އެފްއޭއެމުން ދޫދީ، އޮންލައިންކޮށް ބާއްވަން އުޅުނު ކޮންގްރްސް ބަދަލުކޮށްފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ އެކްސްޓްރާ އޯޑިނަރީ ކޮންގްރެސް އޮންލައިންކޮށް ބާއްވަން ނިންމި ނިންމުން ބަދަލުކޮށްފި އެވެ.

އެފްއޭއެމުން ބާއްވާ މި އެކްސްޓްރާ އޯޑިނަރީ ކޮންގްރެސް އަކީ، ދުނިޔޭގެ ފުޓުބޯޅައިގެ މައި އިދާރާ (ފީފާ) އަދި ސަރަހައްދީ ފުޓުބޯޅަ އިދާރާ (އޭއެފްސީ)ގެ އެންގުމުގެ މަތިން ބާއްވާ ކޮންގްރެސް އެކެވެ. އެއީ އެފްއޭއެމުގެ އަސާސީ ގަވާއިދުގެ ދަށުން، ކޮންމެހެން ހަދަން ޖެހޭ ބައެއް ކޮމިޓީތައް އެކުލަވާލާފައި ނުވާތީވެ، އެ ކޮމެޓީތައް އެކުލަވާލުމަށް ބާއްވާ ކޮންގްރެސް އެކެވެ. އެގޮތުން އެކުލަވާލަން ޖެހޭ ކޮމިޓީ ތަކަކީ، އިލެކްޓޯރަލް ކޮމިޓީ، އެޕީލްސް ކޮމިޓީ، އިންތިޚާބީ އެޕީލްސް ކޮމިޓީ އަދި ޑިސިޕްލިނަރީ ކޮމިޓީ އެވެ. ބުރާސްފަތި ދުވަހު އޮންނަ ކޮންގްރެސް ބޭއްވުމަށް އެންމެ ފުރަތަމަ އެފްއޭއެމުން ނިންމީ އޮންލައިން ކޮށެވެ.

ނަމަވެސް ކުލަބުތަކުގެ އެދުމުގެ މަތިން މިހާރު އެފްއޭއެމުން ވަނީ އެ ނިންމުން ބަދަލުކޮށްފަ އެވެ. އެފްއޭއެމުން ހާމަކޮށްފައިވާ ގޮތުގައި، އެ އިދާރާގެ އެކްސްޓްރާ އޯޑިނަރީ ކޮންގްރެސް އޮންނާނީ ބުރާސްފަތި ދުވަހުގެ ހެނދުނު 09:00 ގައި ޗަންޕާ ސެންޓްރަލް ހޮޓެލްގަ އެވެ.

މައްސަލަ ބޮޑުވެފައިވާ ދަނޑިވަޅެއްގައި، އެފްއޭއެމުން ބާއްވާ އެކްސްޓްރާ އޯޑިނަރީ ކޮންގްރެސްގެ ކަންކަން މޮނިޓަރ ކުރުމަށް، ފީފާ އަދި އޭއެފްސީގެ މަންދޫބުން ބުދަ ދުވަހުގެ ވަގުތެއްގައި ރާއްޖެ އަންނަ ކަމުގެ މައުލޫމާތު ވަނީ ލިބިފަ އެވެ.