ރޯދަ މަހު އިންތިޚާބު ނުބާއްވަން ހުށަހެޅި އިސްލާހާ ސަރުކާރު މެމްބަރުން ދެކޮޅު
5 ފެބުރުއަރީ 2024 | ހޯމަ 13:21ބިލްގެ ފުރަތަމަ ކިޔުން އިއްވާފައި ވަނީ އާދިއްތަ ދުވަހު ދައުރުން ބޭރުން ބޭއްވި މަޖިލީހުގެ ޖަލްސާގައި
ރައްޔިތުންގެ މަޖިލީހުގެ ޖަލްސާގެ ތެރެއިން
ރޯދަ މަހު އިންތިޚާބު ނުބާއްވަން ހުށަހެޅި އިސްލާހާ ސަރުކާރު މެމްބަރުން ދެކޮޅުހައްދަވައިފިއެވެ.
ރަމަޟާން މަހުގެ އެއްވެސް ދުވަހެއްގައި އިންތިޚާބު ނުބޭއްވޭގޮތަށް، އިންތިޚާބާބެހޭ އާންމު ގާނޫނަށް ހުށަހެޅި އިސްލާހާގުޅޭ ބިލުގެ އިބްތިދާއީ ބަހުސް ހޯމަ ދުވަހު ވަނީ ކުރިއަށް ގެންގޮސްފައެވެ. މި ބިލްގެ ފުރަތަމަ ކިޔުން އިއްވާފައި ވަނީ އާދިއްތަ ދުވަހު، ދައުރުން ބޭރުން ބޭއްވި މަޖިލީހުގެ ޖަލްސާގައެވެ.
އެ ބިލް ބަލައިގަތުމާމެދު ނެގި ވޯޓުގައި ބިލް ބަލައިގަންނަން ނުފެންނަ ކަމަށް 11 ބޭފުޅުން ވޯޓު ދެއްވިއެވެ. އޭގެތެރޭގައި ސަރުކާރު ހިންގާ ޕީޕީއެމް/ޕީއެންސީގެ މެމްބަރުންގެ އިތުރުން ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމް ހިމެނިވަޑައިގަންނަވައެވެ. މަޖިލީހަށް ހާޒިރުވެ ތިބީ 50 މެމްބަރުންނެވެ. އެ ބިލް ބަލައިގަތީ 39 މެމްބަރުންގެ ވޯޓާ އެކުގައެވެ. ބިލް ފާސްވާން ބޭނުން ވަނީ 26 މެމްބަރުންގެ ވޯޓެވެ.
ބިލުގެ ކޮމިޓީ މަރުހަލާއާމެދު ބިލުގެ އިބްތިދާއީ ބަހުސް މަރުހަލާގައި ވަނީ ހުށަހެޅުމެއް ލިބިފައެވެ. އެއީ 5 މެމްބަރުންގެ ކޮމިޓީއަކުން ބިލް ދިރާސާކުރެއްވުމެވެ. ހުޅުމާލޭ ދާއިރާގެ މެމްބަރު އަލީ ނިޔާޒް ހުށަހެޅުއްވި އެ އިސްލާހަށް ތާއީދުކުރެއްވީ މާފަންނު މެދު ދާއިރާގެ މެމްބަރު އިބްރާހީމް ރަޝީދެވެ. އެގޮތަށް ފާސްކޮށްފައި ވަނީ 39 މެމްބަރުންގެ ވޯޓާ އެކުގައެވެ. އެ ހުށަހެޅުން ފާސްކުރަން ނުފެންނަ ކަަމަށް 12 މެމްބަރުން ވޯޓުދެއްވިއެވެ.
އެ މައްސަލަ ބެލުމަށް ހުށަހަޅުއްވާފައިވާ 5 މެމްބަރުންނަކީ
- ހެންވޭރު އުތުރު ދާއިރާގެ މެމްބަރު، އިބްރާހީމް މުއިއްޒު
- ފުވައްމުލަކު އުތުރު ދާއިރާގެ މެމްބަރު، މުހައްމަދު ރަޝީދު
- ކެންދޫ ދާއިރާގެ މެމްބަރު، އަލީ ހުސައިން
- މާފަންނު މެދު ދާއިރާގެ މެމްބަރު، އިބްރާހީމް ރަޝީދު
- ގައްދޫ ދާއިރާގެ މެމްބަރު، އަހުމަދު ޒާހިރު
އެ ހުށަހެޅުއްވުމަށް ތާއީދުކުރެއްވީ މާފަންނު ހުޅަނގު ދާއިރާގެ މެމްބަރު މުހައްމަދު ފަލާހެވެ. އެ ނަންތައް ފާސްކުރެއްވީ 38 މެމްބަރުންގެ ވޯޓާއެކުއެވެ. ނަންތައް ފާސްކުރަން ނުފެންނަ ކަމަށް 11 ބޭފުޅުން ވޯޓުދެއްވިއެވެ.
