ދިވެހި ފުޓްބޯޅައިގެ ހާލަތާމެމެދު ރައީސް "މާޔޫސް" ވެއްޖެ
ސަރަޙައްދީ މުބާރާތެއްގައި ދުވަހަކު ރާއްޖެ ނުދާހާ ދަށަށް އަޅުގަނޑުމެން ހިނގައްޖެ: ރައީސް
ރާއްޖޭގެ ގައުމީ ފުޓްބޯޅަ ޓީމާ އެފްއޭއެމުގެ ރައީސް ބައްސާމް ބައްދަުކުރައްވަނީ
ދިވެހި ފުޓްބޯޅައާ މެދު ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާޔޫސްވެއްޖެ ކަމުގެ އިޝާރާތެއް ދެއްވައިފި އެވެ.
ރައްޔިތުންގެ މަޖިލިސް މި އަހަރަށް ހުޅުވައިދެއްވުމަށް އިއްވެވި ރިއާސީ ބަޔާނުގައި ރައީސް ވިދާޅުވީ ސަރަހައްދީ ފުޓްބޯޅައިގައި ވެސް ރާއްޖެ ދަށްވެއްޖެ ކަމަށެވެ.
މިއީ ގައުމުގެ ހާލަތު ބަޔާންކޮށްދޭން ކޮންމެ އަހަރަކު ދެއްވާ ރިއާސީ ބަޔާނެއްގައި ރައީސަކު މިހާ ސާފުކޮށް ފުޓްބޯޅައިގެ ވާހަކަ ވިދާޅުވި ފުރަތަމަ ފަހަރެވެ.
ރައީސް މިފަދައިން ވިދާޅުވިއިރު ދިވެހި ފުޓްބޯޅަ އިދާރާ، އެފްއޭއެމުގެ ގިނަ މައްސަލަތަކެއް ވަނީ ފެންމަތިވެފަ އެވެ. ރައީސް ބައްސާމް އަދީލް ޖަލީލަށް ވަނީ ހިޔާނާތުގެ ތުހުމަތު ކުރެވި ދައުވާ އުފުލައިފަ އެވެ. އެތަނުގެ ހިންގުން އޮތީ ބޮއްސުންލާފަ އެވެ. މުވައްޒަފުންނަށް މުސާރަ ނުދެ އެވެ. ގަވާއިދުން މުބާރާތްތައް ނުބޭއްވެ އެވެ. މިހެންވެ ފީފާއިން ވެސް ވަނީ އެފްއޭއެމުގެ ތަހުގީގެއް ފަށައިފަ އެވެ.
މިފަދަ ކަންކަމުގެ ސަބަބުން ރައީސް ވިދާޅުވީ ކުޅިވަރުތައް ކުޅޭ ދިވެހި ހުނަރުވެރި ގިނަ އެތުލީޓުން މިއަދު ތިބީ މާޔޫސް ކަމުގައި ކަމަށެވެ. އަދި އެމަނިކުފާނު މިކަންކަން ރަނގަޅުކޮށް، ހައްލު ހޯއްދަވައިދެއްވަން މަސައްކަތް ކުރައްވާނެ ކަމަށެވެ.
ރައީސް މިފަދައިން ވިދާޅުވިއިރު އެފްއޭއެމުގެ އިންތިހާބުގައި ވެސް މައްސަލަޖެހި އޮތީ ހުއްޓިފަ އެވެ.
