ރުހުން ނެތް ވަޒީރުން މަޤާމުގައި ތިބުމަކީ ރައްޔިތުންނަށް ގެއްލުން ލިބޭ ކަންކަން ކުރުމަށް ފަހު ރެކެން ލިބޭ ފުރުސަތެއް - ހަސަން ލަތީފް
ވަޒީރުންތަކެއް މަގާމުތަކުގައި ތިއްބެވުމުން ނުރައްކާތެރި ނަތީޖާއެއް ނުކުމެދާނެ ކަމެއް ކަމަށް ވެސް އޭނާ ވަނީ ވިދާޅުވެފަ
ހަސަން ލަތީފް
ރުހުން ނެތް ވަޒީރުން މަޤާމުގައި ތިބުމަކީ ރައްޔިތުންނަށް ގެއްލުން ލިބޭ ކަންކަން ކުރުމަށް ފަހު ރެކެން ލިބެ ފުރުސަތެއްކަމަށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.
އޭނާ އެހެން ވިދާޅުވެފައިވަނީ ރައްޔިތުންގެ މަޖިލީހުން ރުހުން ނުދިން 3 ވަޒީރުން އަލުން މަޤާމަށް އައްޔަންކުރުމާއި ގުޅިގެން ގަލޮޅު އުތުރު ދާއިރާގެ މެމްބަރު އީވާ އަބްދުﷲ ހުށަހަޅާފައިވާ ޤަރާރަށް ބަހުސްކުރައްވަމުންނެވެ. ހަސަން ލަތީފް ވިދާޅުވީ ރައްޔިތުންގެ މަޖިލީހުން ސަރުކާރުގެ ވަޒީރުންނަށް ރުހުންދޭން ޖެހޭތޯ ނުވަތަ ނޫންތޯ ބައެއް ފަރާތްތަކުން ސުވާލު އުފައްދަމުންދާކަމަށެވެ. ޤާނޫނު އަސާސީގައި އެކަން ކުރަން ޖެހޭ ގޮތް ވަރަށް ސާފުކޮށް ބަޔާންކޮށްފައިވާ ކަަމަށާއި، އެކަމާއި ގުޅިގެން ދިމާވާ މައްސަލަތަކުގެ ހައްލުވެސް ވަރަށް ސާފުކޮށް ބަޔާންކޮށްފައިވާ ކަމަށް އޭނާ ވިދާޅުވިއެވެ. މަޖިލީހުން ރުހުން ނުދޭ ބަޔަކަށް ވަޒީރުންގެ މަޖިލީހުގައި ނުތިބެވޭނެކަން ރާއްޖޭގެ ޤާނޫނުއަސާސީން ވަރަށް ސާފުކޮށް އެނގޭ ކަމަށް ވެސް އޭނާ ވަނީ ވިދާޅުވެފައެވެ. ރުހުން ނުދޭ ވަޒީރަކަށް ވަޒީރުކަމުގެ މަޤާމުގައި ނުހުރެވޭނެ ސަބަބަކީ ވަޒީރުކަމުގެ ޝަރުތުތަކުގެ ތެރޭގައި ވަޒީރަށް މަޖިލީހުގެ ރުހުން ލިބުން ހިމެނުން ކަމަށް އޭނާ ވަނީ ވިދާޅުވެފައެވެ.
