އިގްތިސާދީ ދަތިތަކާ ހުރެ، ރަށްރަށުގެ މަޝްރޫއުތައް ފެށުން ލަސްވެދާނެ: ރައީސް މުއިއްޒު
6 ފެބުރުއަރީ 2024 | އަންގާރަ 13:45އެހެން ނަމަވެސް މި އަހަރުގެ ތެރޭގައި ނުވަތަ މި އަހަރުގެ މެދު ތެރޭގައި އެމަނިކުފާނު ވައުދުފުޅާ އެއްގޮތަށް، ތަރައްގީގެ މަޝްރޫއުތައް ފެއްޓެވުމަކީ އުންމީދުކުރައްވާ ކަމެއް ކަމަށް ރައީސް ވިދާޅުވި
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ރާއްޖޭގެ އިގްތިސާދީ ޙާލަތު އޮތް ގޮތުންނާއި ދަރަނި އިތުރުވުމުގެ ސަބަބުން ރާއްޖޭގެ އެކި ކަންކޮޅުތަކުގައި ހުއްޓިފައި ހުރި، އަދި އަލުން ފެށެން ހުރި މަޝްރޫއުތައް ފެށުން ލަސްވެދާނެ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ.
ރައީސް އަދި ސަރުކާރުގެ އިސްވެރިން ތ.އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން، ތ. ދިޔަމިގިއްޔަށް ވަޑައިގެން ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވަނީ، ރާއްޖޭގެ އިގްތިސާދީ ޙާލަތުގެ ސަބަބުން މަޝްރޫއުތަކަށް ކުރާ އަސަރުގެ މައްޗަށް އަލިއަޅުއްވާލައްވައި ވާހަކަ ދައްކަވާފައެވެ.
އެގޮތުން ރާއްޖޭގެ ދަރަނި ވަރަށް ބޮޑަށް މައްޗަށް ގޮސްފައިވާކަން ފާހަގަ ކުރައްވަމުން ރައީސް ވިދާޅުވީ، ސަރުކާރުން މިހާރު ދަރަނި ހުރި ގޮތުން، ތަރައްގީގެ މަޝްރޫއުތައް އެއްފަހަރާ ކުރިއަށް ގެންދިޔުމަކީ ދަތިކަމެއް ކަމަށެވެ.
އެހެން ނަމަވެސް ރާއްޖޭގެ އިގްތިސާދީ ޙާލަތު ރަނގަޅުވަމުން އަންނަ ވަރަކަށް، މި އަހަރުގެ ތެރޭގައި ނުވަތަ މި އަހަރުގެ މެދު ތެރޭގައި އެމަނިކުފާނު ވައުދުފުޅާ އެއްގޮތަށް، ތަރައްގީގެ މަޝްރޫއުތައް ފެއްޓެވުމަކީ އުންމީދުކުރައްވާ ކަމެއް ކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ، ރައްޔިތުންނަށް ޙަގީގަތް ހާމަނުކޮށް ހުރިހާ މަޝްރޫއެއް ވަގުތުން ފައްޓަވާނެ ކަމަށް އެމަނިކުފާނު ވިދާޅުނުވާނެ ކަމަށާއި، އެއީ އެމަނިކުފާނު ދައްކަވާ ވާހަކަތަކަށް ޒިންމާވާން އެމަނިކުފާނު ބޭނުންފުޅުވާތީކަމަށެވެ.
ރައީސް އިތުރަށް ވިދާޅުވީ ރާއްޖޭގެ ދަރަނީގެ ޙާލަތު ގޯސް ނަމަވެސް، އައިއެމްއެފް އަދި ވޯލްޑް ބޭންކުން އެމަނިކުފާނުގެ މެނިފެސްޓޯއިން އެ އިދާރާތަކަށް ހުށަހެޅި ކަންކަން ބަލައިގަންނަ ކަމަށެވެ. އެހެންކަމުން މިހާރު އެމަނިކުފާނު މަސައްކަތް ކުރައްވަމުން ގެންދަވަނީ، ރާއްޖޭގެ އިގްތިސާދީ ޙާލަތު ރަނގަޅު ކުރުމުގެ މަސައްކަތް ކަމަށް ރައީސް ވިދާޅުވިއެވެ.
ރައީސް ތ. ދިޔަމިގިލީގައި ދެއްކެވި ވާހަކަފުޅުގައި އެ ރަށުގެ މުހިންމު ތަރައްގީގެ މަޝްރޫއުތަކަށް ވެސް އަލިއަޅުއްވާލެއްވިއެވެ. އެގޮތުން މި އަހަރުގެ ތެރޭގައި ކުރެވޭނެ ބައެއް ކަންކަމުގެ އިތުރުން، އެ މަޝްރޫއުތައް ކުރިއަށް ގެންދަވާނެ ގޮތްތައް ވެސް ރައީސް ވިދާޅުވެދެއްވިއެވެ.
ރިޔާސީ އިންތިހާބުގެ ކެމްޕޭނުގައި ރައީސް އެރަށަށް ތިން ވައުދެއް ވެވަޑައިގެންނެވިއެވެ. އެއީ ދިޔަމިގިލި ސްކޫލަށް 10 ކްލާސްރޫމާއެކު، މަލްޓިޕާޕަސް ހޯލެއް ގާއިމުކުރުމުގެ އިތުރުން، ރަށް ގިރުމުގެ މައްސަލަ ހައްލުކުރުމެވެ.
