ރިޔާސީ ބަޔާން އިއްވާ ޖަލްސާ ބޮއިކޮޓްކުރަން އެމްޑީޕީގެ ޕީޖީއިން ފާސްކޮށްފި
4 ފެބުރުއަރީ 2024 | އާދީއްތަ 17:00މިއީ ރައީސް މުޢިއްޒުގެ ފުރަތަމަ ރިޔާސީ ބަޔާން
އެމްޑީޕީގެ ޕީޖީ ގްރޫޕުން އެކަން ފާސްކޮށްފައިވަނީ އާދިއްތަ ދުވަހު ބޭއްވި ބައްދަލުވުމުން (ފައިލްފޮޓޯ)
މާދަމާ އޮންނަ ރިޔާސީ ބަޔާން އިއްވާ ޖަލްސާ ބޮއިކޮޓް ކުރަން އެމްޑީޕީގެ ޕީޖީއިން ފާސްކޮށްފިއެވެ.
އެޖަލްސާ ބޮއިކޮޓް ކުރަން އެމްޑީޕީގެ ޕީޖީން ފާސްކުރީ އާދިއްތަ ދުވަހު ބޭއްވި ޕީޖީ ގްރޫޕުގެ ބައްދަލުވުމުގައި ބައިވެރިވި މެންބަރުންގެ އިއްތިފާޤުންނެވެ. އެކަމަށް ޚާއްސަކޮށް އެޕާޓީގެ ޕީޖީން ތްރީލައިން ވިޕްއެއް ވެސް ވަނީ ނެރެފައެވެ.
އެގޮތުން އެ ޖަލްސާ ބޮއިކޮޓް ކުރުމަށް އެމްޑީޕީގެ ޕީޖީން ނިންމީ ވަޒީރުންނަށް ރުހުން ދިނުމުގެ މައްސަލައިގައި ސަރުކާރުން ޢަމަލު ކުރި ގޮތްތަކާއި، އެދުވަހު މަޖިލިސް މެންބަރުންނަށް ރައްކާތެރި މާހައުލެއް ފޯރުކޮށްދިނުމަށް ސަރުކާރު އަދި ކަމާބެހޭ އިދާރާތަކުން ނުކުޅެދުމާ ގުޅިގެންނެވެ.
އަދި ރިޔާސީ ބަޔާން އިއްވާ ދުވަހަކީ ސަރުކާރު ބަންދު ނޫން ދުވަހެއްގެ ގޮތުގައި ކަނޑެޅުމުގެ ސަބަބުން މަޖިލީހުގެ ޙުރުމަތް ކަނޑާލައިފައިވާތީ ކަމަށް ވެސް އެ ޕާޓީން ބުންޏެވެ.
