ނިމިދިޔަ ސަރުކާރުގެ ނިންމުމަށް ގޮންޖަހައި، މަސް ގަންނަ އަގު 20ރ. އަށް ކުޑަކުރަނީ
މިފްކޯ އިން މަސް ގަންނަ އަގު 20 ރުފިޔާއަށް ކުޑަކުރުމަށް ނިންމާފައިވަނީ ހޯމަ ދުވަހުން ފެށިގެން
މަސްވެރިއެއް
ކުރީގެ ރައީސް އިބްރާހިމް މުޙައްމަދު ޞޯލިޙްގެ ސަރުކާރުގެ ނިންމުމަށް ގޮންޖަހައި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މަސް ގަންނަ އަގު 20 ރުފިޔާއަށް ކުޑަކުރުމަށް ނިންމައިފިއެވެ.
ނިމިދިޔަ ސަރުކާރު ނިމެން ގާތްވެފައިވަނިކޮށް، މަސް ކިލޯއެއްގެ އަގު 25 ރުފިޔާއަށް ބޮޑުކުރައްވަން ރައީސް ޞޯލިޙް ނިންމެވިއެވެ. އެގޮތުން އެ ފަހަރު އެ ނިންމެވުން ނިންމީ، ޔޫރަޕިއަން ޔޫނިއަން އަދި އިނގިރޭސިވިލާތާ އެކު އޭރުގެ ސަރުކާރުން ކުރި މަޝްވަރާތަކުގެ ތެރެއިން ޔޫރަޕަށް ބޭރުކުރާ މަހުން ނަގާ 22 ޕަސެންޓްގެ ޑިއުޓީ ކުޑަކުރުމުގެ އުންމީދު ލިބިފައިވަނިކޮށެވެ.
އެހެން ނަމަވެސް، ރައީސް މުއިއްޒުގެ ސަރުކާރު ވެރިކަމަށް ވަޑައިގެންނެވި ފަހުން، މަސް ގަންނަ އަގު 25 އިން ތިރިކުރާނެ ކަމަށް ބުނަމުންދިޔައެވެ. އެގޮތުން "ރާއްޖެ ޓީވީ" އަށް އެނގިފައިވާ ގޮތުން، މިފްކޯ އިން މަސް ގަންނަ އަގު 20 ރުފިޔާއަށް ކުޑަކުރުމަށް ނިންމާފައިވަނީ ހޯމަ ދުވަހުން ފެށިގެންނެވެ.
އެކަމުގެ ޔަގީންކަން ރާއްޖޭގައި ހިންގާ ބައެއް ނޫސްތަކަށް މަސްވެރިކަމާ ބެހޭ ވަޒީރު އަހުމަދު ޝިޔާމް ދެއްވާފައިވާއިރު، މަސް ގަންނަ އަގު ކުޑަކުރުމާ ބެހޭ ގޮތުން ވަޒީރު އެހެން މީޑިޔާތަކުގައި ވެސް ވާހަކަ ދައްކަވާފައިވެއެވެ.
އެހެން ނަމަވެސް އެކަމާ ގުޅޭ ގޮތުން، އެ ވުޒާރާއިން އަދި ރަސްމީކޮށް އެއްވެސް އެއްޗެއް ބުނެފައެއް ނުވެއެވެ.
