް އާޒިމް
އަބަދުވެސް އެމްޑީޕީއަށް ވަފާތެރިވާނެކަމަށް މާލެސިޓީ މޭޔަރު އާދަމް އާޒިމް ވިދާޅުވެއްޖެއެވެ.
ބުރާސްފަތި ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން އާޒިމް ވިދާޅުވީ، އެމްޑީޕީއަށް ވަފާތެރިވާނެކަމާމެދު ސުވާލު އުފެއްދޭނެ އެއްވެސް ސަބަބެއް ނެތްކަމަށެވެ. އެގޮތުން މަޤާމަށް ވަޑައިގެންނެވީ އެމްޑީޕީގެ ސިޔާސަތުތަކާއެކުކަން އާޒިމް ފާހަގަ ކުރެއްވިއެވެ.
އެ ސިޔާސަތުތައް ނަގަހައްޓައި ދެމެހެއްޓުމަކީ އެންމެ ބޮޑު އެއް އަމާޒުކަން އާޒިމް ފާހަގަ ކުރެއްވިއެވެ.
އުއްމީދަކީ އެމްޑީޕީގެ މޭޔަރެއްގެ ގޮތުގައި ދައުރު ނިންމަވާލެއްވުން ކަމަށާއި، އެމްޑީޕީގެ ފިކުރު ބަދަލެއް ނުވާނެކަމަށް އާޒިމް ވިދާޅުވިއެވެ.
އާޒިމް ވިދާޅުވީ، ރައްޔިތުންނަށް ރަނގަޅުވާނެ ކަންކަން ހިމެނިފައިވަނީވެސް އެމްޑީޕީގެ ފިކުރުގެ ތެރޭގައި ކަމަށެވެ. ޕާޓީއަށް ގުޅިވަޑައިގެންނެވީވެސް އެ ސަބަބާހުރެކަން އާޒިމް ފާހަގަ ކުރެއްވިއެވެ.
އެއްވެސް މީހަކާމެދު ސިޓީ ކައުންސިލުން ފަރުވާކުޑައެއް ނުކުރާނެ ކަމަށާއި އާންމުންގެ ކަންބޮޑުވުންތަކަށް ޙައްލު ހޯދުމަށް ކައުންސިލުން އަބަދުވެސް އިސްކަންދޭނެ ކަމަށް އާޒިމް ވަނީ ވިދާޅުވެފައެވެ.
އަދި ރައްޔިތުންނަށް ދަތިތައް ކުރިމަތިވާ ކަންކަމުގައި ސަރުކާރުގެ އިދާރާތަކާއި ގުޅިގެން ކުރަންޖެހޭ މަސައްކަތްތައް އަވަސް ކުރައްވާނެކަމަށް ވެސް މޭޔަރު ވިދާޅުވިއެވެ.
އާޒިމް ވިދާޅުވީ، މާލޭގެ މަގުތައް ހެދުމާއި، މާލެއަކީ ރައްޔިތުންނަށް ހިތްފަސޭހަ ތަނަކަށް ހެދުމަކީ އެންމެ ބޮޑު އެއް އަމާޒު ކަމަށެވެ. އެކަމަށްޓަކައި ގުޅުންހުރި އިދާރާތަކާއެކު ކުރަންޖެހޭ މަސައްކަތްތައް ކުރައްވާނެކަމަށް އާޒިމް ވިދާޅުވިއެވެ.
