ވަޒީރުންނަށް ރުހުން ނުދިނުމުން އެކަން ބޮލާލާޖެހުމަކީ ޤާނޫނު އަސާސީ ބޮލާލާޖެހުން ކަމަށް މަޖިލީހުގެ ގަލޮޅު އުތުރު ދާއިރާގެ މެންބަރު އަދި މަޖިލީހުގެ ކުރީގެ ނައިބު ރައީސް އީވާ އަބްދުﷲ ވިދާޅުވެއްޖެއެވެ.

މި ސަރުކާރުގެ ވަޒީރުންނަށް ރުހުން ދިނުމާ މެދު ގޮތެއް ނިންމުމަށް މިދިޔަ މަހުގެ 29 ގައި ބޭއްވި ޖަލްސާގައި 3 ވަޒީރަކަށް ރުހުން ލިބިފައެއް ނުވެއެވެ. އެއީ ހައުސިން މިނިސްޓަރުކަމަށް ޑރ. އަލީ ހައިދަރާއި އިސްލާމިކް މިނިސްޓަރުކަމަށް ޑރ. މުހައްމަދު ޝަހީމް އަލީ ސައީދުގެ އިތުރުން ބަންޑާރަ ނައިބުކަމަށް އަހުމަދު އުޝާމްއެވެ. ނަމަވެސް އެ ބޭފުޅުން އަލުން މަޤާމަށް އައްޔަނުކުރައްވާ ރައީސް ޑރ.މުހައްމަދު މުއިއްޒު ވަނީ އެ ބޭފުޅުންނަށް ރުހުން ހޯދަން މަޖިލީހަށް ހުށަހަޅުއްވާފައެވެ. އެއީ ޤާނޫނު އަސާސީއާ ޚިލާފުކަމެއް ކަމަށް ފާހަގަކުރައްވާ ދިވެހި ގައުމުގެ މަސްލަހަތު އިސްކޮށްދެއްވައި، މިކަމާމެދު އަލުން ވިސްނާވަޑައިގެން، ގާނޫނު އަސާސީއަށް އިހުތިރާމްކުރައްވައި، ގާނޫނުއަސާސީއާ އެއްގޮތަށް އަމަލުކުރެއްވުމަށް ގޮވާލައްވާ މެންބަރު އީވާ ވަނީ މަޖިލީހަށް ގަރާރެއް ހުށަހަޅުއްވާފައެވެ.

އަންގާރަ ދުވަހު އެ ގަރާރާއި ގުޅޭގޮތުން މަޖިލީހުގައި ވާހަކަދައްކަވަމުން އީވާ ވިދާޅުވީ މި ގަރާރު ހުށަހެޅުއްވީ ރައްޔިތުންގެ މަޖިލީހަށް ލިބިފައިވާ ޗެކް އެންޑް ބެލެންސް ނުވަތަ ފާރަވެރިވުމާއި ޖަވާބުދާރީވުމުގެ ނިޒާމް މުހިންމުވާތީ ކަމަށެވެ. ރައްޔިތުންގެ ވަކާލާތު އިވެނީ އެ ބާރުގެ ތެރެއިން ކަމަށް ވެސް އީވާ ފާހަގަކުރެއްވިއެވެ. އީވާ ވިދާޅުވީ ރުހުން ނުލިބުނު ވަޒީރުން އަލުން މަޤާމަށް އައްޔަނުކުރައްވާފައިވަނީ ޤާނޫނު އަސާސީގެ 70 އަދި 129 ވަނަ މާއްދާ ބޮލާލާޖެހުމަށް ފަހުގައި ކަމަށެވެ. އަދި އެއީ ސުޕްރީމްކޯޓުގެ ހުކުމަކާއި ވެސް ޚިލާފުވުން ކަމަށް އީވާ ވިދާޅުވިއެވެ. މިއީ ރައްޔިތުންގެ މަޖިލީހުގެ ބާރުތަކަށް އަރައިގަތުން ކަމަށް ފާހަގަކުރައްވާ އީވާ ވިދާޅުވީ މިއީ ދައުލަތް ހިނގާ ނިޒާމަށް އިހުތިރާމް ނުކޮށް، އެ ނިޒާމަށް ލޮޅުން އަރުވާލުމުގެ އަމަލެއް ކަމަށެވެ. އެއީ ދައުލަތް ހިންގާ އެއް ބާރަށް އަރައިގަތުން ކަމަށް ވެސް އެނާ ވިދާޅުވިއެވެ. އިތުރަށް އީވާ ވިދާޅުވީ ސަރުކާރުގެ ފަރާތުން ފެންނަނީ ދައުލަތާއި ސަރުކާރަށް ކުރާ އިތުބާރު ގެއްލިދާނެ ފަދަ ބިރުވެރި އަމަލެއް ކަމަށާއި މަޖިލީހުގެ ބާރުތަކަށް އަރައިނުގަތުމަށް މެންބަރު އީވާ ވަނީ ގޮވާލައްވާފައެވެ.

ރައްޔިތުންގެ މަޖިލީހުގެ ރުހުން ނުލިބޭ 3 ބޭފުޅެއް ވަޒީރުންގެ މަޖިލީހަށް އަލުން އައްޔަނުކުރައްވާ މަގާމުގެ މަސްއޫލިއްޔަތު އަދާކުރައްވަން ފަށާފައިވާއިރު، އެ ނިންމެވުމަކީ ރައްޔިތުންގެ މަޖިލީހުގެ ގާނޫނީ ބާރުވެރިކަމަށް ކަނޑައެޅިގެން ގޮންޖައްސަވައި ގާނޫނުއަސާސީއާއި ގާނޫނާ ޚިލާފު ނިންމުމެއް ކަމަށް މެންބަރު އީވާ ހުށަހެޅުއްވި މި ގަރާރުގައި ވަނީ ބުނެފައެވެ. އަދި ރައްޔިތުން މަޖިލީހުގެ ރުހުން ލިބިފައިނުވާ 3 މެންބަރުންގެ ތެރޭގައި އެޓަރނީ ޖެނެރަލްގެ މަގާމަށް އައްޔަންކުރައްވާފައިވާ އުޝާމް ހިމެނޭކަން ޚާއްސަގޮތެއްގައި ފާހަގަކޮށްފައިވެއެވެ.

އެގޮތުން ގާނޫނުއަސާސީގެ 133 ވަނަ މާއްދާގައި އެޓަރނީ ޖެނެރަލްގެ މަސްއޫލިއްޔަތުތަކުގައި ދައުލަތާ ގުޅުންހުރި ގާނޫނީ އެންމެހައި ކަންކަމުގައި ސަރުކާރަށް ލަފާދިނުމާއި ގާނޫނުގެ ވެރިކަން ނަގަހައްޓައި ހިމާޔަތްކޮށް ކުރިއެރުވުމާއި ރައްޔިތުންގެ ސަލާމަތާއި ރައްޔިތުންގެ މަންފާއާއި އާންމު މިނިވަންކަން ދިފާއުކުރުމަށް މަސައްކަތްކުރުން ހިމެނޭކަން ފާހަގަކޮށްފައިވެއެވެ.