ކާވާ ވޮލީ މުބާރާތަށް ގައުމީ އަންހެން ޓީމު ނޭޕާލަށް

ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ)އިން އިންތިޒާމުކޮށްގެން ބާއްވާ ކާވާ ވިމެންސް ވޮލީބޯލް ޗެލެންޖް ކަޕް 2023ގައި ބައިވެރިވުމަށް ރާއްޖޭގެ އަންހެން ވޮލީ ޓީމު ނޭޕާލަށް ފުރައިފިއެވެ.

މި މަހު 22ގައި ނޭޕާލުގެ ކަތުމަންޑޫގައި ފެށުމަށް ހަމަޖެހިފައިވާ މުބާރާތުގައި ބައިވެރިވުމަށް ގައުމީ ޓީމު ފުރީ ހޮނިހިރު ދުވަހުގެ ރޭގައެވެ. ލަންކާ މަގުން ދަތުރުކޮށް، ހޮނިހިރު ދުވަހުގެ ރޭ ލަންކާގައި މަޑުކުރުމަށްފަހު، ނޭޕާލަށް ދިއުމަށް ހަމަޖެހިފައިވަނީ އާދިއްތަ ދުވަހު ހެނދުނުއެވެ.

ރާއްޖެ ހިމެނޭހެން ޖުމްލަ 8 ގައުމަކުން މި މުބާރާތުގައި ބައިވެރިވިއިރު، ރާއްޖެ އޮތީ ޕޫލް ބީގައެވެ. ރާއްޖެއާއެކު އެ ޕޫލްގައި އޮތީ އުޒްބަކިސްތާން، ކަޒަކިސްތާން އަދި ސްރީލަންކާއެވެ. ޕޫލް އޭގައި އޮތީ ކިރްގިސްތާން، ބަންގްލަދޭޝް، އިންޑިއާ އަދި މުބާރާތް ކުރިޔަށް ދާ ގައުމުކަމަށްވާ ނޭޕާލްއެވެ.

ގައުމީ ޓީމުން ނޭޕާލަށް ފުރީ، ރާއްޖޭގައި ގިނަ ފަރިތަކުރުންތަކެއް ފުރިހަމަ ކުރުމަށްފަހުއެވެ. ފޯނޭޝަންސް ކަޕަށްފަހު، ގަައުމީ އަންހެން ވޮލީ ޓީމަށް ކޯޗަކަށް ގެނައީ ތައިލެންޑުގެ ތަޖުރިބާކާރު ކޯޗު ވިޗީޕޮން ފޯންޗާޓްޔިންޗީޕްއެވެ. އޭނާ ވަނީ މީގެކުރިން ތައިލެންޑްގެ ޔޫތު ޓީމްތަކާއި, ވިއެޓްނާމް ގައުމީ ޓީމަށްވެސް އިރުޝާދު ދީފައެވެ.

މި އަހަރު ކުރީކޮޅު ރާއްޖޭގައި އޮތް ފޯނޭޝަންސް ކަޕުގައި ރާއްޖޭގެ އަންހެން ޓީމުން ވަނީ ރަނގަޅު ކުޅުމެއް ދައްކައި، ރިހި މެޑަލް ހޯދާފައެވެ. އެ މުބާރާތުން ލިބުނު ހިތްވަރާއި ތަޖުރިބާއާއެކު ގައުމީ ޓީމުން މި މުބާރާތުގައި ރަނގަޅު ނަތީޖާއެއް ނެރޭނެކަމަށް ބެލެވެއެވެ. 22 ވަނަ ދުވަހު މުބާރާތުގެ ފުރަތަމަ މެޗުގައި ރާއްޖެ ނިކުންނާނީ ކަޒަކިސްތާނާ ދެކޮޅަށެވެ.