ރުހުން ނުލިބޭ ވަޒީރުންތަކެއް މަގާމުތަކުގައި ތިއްބެވުމުން ނުރައްކާތެރި ނަތީޖާއެއް ނުކުމެދާނެ ކަމެއް ކަމަށް ވެސް އޭނާ ވަނީ ވިދާޅުވެފައެވެ. އެއީ ވަޒީރުކަމުގައި ހުންނަ އިރު ރައްޔިތުންނަށް ބޮޑެތި ގެއްލުންތައް ވާގޮތަށް އަމަލުކުރެއްވުމަށް ފަހު އެ މީހާ އަކީ ވަޒީރެއް ނޫންކަަމަށް ދެއްކުމަށް ފަހު އޭނާ އަށް ޒިންމާއިން ރެކުމުގެ ފުރުސަތު އޮތް ކަމަށް އޭނާ ވިދާޅުވިއެވެ. މިސާލަކަށް ބަންޑާރަނައިބަށް މަޖިލީހުގެ ރުހުން ނެތި މަޤާމުގައި ދެމިހުންނެވުނު ނަމަވެސް އޭނާގެ ޤާނޫނީ ޒިންމާ އެއް ނެތްކަމަށް ހަސަން ވަނީ ވިދާޅުވެފައެވެ. ދައުލަތް ތަމްސީލްކުރަން އޭނާ ކޯޓުގައި ވަކާލާތުކުރާނަމަ އޭނާ ވަކާލާތުކުރާ ކަންކަމާއި މެދު ސުވާލު އުފެއްދުމުގެ ފުރުސަތުވެސް އޮތް ކަމަށް ހަސަން ވަނީ ވިދާޅުވެފައެވެ.
އީވާ ހުށަހަޅުއްވާފައިވާ ގަރާރުގައި ދިވެހި ގައުމުގެ މަސްލަހަތު އިސްކޮށްދެއްވައި، މިކަމާމެދު އަލުން ވިސްނާވަޑައިގެން، ގާނޫނު އަސާސީއަށް އިހުތިރާމްކުރައްވައި، ގާނޫނުއަސާސީއާ އެއްގޮތަށް އަމަލުކުރެއްވުމަށް މި ގަރާރުގައި ވަނީ ގޮވާލާފައެވެ. ރައްޔިތުންގެ މަޖިލީހުގެ ރުހުން ނުލިބޭ 3 ފަރާތެއް ވަޒީރުންގެ މަޖިލީހަށް އަލުން އައްޔަންކޮށް މަގާމުގެ މަސްއޫލިއްޔަތު އަދާކުރަން ފަށާފައިވާއިރު، އެ ނިންމެވުމަކީ ރައްޔިތުންގެ މަޖިލީހުގެ ގާނޫނީ ބާރުވެރިކަމަށް ކަނޑައެޅިގެން ގޮންޖައްސަވައި ގާނޫނުއަސާސީއާއި ގާނޫނާ ޚިލާފު ނިންމުމެއް ކަމަށް އެ ގަރާރުގައި ވަނީ ބުނެފައެވެ. އަދި ރައްޔިތުން މަޖިލީހުގެ ރުހުން ލިބިފައިނުވާ 3 މެންބަރުންގެ ތެރޭގައި އެޓަރނީ ޖެނެރަލްގެ މަގާމަށް އައްޔަންކުރައްވާފައިވާ އުޝާމް ހިމެނޭކަމާއި ގާނޫނުއަސާސީގެ 133 ވަނަ މާއްދާގައި އެޓަރނީ ޖެނެރަލްގެ މަސްއޫލިއްޔަތު ބަޔާންކޮށްފައިވާއިރު، ދައުލަތާ ގުޅުންހުރި ގާނޫނީ އެންމެހައި ކަންކަމުގައި ސަރުކާރަށް ލަފާދިނުމާއި، ގާނޫނުގެ ވެރިކަން ނަގަހައްޓައި ހިމާޔަތްކޮށް ކުރިއެރުވުމާއި، ރައްޔިތުންގެ ސަލާމަތާއި ރައްޔިތުންގެ މަންފާއާއި އާންމު މިނިވަންކަން ދިފާއުކުރުމަށް މަސައްކަތްކުރުން ހިމެނޭ ކަމަށެވެ. އަދި މަޖިލީހުގެ ރުހުން ނުލިބުނު ނަމަވެސް 29 ޖަނަވަރީ 2024ގައި އެޓަރނީ ޖެނެރަލްގެ މަގާމަށް ރައީސުލްޖުމްހޫރިއްޔާ އަލުން އެފަރާތް އައްޔަންކުރައްވާފައިވާ ކަމަށެވެ. އެ ފަރާތުން މަގާމުގެ ހުވާކުރައްވާފައިވާކަން ޚާއްސަގޮތެއްގައި ފާހަގަކުރެވޭ ކަމަށް ގަރާރުގައި ބުނެފައިވެއެވެ.
