ލަންކާ ބީޗް ވޮލީ މުބާރަތަކީ ރޭންކިންގައި ކުރިއަށްދާން ކުޅުންތެރިންނަށް ލިބޭ ފުރުސަތެއް: ލަތީފް

ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) އިން ލަންކާގައި ބާއްވާ ބީޗް ވޮލީބޯޅަ މުބާރާތަކީ ރޭންކިންގައި ކުރިއަށްދާން ރާއްޖޭގެ ކުޅުންތެރިންނަށް ލިބޭ ރަނގަޅު ފުރުސަތެއް ކަމަށް އެ އިދާރާގެ ރައީސް މުޙައްމަދު ލަތީފް ވިދާޅުވެއްޖެއެވެ.

ލަންކާގައި އަންނަ ފެބްރުއަރީ މަހުގެ 18 ވަނަ ދުވަހު ފަށާ ބީޗް ވޮލީބޯލް ޗެމްޕިއަންޝިޕަށް ދުނިޔޭގެ ވޮލީބޯޅައިގެ މައި ޖަމުއިއްޔާ އެފްއައިވީބީގެ އެޕްރޫވަލް މިހާރު ވަނީ ލިބިފައެވެ. އެއާއެކު އެ މުބާރާތުގެ ފެންވަރު އެތައް ގޮތަކުން މަތިވާނެއެވެ. އަދި އެ މުބާރާތަކީ އެފްއައިވީބީ ރޭންކިންގެ ޕޮއިންޓް ކުޅުންތެރިންނަށް ލިބޭނެ މުބާރާތެކެވެ.

"ރާއްޖެ.އެމްވީ" އަށް ދެއްވި ޚާއްސަ އިންޓަވިއުއެއްގައި ލަތީފް ވިދާޅުވީ މިއީ ކާވާގެ ތާރީޚުގައި ފުރަތަމަ ފަހަރަށް ދުނިޔޭގެ ވޮލީބޯޅައިގެ މައި ޖަމުއިއްޔާ އެފްއައިވީބީގެ އެޕްރޫވަލްއާއެކު ބާއްވާ މުބާރާތް ކަމަށެވެ. އަދި މިއީ ބީޗް ވޮލީބޯޅަ ކުޅުންތެރިންނަށް އެ ކުޅުންތެރިންގެ ހުނަރު ދައްކައި، އެފްއައިވީބީގެ ރޭންކިން ޕޮއިންޓް އިތުރުކުރުމަށް ލިބިގެންދާނެ ބޮޑު ފުރުސަތެއް ކަމަށްވެސް ވިދާޅުވިއެވެ.

ލަންކާގައި ބާއްވާ ވޮލީބޯޅަ މުބާރާތުގައި ފަސް ގައުމަކުން 10 ޓީމު ފިރިހެން ޑިވިޝަނުގައި ބައިވެރިވާނެއެވެ. ކޮވިޑް-19 ގެ ޕެންޑަމިކާއެކު އެ މުބާރާތުގައި ބައިވެރިވާ ޓީމުތަކުގެ އަދަދު މަދުވެފައިވާއިރު، މިހާރު މުބާރާތުގައި ބައިވެރިވެފައިވާ ޓީމުތަކަކީ ލަންކާ، ދިވެހިރާއްޖެ، ޕާކިސްތާން، އުޒްބެކިސްތާން އަދި އީރާނެވެ. އަދި އަންހެން ޑިވިޝަނުގައި ތިން ގައުމަކުން ހަ ޓީމު ވަނީ ބައިވެރިވެފައެވެ.

ލަތީފް ވިދާޅުވީ މިއަހަރު ރާއްޖޭގައިވެސް ބައިނަލްއަގުވާމީ ބީޗް ވޮލީބޯޅަ މުބާރާތެއް ކާވާއިން ބޭއްވުމަށް ނިންމާފައިވާ ކަމަށާއި، އެ މުބާރާތަކީ ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އެފްއައިވީބީ ރެކުއާމެންޓްސް ހަމަކޮށްފިނަމަ، އެ ޖަމިއްޔާގެ އެޕްރޫވަލްއާއެކު ކުޅެވިގެންދާނެ މުބާރާތެއް ކަމަށެވެ.

އެފްއައިވީބީ އެޕްރޫވް މުބާރާތެއް ފުރަތަމަ ފަހަރަށް ކާވާއިން ބޭއްވުން އެއީ ސެންޓްރަލް އޭޝިއާ ޒޯނުގެ ގައުމުތަކަށް ލިބުނު ބޮޑު ކާމިޔާބީއެއް ކަމަށާއި، މި ކާމިޔާބީގެ ސިއްރަކީ ސެންޓްރަލް ޒޯނުގައި ހިމެނޭ 14 ގައުމުގެ އެކުވެރިކަމާއި ކާވާގެ މިހާރުގެ ހިންގުންތެރިންގެ މަސައްކަތް ކަަމަށް ލަތީފް ވިދާޅުވިއެވެ. އަދި ކާވާއިން މިހާރު މަސައްކަތް ކުރަނީ އެ އެސޯސިއޭޝަނުގެ މުބާރާތްތަކަކީ ބްރޭންޑްތަކެއްގެ ގޮތުގައި ހެދުމަށް ކަމަށާއި، އޭރުން ލިބޭ ސްޕޮންސަރުން ލިބި މުބާރާތުގެ ފެންވަރު ރަނގަޅުވާނެ ކަމަށްވެސް ވަނީ ވިދާޅުވެފައެވެ.

ބީޗް ވޮލީބޯޅައިގައި ރާއްޖޭގެ ކުޅުންތެރިންގެ ތެރެއިން އެފްއައިވީބީގައި ރޭންކް ކުރެވިފައިވާ ކުޅުންތެރިންނަކީ ރާއްޖޭގައި އުފެދުނު އެންމެ މޮޅު އެއް ވޮލީ ކުޅުންތެރިޔާ ކަމަށްވާ އިސްމާޢީލް ސާޖިދު (ކުޑަ ކާއްޓޭ) އާއި، އިންޑިއަން އޯޝަން އައިލޭންޑް ގޭމްސް (އައިއޯއައިޖީ) ގައި މެޑަލް ހޯދި އާދަމް ނަސީމް (އެޑަމާ) އެވެ.