އިންތިޚާބުތަކާބެހޭ އާއްމު ގާނޫނަށް އިސްލާހު ހުށަހަޅުއްވާފައިވަނީ އިހަވަންދޫ ދާއިރާގެ މެންބަރު މުހައްމަދު ޝިފާއުއެވެ. އެގޮތުން އިންތިޚާބުތަކާބެހޭ އާންމު ގާނޫނުގެ 43 ވަނަ މާއްދާ އިސްލާހުކުރަން ހުށަހަޅުއްވާފައިވެއެވެެ. 43 ވަނަ މާއްދާގެ (ހ)ގައި ބުނެފައިވަނީ، އިންތިޚާބުތަކުގައި އެ އިންތިޚާބެއްގައި ވޯޓު ނަގާ ގަޑިއާއި އާންމު އުސޫލެއްގެ ގޮތުން ވޯޓު ނަގައި ނިންމާ ގަޑިއާއި ވޯޓު ގުނަން ފަށާ ގަޑި ކަނޑައަޅައި އިއުލާންކުރާނީ އިލެކްޝަންސް ކޮމިޝަނުން ކަމަށެވެ.
މީގެ އިތުރުން މި މާއްދާގެ (ށ)ގައި ބުނެފަައިވަނީ، މި ގާނޫނުގައި ނުވަތަ އެހެން ގާނޫނެއްގައި އެހެން ގޮތަކަށް ބުނެފައި އޮތްނަމަވެސް، ރަމަޟާން މަހުގެ ދުވަހެއްގައި އިންތިޚާބެއް ބާއްވާއިގެން ނުވާނެ ކަމަށެވެ. އަދި އިންތިޚާބު ބާއްވަންޖެހޭ ތާރީޚު ރަމަޟާން މަހުގެ ދުވަހަކާ ދިމާވާނަމަ، އެ އިންތިޚާބެއް ބާއްވަންވާނީ ރަމަޟާން މަސް ނިމުމުގެ 10 ދުވަސް ފަހުން ކަމަށެވެ.
އެ ބިލަށް ވާހަކަދެއްކި ގިނަ މެމްބަރުން ވަނީ ރޯދަ މަހު އިންތިޚާބު ބޭއްވުމަށް ތާއީދު ނުކުރާކަން ފާހަގަކޮށްފައެވެ. އަދި އެއީ ވޯޓަރސް ޓަރންއައުޓް އިތުރަށް ދަށްވާނެކަމަށް މެމްބަރުން ވަނީ ބުނެފައެވެ. އަދި އިންތިޚާބުތަކާބެހޭ ގާނޫނަށް އަދިވެސް ގެންނަން ޖެހޭ އިތުރު ބަދަލުތައް ހުރިކަމަށް އެ މެމްބަރުން ވަނީ ބުނެފައެވެ.
މިހާރު ގެންނަ އިސްލާހުގައި ބުނާގޮތުން އިންތިޚާބާބެހޭ ގާނޫނުގެ 43 ވަނަ މާއްދާގެ (ނ)ގައި ބުނެފައިވަނީ މި ހާލަތުގައި، އެ އިންތިޚާބަކާގުޅޭ ޚާއްސަ ގާނޫނުގެ ދަށުން، ނުވަތަ މި ގާނޫނުގެ ދަށުން އެކި ކަންކަމަށް ކަނޑައަޅާފައިވާ މުއްދަތުތަކަށް އަމަލުކުރެވެން ނެތް ހާލަތެއް ކުރިމަތިވާނަމަ، މި މާއްދާގެ (ށ)ގައި ބުނެފައިވާ ގޮތަށް އިންތިޚާބު ބޭއްވުމަށްޓަކައި އެ މުއްދަތުތަކަށް ބަދަލުގެނެސް، އިލެކްޝަންސް ކޮމިޝަނުން އަލުން މުއްދަތުތައް ކަނޑައަޅަންވާނެ ކަމަށެވެ.
މިހާރު އިލެކްޝަންސް ކޮމިޝަނުން ނިންމާފައި ވަނީ ރޯދަ މަހުގެ 17 ވަނަ ދުވަހު މަޖިލިސް އިންތިޚާބު ބޭއްވުމަށެވެ. ނަމަވެސް އެއީ ކޮމިޝަނުން އެންމެ ބޭނުންވާ ގޮތް ނޫންކަމަށާއި މިއީ މަޖުބޫރު ނިންމުމެއް ކަމަށް އެ ކޮމިޝަނުން ވަނީ ބުނެފައެވެ. އަދި މަޖިލިސް އިންތިޚާބަށް ލަފާދޭ ގައުމީ ކޮމިޓީގައި ހިމެނޭ އެއްވެސް ސިޔާސީ ޕާޓީއަކުން ވެސް، އަދި އިދާރާއަކުން ވެސް ރޯދަ މަހު އިންތިޚާބު ބާއްވަން ތާއީދެއް ނުކުރެއެވެ.
