ސަރުކާރު ޖަވާބުދާރީކުރުވުމުގައި އެންމެ ގިނަ މަސައްކަތްތަކެއް މިހާތަނަށް ކޮށްފައިވަނީ ހިނގަމުންމިދާ 19 ވަނަ ރައްޔިތުންގެ މަޖިލީހުގައި ކަމަށް ވިލިނގިލި ދާއިރާގެ މެންބަރު ސައުދު ހުސައިން ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ސައުދު ވިދާޅުވީ 19 ވަނަ ރައްޔިތުންގެ މަޖިލީހަކީ ރައްޔިތުންގެ ފުރިހަމަ އިތުބާރާއެކު އެމްޑީޕީއަށް ސުޕަރމެޖޯރިޓީ ދީގެން ހިނގަމުން އަންނަ މަޖިލީހެއްކަމަށެވެ. އެމްޑީޕީން ރައްޔިތުންގެ މަޖިލީހުގައި މިފަސް އަހަރު އަދާކުރި ދައުރަށް ބަލާއިރު އެމްޑީޕީގެ ސަރުކާރު އޮތްއިރު ވެސް 19 ވަނަ ރައްޔިތުންގެ މަޖިލިސް ވެގެންދިޔައީ ދިވެހި ތާރީޚުގައި މިވީ ހިސާބަށް ސަރުކާރު ޖަވާބު ދާރީކުރުވުމަށް އެންމެ ގިނަ މަސައްކަތްކުރި މަޖިލީހަށްކަމަށެވެ.

އެމްޑީޕީގެ ވެރިކަމުގައިވެސް ސަރުކާރު ތެރޭގައި ހިނގަމުންދިޔަ ގޯސްކަންތައްތައް ރައްޔިތުންނާ ހަމައަށް ގެނެސްދީ އެކަމުގެ އަޑުއުފުލާ ޖަވާބުދާރީކުރުވުމުގެ މަސައްކަތް ރައްޔިތުންގެ މަޖިލީހުން ކޮށްފައިވާކަމަށް ސައުދު ވިދާޅުވިއެވެ.

ސައުދު ވިދާޅުވީ 2023 ވަނަ އަހަރު ސަރުކާރު ބަދަލުވެގެންދިޔުމާއެކު މިހާރު ފެންނަމުންދަނީ މިއަދުގެ ސަރުކާރުން ރައްޔިތުންގެ މަޖިލީހަކީ އޮންނަންޖެހޭކަމަށް ގަބޫލުނުކުރާ ތަނެއްގެ ގޮތުގައި ދެކެމުން އަންނަ ތަނެއްގެ ގޮތުގައިކަމަށެވެ. އެގޮތުން ވަޒީރަކަށް ރުހުން ނުދިނުމަކީ މަޖިލީހަށް ލިބިގެންވާ ބާރެއް ނޫންކަމަށް ސަރުކާރުން ދެކޭކަމަށާއި ވަޒީރަކާއި ސުވާލުކުރުމަކީ ވެސް އެއީ ކުރެވިގެންވާނެ ކަމެއްކަމަށް ސަރުކާރުން ނުދެކޭކަމަށް ސައުދު ވިދާޅުވިއެވެ.

މިއާއެކު ދެން މަގުފަހިވެގެންދަނީ އަނދިރި ދައުލަތެއް ގާއިމުވެގެންދިޔުމަށްކަމަށް ސައުދު ވިދާޅުވިއެވެ. މިއަދުގެ ސަރުކާރުން ރައްޔިތުންގެ މަޖިލީހަށް ޤާނޫނު އަސާސީން ލިބިދީފައިވާ ބާރުތައް އެއީ ލިބިފައިވާ ބާރުތަކެއްގެ ގޮތުގައި ނުދެކޭކަމަށް ސައުދު ވިދާޅުވިއެވެ.