ކާވާ 23 އަހަރުން ދަށުގެ މުބާރާތުގެ ޓެކްނިކަލް ޑެލިގޭޓަކަށް ރާއްޖޭގެ ތުއްތުކޯ
މިއީ ރާއްޖޭގެ ވޮލީބޯޅައިގައި މަސައްކަތް ކުރާ ފަރާތަކަށް މިފަދަ އިސް ޒިންމާއެއް ލިބުނު ފުރަތަމަ ފަހަރު
ރާއްޖޭގެ ވޮލީ ރެފްރީ ތުއްތުކޯ
ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ) އިން އިންތިޒާމުކޮށްގެން ބާއްވާ 23 އަހަރުން ދަށުގެ ވޮލީބޯޅަ މުބާރާތުގެ ޓެކްނިކަލް ޑެލިގޭޓަކަށް ރާއްޖޭގެ ވޮލީ ރެފްރީ އަޙުމަދު ނަޝީދު (ތުއްތުކޯ) ހަމަޖައްސައިފިއެވެ.
މި މުބާރާތް ކުރިއަށް ދާނީ މި މަހުގެ 22 އިން 26 އަށް ބަންގްލަދޭޝްގެ ޑާކާގައެވެ. ތުއްތުކޯ އަކީ ވޮލީބޯޅައިގެ މައި އިދާރާ (އެފްއައިވީބީ)ގެ ރެފްރީއެއްގެ އިތުރުން ރާއްޖޭގެ ރެފްރީސް ކޮމެޓީގެ ވެސް ޗެއާއެވެ. މި މުބާރާތުގެ ޓެކްނިކަލް ޑެލިގޭޓްގެ ހައިސިއްޔަތުން ތުއްތުކޯގެ މަސައްކަތަކަށްވާނީ މުބާރާތް ރާވާ، އިންތިޒާމުކޮށް ހިންގުމެވެ. މިއީ ރާއްޖޭގެ ވޮލީބޯޅައިގައި މަސައްކަތް ކުރާ ފަރާތަކަށް މިފަދަ އިސް ޒިންމާއެއް ލިބުނު ފުރަތަމަ ފަހަރެވެ.
ތުއްތުކޯ އަކީ ޤައުމީ ފެންވަރުގެ ބޯޑެތި މުބާރާތްތަކުގައި ވެސް ރެފްރީކަން ކުރަމުން އަންނަ ޖެހިލުން ކުޑަ ރެފްރީއެކެވެ. މީގެ އިތުރުން ބައިނަލްއަޤުވާމީ ބޮޑެތި މުބާރާތްތަކުގައި ވެސް ތުއްތުކޯ ވަނީ ރެފްރީކަން ކޮށްފައެވެ. އޭގެ ތެރޭގައި ދާދި ފަހުން ޕާކިސްތާންގެ ލާހޯރުގައި ކުރިއަށްދިޔަ ސެންޓްރަލް އޭޝިއާ ވޮލީބޯލް ޗެމްޕިއަންޝިޕް ހިމެނެއެވެ. އެ މުބާރާތުގެ ފައިނަލް މެޗުގެ ރެފްރީކަން ވެސް ތުއްތުކޯ ވަނީ ކޮށްފައެވެ.
ތުއްތުކޯ އަކީ ވޮލީގެ ރެފްރީއެއްގެ އިތުރުން ވޮލީ ބޯޅަ ކުރިއެރުވުމަށް ވެސް ގިނަ ގުނަ މަސައްކަތް ކުރަމުން އަންނަ ފަރާތެކެވެ.
